भांगरभूंय | प्रतिनिधी
भांगरभूंय । प्रतिनिधी
पणजी : दर्यादेगे सावन 5 किमि मेरेन पर्स सेन जाळ्याच्या वापराचेर बंदी आसा, तली लेगीत ताचो वापर जाता, हें विधानसभेंत दिल्ले जापे वयल्यान स्पश्ट जालां. पर्स सेन जाळ्याक लागून तार्ले, कापशाळीं आनी बांगुल्ले ह्या जाळ्यांत शिरकतात. ताका लागून पारंपरीक नुस्तेमाऱ्यां तारले, कापसादी , ल्हान बांगडे मेळा नात.
आमदार वेंझी व्हिएगस हांणी हो प्रस्न केल्लो. पर्स सेन जाळे वापरिल्ले खातीर फाटल्या 18 म्हयन्यांत 30 यांत्रिकी व्हड्याक तालांव दिला. नुस्तेमारी खात्याचे मंत्री नीळकंठ हळर्णकार हांणी ही लेखी म्हायती दिल्या.
ल्हान न्हंयो तशेंच दर्यादेगे सावन 5 किमि मेरेन पर्स सेन जाळे वापरपाचेर बंदी आसा. पर्स सेन जाळ्याचो वापर यांत्रिकी व्हड्याकारां कडल्यान जाता, अश्यो कागाळी खात्या कडेन आयल्यात. तार्ले, कापशाळीं तशेंच सगळें ल्हान आकाराचें नुस्तें ह्या जाळ्यांत फारावता. तशेंच ह्या जाळ्याचो ल्हान नुस्त्यांचेर वायट परिणाम जाता, असो नुस्तेमाऱ्यांचो दावो आसा. वार्काच्या एका व्हड्याकाराक 20 हजार 400 रुपयांचो तालांव दिला. हेरांक 5 हजार रुपया मेरेन तालांव दिला.
तार्ले, कापशाळीं हांचे प्रमाण उणें जायत आसा. परंपरीक नुस्तेमार रापोण तशेंच साद्या जाळ्यांचो वापर नुस्तेमारी खातीर करतात. नुस्तेमारी मंत्र्यांनी दिल्ले म्हायती प्रमाण मुरगांव म्हालांत सगळ्यांत चड 348 नुस्तेमारी व्हडीं आसात. ताच्या फाटोफाट बार्देशांत 327, तिसवाडींत 237, काणकोणां 232, साश्ट म्हालांत 149 आनी पेडण्यां 137 व्हडीं आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
