जुलयांत जीएसटीत वाड

भांगरभूंय | प्रतिनिधी

भांगरभूंय । खबरां संस्था
नवी दिल्ली ः जुलयांत वट्ट जीएसटी वसुली (Gross GST collection) 11 टक्क्यांनी वाडून 1.65 लाख कोटी रुपया जाल्या. जीएसटी वसुली 1.6 लाख कोटी रुपयांचो आंकडो हुंपपाची ही पांचवी खेपेची गजाल. सरकाराक फाटल्या म्हयन्यांत वस्त आनी सेवा करांतल्यान वट्ट 1,65,105 कोटी रुपयांची येणावळ मेळ्ळी. हातूंतले 29,773 कोटी रुपया केंद्रीय जीएसटी, 37,623 कोटी रुपया राज्य जीएसटी आनी 85,930 कोटी रुपया आयजीएसटी म्हणून मेळ्ळ्यात. आयजीएसटींत आयात केल्ल्या वस्तूंचेर वसूल केल्लो कर 41,239 कोटी रुपया आसा. हाचे भायर 11,779 कोटी रुपया उपकर म्हूण एकठांय केल्यात.
अर्थ मंत्रालयान जारी केल्ल्या निवेदनांत वर्सुकी आदाराचेर जीएसटी येणावळींत 11 टक्क्यांनी वाड जाल्या अशें सांगलां. देखून देशांतल्या वेव्हारांतल्यान येवपी येणावळीत वाड जालां. फाटल्या वर्साच्या तुळेंत हे प्रमाण 15 टक्क्यांनी वाडला.
जूनांत ही वसुली 1,61,497 कोटी रुपया आशिल्ली. सरकारान आयजीएसटी वसुलींतल्यान 39,785 कोटी रुपया सीजीएसटीक आनी 33,188 कोटी रुपया एसजीएसटीक दिल्यात. निवाड्या उपरांत सीजीएसटीची 69,558 कोटी आनी एसटीएसटीची 70,811 कोटी रुपयांची येणावळ प्राप्त जाल्या.