भांगरभूंय | प्रतिनिधी
जमैकान पंगडान पयले खेपे बायलांचे संवसारीक फुटबॉल सर्तीचे प्री क्वॉर्टर फायनलींत सुवात मेळयली. फिफा रॅंकिंगेंत 43वे सुवातेर आशिल्ल्या जमैकाच्या पंगडान एफ गटांतले मॅचींत संवसारीक क्रमवारींत आठवे सुवातेर आशिल्ल्या ब्राझिल पंगडाक गोलशुन्य बरोबरींत आडायलो.
ह्या गटांत फ्रान्स सात गुणां सयत पयले जाल्यार जमैका पांच गुणां सयत दुसरे सुवातेर आयलो. ब्राझिल चार गुणां सयत तिसरे आनी पनामा शुन्य गुणा सयत निमाणे सुवातेर उरलो.
फ्रान्स आनी जमैका ह्या पंगडांनी फुडले फेरयेंत सुवात मेळयली. ब्राझिल 28 वर्सांनी पयले खेपे मुळावे फेरयेची आडखळ हुपपाक अपेशी थारलो.
ब्राझिलाची मार्ताची ही सवी संवसारीक सर्त आशिल्ली. जमैकान गट पांवड्या वयले मॅचींत एकूय हार घेवंक ना. फ्रान्साक लेगीत बादाबाद आडायिल्लो जाल्यार पनामाक हारोवपाक येस मेळयिल्लें.
मजगतीं जी गटांतले मॅचींत दक्षीण आफ्रिकेन इटली पंगडाक 3-2 फरकान हारयलो. संवसारीक सर्तींत दक्षीण आफ्रिकेचें हें पयलें जैत थारलें. तशेंच ताणें प्री क्वॉर्टरफायनलींत सुवात मेळयली. आनीक एके मॅचींत स्विडनान अर्जेंटिना पंगडाक 2-0 हारोवन सेगीत तिसरें जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
