गंडभैरांव…लोंढो भिकाजी

भांगरभूंय | प्रतिनिधी

एक अणभव – 18

हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो.

– लेखक

हांव  तांकां विमानतळार सोडपाक  वता वता  आमगेल्या सुप्रीम कोर्टा कडे फक्त  बोट दाखयलें. हे वटेन  गंडभैरांवान बिल्डरां कडेन  विनवण्यो करीत मेन्टेनन्स कंत्राट तीन म्हयने वाडोवन घेतिल्ले. (आतां मुखार….)

गंडभैरांवान  हे कंत्राट वाडोवन घेतना स्वताक तोखेत आनी आपल्याक  सगलें श्रेय घेत,  फाटल्या  म्हणजे  आमगेल्या  समितीचेर  शितोंडे  उडयत, आमी कसो  अकस्मात राजीनामो दिलो, आमी  कशी वाट लायली हाची काणी सांगत,  कसलीच नोंद करून आमी  दवरुंकना, बिल्डरा कडल्यान जागे संबंदी दस्तावेज घेवंक नात अशे कितलेशेच आरोप आमचेर लायत आपणे  हो प्राज फक्त दोन आठवड्यांच्या वेळा भितर  वाडोवन घेतिल्ल्याचे भपकेय मारत  ई- मेल धाडिल्ले. आसा तोच सेटअप थोडो मुखार धुकळप हें  कुस्कुटभर काम, पूण तें करून मणभर बॉब  ताणें  मारिल्ली.  आमचेर निंदा, टीका, करपाची एकूय संद ताणें  आतां मेरेन सोडूंक नाशिल्ली.  प्रत्येक गोष्ट  कागदा फोलीरच  नोंद करून दवरची म्हणून नासता, इलेक्ट्रॉनिक पद्धतीन खुपशे  रेकॉर्ड दवरपाक शकतात. आमी पेपर छापपाचे टाळताले, गरज नाशिल्लो फिजूल खर्च आमी कारनाशिल्ले. आमच्या कॉम्पुटरार सगळ्यो सॉफ्ट कॉपी आसताल्यो.  हस्तांतरण करतनाय आमी तागेल्या वांगड्यांक सांगिल्लें की आमी दिला  त्याभायर  तुमका  कितेंय जाय जाल्यार आमचे कडेन सॉफ्ट कॉपी विचारात आनी आमी त्यो ई- मेलार  धाडतात. पूण आमका कितेंय विचारूंक गंडभैरांवालो अहंकार आड येतालो. ही  सगलें बिल्डरा संबंदी  देवाण घेवाण,  बिल्डरा कडल्यान जेन्ना मेंटेनन्स आमी ताब्यात घेतलें  तेन्ना ह्यो  गोश्टी करपाच्यो आमी थारायिल्लें, आमचे तशे लिसरय  तयार दवरिल्ले. रेकॉर्ड वाचतल्याक समजता, समजून घेवपाची इत्सा लागता ती गंडभैरावा कडेन नाशिल्ली.  खेत्या भशेन आपले तेंच तांबडे करूंक गंडभैरांव समजुनूय समजल्या नाशिल्याचो आव हाडटालो. ताका कितलोय समजावपाचो यत्न केल्यार आमकां  उमथ्या कोळशार उदक  घाल्या भशेन जातालें. हस्तांतरण   करतना  तर  हागेल्या  समितीन  वेवस्थित  सह्यो केल्ल्यो  हाचो  ताका  विसर  पडिल्लो.   रजिस्ट्रारान जेन्ना वेंचणुकेची फायल केश मुखार व्हरूंक हातांत घेतली तेन्नाच तर आमी राजीनामो दिल्लो.  एके वटेन तर गंडभैरांवान रजिस्ट्राराक कागाळी करून आमका बडतर्फ करचे बी म्हणून मागिल्लें आनी दुसरे वाटेन अकस्मात राजिनामो दिलो म्हणून बॉब मारतालो. आमी सोसायटीक उबंत तर उडोवंक नाशिल्ली.    आमचेर टीकेची झोड तो  काडतालो.  गंडभैरावालो कुलो खरजतालो आनी तो माथे खरपीतालो. आपली खाज तो आमचेर तिडक काडून भागयतालो.  

बिल्डरा कडे तीन म्हयन्यान कंत्राट नुतनीकरण करून जातगेर  परत एकदा तो  ताचे फुडलो प्राज वाडोवपाक फाटल्यान लागिल्लो. जीव खायत रावतगेर बिल्डर सायबान ताका गिरगोली कडेन  धाडलो आनी सायबालें नांव सांगून सांकडे घालतगेर गिरगोलीन ताका  लोंढो भिकाजीलो संदर्भ दिलो. लोंढो भिकाजी एक कमिशन एजंट.  बारीक सारीक कंत्राटां घेतालो.  खरो तो भिकाजी, पूण लोक  ताका  लोंढो भिकाजी म्हूण  वळखातले. घडये ताचे कडे लोंढो (रोड रोलर) आशिल्लो म्हणून जावये.  आसा त्या सांच्यांतल्यान भायर सरपाक  गंडभैरांवाचीय  कशीच तयारी जायनाशिल्ली. आतां चलतां  तशीच देखभाल करूंक लोंढो भिकाजी मुखार आयिल्लो.  लोंढो भिकाजीक हें काम मेळप म्हळ्यार कुड्डो मागता एक दोळो आनी देव दिता दोन अशें जाल्लें. ताका सॉर्त लागिल्ली. लोंढो भिकाजी देवा कडे डायरेक्ट उलोवपी  मनशाल्या पंगडांतलो आशिल्ल्यान गिरगोल ताका सांबाळून घेतालो. गिरगोलीन बी आपलो डाव सादिल्लो.  गंडभैरांवालोय  प्रस्न  सुटावो केल्लो.  

हे सगलें करतना  सोसायटीक वेवस्थापकाचें काम केल्लो  पंढरी आनी जे कामगार जे लोंढो भिकाजीक जाय, ते ताका दिवपाचें बिल्डरानूय मान्य केल्ले. गंडभैरांव लोंढो भिकाजीच्या एकदम सुवादीन जाल्लो, लोंढो भिकाजीलो म्हणयारो जाल्लो. गंडभैरावाक म्हयन्याक एक चेक दिवचो सोडल्यार आनी कांयच त्रास घेवपाचो नाशिल्लो. लोंढो भिकाजीली फांटभूंय, तागेलो फाटलो इतिहास वा म्हायती घेवपाचे भानगडीक  पडनासतना ताका उत्सवमूर्ती करून  कंत्राट दिवपाचें गंडभैरांवान मनात थारायिल्लें. ताका वयर वयर करपाची, ताची तुस्त करपाची संद ताणें खंयच सोडूंक नाशिल्ली. गिरगोलीन तारीफ करतगेर तो  सर्वगुण संपन्न आसूंक जाय असो समज  करून घेवन  लोंढो भिकाजीक टर्नकी  कॉन्ट्रॅक्टर  म्हूण  फुडें काढडपाची तयारी  गंडभैरांवान केली. लोंढो  भिकाजीक  तो मेरेन  खंयच्याच हाऊसिंग   सोसायटीची  देखभाल  करपाचो अणभव  नाशिल्लो. सगळ्यांत सोपे पद्धतीन गिरगोली कडल्यान  आयिल्ले उपाय वो इलाज घेऊन  गंडभैरांवान  काढली जीभ लायली ताळ्याक  केल्ले.  आतां ह्या कंत्राटाचो प्रेस आनी  मोल कशें करप हाचें थोडें विस्तारण सायबाल्या  ऑफिसांतल्यान घेवन सगलें मसुदे, बारीक सारीक गजाली लोंढो भिकाजीक  गंडभैरांवान समजायिल्ल्यो. लोंढो भिकाजी  चार आण्याचें काम करून  बारा आणे उखलपी. आनी तेच पद्दतीची कार्यनीत ताणें गंडभैरांवा कडे  वापरपाचीय  थारायिल्लें. हांवूय ह्याच गांवांत किल्लल्लो आशिल्ल्यान चार लोका कडेन चवकशी करतगेर लोंढो भिकाजी बद्दलची वेवस्थित  खबर  म्हाकाय  मेळिल्ली.   

गंडभैरांवाक पयशाचो मद आशिल्लो,   आयते येणावळीचेर बसून खावपी गंडभैरांव सुण्याक जेवण  दिवंचे सोडल्यार, आनीक कितेंय दुसरें बरें काम केल्लें  केन्नाच कोणे  पळोवंक नाशिल्लें. ताच्या नांवार झगडीं, केंस्तावांच चड आशिल्लीं.  वाणपण, वाटाघाटी करप हें ताका आपले प्रतिश्टेक बादीकार जावपी अशें दिसतालें. आयली ती कोटेशना ताणें जशाक तशीं घेतिल्ली.  ताका हेंवूय खबर आशिल्लें की  संकुलांतले चडशे लोक परदेशांत काम करून देशेंत  येणावळ जोडपी आसात आनी बारिकसाणेन कोण हाचेर चिकित्सा करपाना. हे सगळे फाटभुंयेचेर ताका  आतां वांगड्याच्या  तोंडाक पाना  पुसप व्हडलें कठीण दिसनाशिल्लें. स्वताक अर्थीक तज्ज्ञ आनी अर्थशास्त्रज्ञ म्हणून मिरोवपी  गंडभैरांवान वांगड्यांक अर्थशास्त्राचे सिद्धांत आनी चलन फुगवट्याची हूल दित टर्नकी कंत्राटदारच्या  नांवान हो कमिशन एजंट, लोंढो भिकाजी उबो केल्लो.    

आतां ताका स्पेशेल जनरल बॉडी मीटिंग घेऊन  सगलें विधिवत रूप  दिवन प्रत्यक्षांत हाडपाचें आशिल्लें.  लोंढो भिकाजीकूच कंत्राट दिवपाचें ताणें तर  थारायिल्लें आनी तशी शिफारस बी ताणें बरयिल्ली. टेंडर  फ्लोट करा म्हणून आमच्या हड्ड्यार बसून बॉब मारत  बसपी गंडभैरांवान कितें फ्लोट केलें ते आमकां समजलेंना, पूण   खंयच्यान  तरी  ताणें चार- पांच कोटेशना एकठांय केल्ली. तांतुतले एक व्हडलें नाव आशिल्लें, जांणी  सरकार दरबारी  हातमेळोवणी करून फॅसिलीटीस मॅनॅजमेन्ट सर्विसेस म्हणत  कितलेशेच  कोटी रुपयाचें घोटाळे केल्ले. थंय सरकारपक्षी मंत्री आशिल्लो तर हेवटेन गंडभैरांव आमगेल्या सोसायटीचो मुखेलमंत्री जाल्ले भशेन वागतालो. आता आमगेल्या  ह्या लहानश्या सोसायटीक कोट्यांनी जरी नासलो तरी लाखांनी दुडू करपाक लोंढो भिकाजीक खूप वाव आसलो, आनी गंडभैरांव फॅसिलिटेटर म्हूणन ताचे फाटल्यान खंबीर उबो आशिल्लो.

गंडभैरांव दुडवांच्या फाटल्यान ना आनी लाखाक तो मीठ घालना असो आमचो समज आशिल्लो. घडयेक आसत गंडभैरांव आपल्या हलगर्जीपणान सगळ्या वांगड्या कुस्तार लोंढो भिकाजीक दुडू करपाक मदत करतालो किंवा आपलो अहंकाराक थंड करपा खातीर हीं नाडपेंन्ना करतालो. आमकां दिसतालें की  गंडभैरांव गोडबंगालाक घुसपल्लो.  गंडभैरांव  आनी लोंढो भिकाजी  हांचे भितर  कितें  समजोता  जाल्लो हाचो वास आमकां  लागूं नाशिल्लो आनी खंयच्याय वांगड्याक  पडुनय   गेल्लें नासलें. (फुडें चलता…)