भांगरभूंय | प्रतिनिधी
खबरां संस्था
केनिंगस्टनः भारत आनी वेस्ट इंडिज पंगडां मदी तीन वन-डे मॅचीच्या दुसरे मॅचींत वेस्ट इंडियान भारताक 6 विकेटींनी हारयलें. भारतीय पंगडान पयलीं खेळून 40.5 ओव्हरींत 181 धांवड्यो केल्या. वेस्ट इंडिजान 36.4 ओव्हरींत 4 आवट 182 धांवड्यो करुन जैत मेळयलें. ताका लागून माळेंत आतां 1-1 बरोबोरी जाल्या. हे मॅचींत कॅप्टन रोहीत शर्मा आनी विराट कोहली खेळ्ळें ना. ताचो फायदो वेस्ट इंडिज पंगडान घेतलो. हे मॅचींच भारताच्या तरणाटो बॅट्समन शुभमन गिलान एक खासा विक्रम केलो.
वेस्ट इंडिजा दुसरे वन-डेंत गिलान 34 धांवड्यो केल्यो. ताणे हे खेळीच्या नेटार पाकिस्तानाचो कॅप्टन बाबर आझमाक फाटीं उडोवन वन-डे क्रिकेटींत विश्व विक्रम केलो. गिल आनी पयल्या 36 डावां उपरांत वन-डेंत सगल्यांत चड धांवड्यो करपी बॅट्समन थारला. गिलान 40 बॉलांत 5 चौक्यांनी 34 धांवड्यो केल्यो. 26 डावांत ताच्या नांवार आतां 1352 धांवड्यो जाल्यात. सगल्यांत चड धांवड्यो केल्ल्याचे क्रमवारींत तो आतां पयले सुवातर आयला. पयल्या 26 डावांत 1322 धांवड्यो करपी बाबर आझमाक ताणे फाटीं उडयलें.
वन-डेच्या पयल्या 25 डावांत सगल्यांत चड धांवड्यो करपी पांच खेळगडे आसत. शुभमन गिल – 1252 धांवड्यो. बाबर आझम- 1322 धांवड्यो, जोनाथन ट्रॉट- 1303, फखर आझम- 1275 धांवड्यो आनी रॅशी व्हॅन डर हुसेन- 1267 धांवड्यो. शुभमनान 26 डावांत 61.45चे सरासरीन 1352 धांवड्यो केल्ल्यात. तातूंत 4 शेंकडे आनी 5 अर्द शेंकडे आसात. वन-डे क्रिकेटींतली तागल्यो 208 सगल्यांत चड धांवड्यो आसात. विशेश म्हणल्यार तो 4 फावट नाबाद रावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
