शुभमन, सॅमसन, हार्दीक हांचे अर्द शेंकडे

भांगरभूंय | प्रतिनिधी

येजमान वॅस्ट इंडीजा आड चालू आशिल्ले तिसरे आनी निमाणे वन डे मॅचींत भारतान टॉस हारल्या उपरांत पयलीं बॅटींग करतना निर्धारीत 50 ओव्हरींनी 5 विकेटी वगडावन 351 धांवड्यो केल्यो.

सदचो मुखेली रोहीत शर्मा आनी विराट कोहली हांचे गैरहाजेरेंत भारताच्या युवा खेळगड्यांनी जबरदस्त खेळ केलो. इशान किशनान आपलो उत्कृश्ट फॉर्म कायम राखतना सेगीत तिसऱ्या अर्द्या शेंकड्याची नोंद केली.

संजू सॅमसनान (51) लेगीत आकर्शक खेळी केली. शुभमन गिलान फॉर्म मेळयलो. पूण, शेंकड्याच्या हुमऱ्यार आसतना तो कॅच दिवन बाद जालो. ताणें 85 धांवड्यांची खेळी केली. ऋतुराज गायकवाडाक मात व्हड खेळी करपाक जमली ना. मुखेली हार्दीक पांड्या आनी सुर्यकुमार यादव हांणी अखेरच्या ओव्हरींनी समाधानकारक शॉर्ट मारून विंडीजा मुखार व्हड मोख दवरली.

इशान किशन आनी शुभमन गिल हांणी पयले विकेटी खातीर 143 धांवड्यांची खेळी केली. हे माळेंतली भारताच्या ओपनरांनी केल्ली ही सर्वोत्कृश्ट भागिदारी थारली. इशानान सातत्य राखतना अर्द शेंकडो नोंदयलो. अखेरेक 20वे ओव्हरींत इशान बाद जालो. यानिक कारियाच्या बॉलाचेर व्हड शॉर्ट मारपाच्या यत्नांत तो स्टंप बाद जालो. ताणें 8 चवके आनी तीन सक्यांचे मजतीन 77 धांवड्यांची खेळी केली. ऋतुराज गायकवाडाक (8) तिसरे सुवातेर बॅटींग करपाची संद मेळ्ळी. पूण, ताका व्हड खेळी करपाक जमली ना.

संजू सॅमसन आक्रमक मुडांत दिसलो. मैदानांत देंवना फुडें ताणें दुसरोच बॉल शिमे भायर मारलो. दुसरे वटेन शुभमन नवीन शॉर्ट मारतना दिसलो. तांणी 35 बॉलांनी अर्द शेंकड्याची भागिदारी केली.

संजून 41 बॉलांनी दोन चवके आनी चार सक्यांचे मजतीन 51 धांवड्यांची खेळी केली. मुखेली पांड्या आनी गिल हे जोडयेक धांवांची गती राखपाक जमली ना. विंडीजाच्या बॉलरांनी बरी बॉलींग घाली. ह्या चेपणाखाला गिल शेंकड्याच्या हुमऱ्यार आसतना कॅच दिवन तंबूंत परतलो. ताणें 92 बॉलांनी 11 चवक्यांचे मजतीन 85 धांवड्यो केल्यो.

ते उपरांत हार्दीक आनी सुर्या हांणी 49 बॉलांनी 65 धांवड्यांची खेळी केली. सुर्या 30 बॉलांनी 35 धांवड्यो करून बाद जालो. हार्दीकान 45 बॉलांनी वन डेतलो 10वो अर्द शेंकडो पुर्ण केलो. ताणें 52 बॉलांनी चार चवके आनी पांच सक्यांचे मजतीन नाबाद 70 धांवड्यो केल्यो.