भांगरभूंय | प्रतिनिधी
साई सुदर्शनाचो जबरदस्त शेंकडो आनी ताणें वॉशिंग्टन सुंदरा वांगडा केल्ली नाबाद शेंकड्याची भागिदारी आनी मोहीत रेडकारान म्हत्वाच्या खिणाक घेतिल्ल्या तीन विकेटींच्या नेटार दक्षीण विभागान देवधर करंड क्रिकेट लडतींत मध्य विभाग पंगडाक 7 विकेटींनी हारयलो.
पुडुचेरी हांगा चालू आशिल्ले हे सर्तींत दक्षीण विभागान सेगीत पांचव्या जैताची नोंद केली. आतां देवधर करंड वस्तादपणा खातीर दक्षीण विभाग आनी पुर्व विभाग हांचे मदीं 3 ऑगस्टाक फायनल जातली.
पुडुचेरीच्या सिचेम स्टेडियमाचेर जाल्ले हे लडतींत मध्य विभागान टॉस जिखून पयलीं बॅटींग केली आनी निर्धारीत 50 ओव्हरींनी 9 विकेटी वगडावन 261 धांवड्यो केल्यो. तांच्या यश दुबेन 99 बॉलांनी 77 धांवड्यो केल्यो. शिवम चौधरीन 34 धांवड्यांचें योगदान दिलें. 3 बाद 167 अशे बरे स्थितींत आशिल्ल्या मध्य विभागाची मदली फळी देवधर ट्रॉफींत पदार्पण करपी मोहीत रेडकारान गडगडावन उडयली. ताणें पयलीं आयपीएल स्टार रिंकू सिंगाक एलबीडब्ल्यू बाद केलो. मुखेली व्यंकटेश अय्यराची स्वताचे बॉलिंगेचेर कॅच धरली आनी उपरांत कर्ण शर्माक तंबूंत धाडलो.
दक्षीण विभागा खातीर अर्जुन तेंडुलकरान 65 धांवड्यांनी 2, जाल्यार व्ही कौशिकान 15 धांवड्यांनी 2 विकेटी घेतल्यो. शिवम मावी आनी सारांश जैनान सातवे विकेटी खातीर केल्ले 55 धांवड्यांचे भागिदारीक लागून मध्य विभागाक 250च्या मुखार वचप शक्य जालें.
मोखीचो फाटलाव करपी दक्षीण विभागान 48.2 ओव्हरींनी 3 विकेटी वगडावन 262 धांवड्यो करून जैत जोडलें. सुदर्शन आनी वॉशिंग्टन हाणें चवथे विकेटी खातीर नाबाद 116 धांवड्यांची खेळी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
