लॅपटॉप, टॅबलेट आयातीचेर निर्बंध
भांगरभूंय | प्रतिनिधी
देशांतल्या उत्पादनांक उर्बा दिवपाक केंद्राचो निर्णय
नवी दिल्ली : केंद्र सरकारान लॅपटॉप, टॅबलेट आनी वैयक्तीक संगणक आयात करपा खातीर परवानो दिवप सक्तीचें केलां. हो निर्णय रोखडोच चालीक लायला आनी ताचो परिणाम अॅपल, डेल आनी सॅमसंग ह्या भायल्या ब्रँडांचेर जातलो. थळाव्या पांवड्या वयल्या उत्पादनांक उर्बा दिवपाक हें पावल उबारलां, अशें सरकारान सांगलां.
आतां मेरेन भारतीय कंपन्यांनी लॅपटॉपची आयात करपाचेर कसलेच तरेचें बंधन नाशिल्लें. पूण आतां आयाती खातीर विशेश परवानो घेवचो पडटलो. परवानो वेवस्थेक लागून दर खेपे नवे मॉडेल येता तेन्ना ताची भारतीयांक वाट पळोवची पडटली, अशें तज्ञ म्हणटात. देशांतल्या विवीध परबां वेळार बाजार फुलतात. पूण ह्या नव्या निर्बंधाक लागून कंपन्यांक आनी आयातीचेर जगपी वेपारी, उद्देजकांक फटको बसपाची शक्यताय आसा. मोदी सरकार थळाव्या उत्पादनाक चालना दिता. आयात करचे बदला ‘मेक इन इंडिया’ ह्या विशयाचेर सरकारान लक्ष केंद्रीत केलां. सरकारान आतां आयात करपाच्या बदलाक थळाव्या उत्पादकां खातीर ‘पीएलआय’ ही येवजणूक चालीक लायल्या. ताका लागून आयात बंदीचो निर्णय घेतिल्ल्याची शक्यताय जाणकारांनी उक्तायल्या.
देड टक्केच आयात
लॅपटॉप, टॅबलेट आनी वैयक्तीक संगणका वांगडा इलेक्ट्रॉनीक वस्तूंची भारताची आयात अंदू एप्रील ते जून काळांत 19.7 अब्ज डॉलर आशिल्ली. फाटल्या वर्साच हातूंत 6.25 टक्के वाड जाल्या. 2021- 22 त हो आंकडो 7.37 अब्ज डॉलर आशिल्लो. इलेक्ट्रॉनीक सामानाच्या वर्सुकी आयातींत लॅपटॉप, टॅबलेट आनी वैयक्तीक संगणकांचें प्रमाण फकत देड टक्के आसा. हातूंतली अर्दी आयात फकत चिनांतल्यान जाता. बऱ्योच भारतीय कंपनीं एसेसरीज भायल्यान आयात करतात. तशेंच वस्तूचे भितरले बरेच भागूय भायल्यानूच, खास करून चीनांतल्यान हाडटात.
अॅपल, डेल, सॅमसंगाक फटको
भारतीय बाजारांत आशिल्ल्या मुखेल इलेक्ट्रॉनिक्स सामानांत एचसीएल, सॅमसंग, डेल, एलजी इलेक्ट्रॉनिक्स, एसर, अॅपल, लेनोव्हो आनी एचपी हांचो आसपाव आसा. हांतले अॅपलचे आयपॅड आनी डेलचे लॅपटॉप भारतांत आयात करतात. तांचें थळाव्या पांवड्याचेर उत्पादन जायना. ताका लागून ह्या कंपनींक निर्बंधाचो चड फटको बसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
