भांगरभूंय | प्रतिनिधी
खेळां आनी युवा वेव्हार संचालनालया वतीन घेतिल्ले 19 वर्सां पिराये सकयले राज्य पांवड्या वयले टेबल टॅनीस सर्तींत चल्यांच्या गटांत सां जुझे दी आरियलच्या किंग्स स्कुलाच्या पंगडान आनी चलयांच्या गटांत मडगांवच्या लॉयला उच्च माध्यमीक विद्यालयाच्या पंगडान वस्तादपण जोडलें. सर्तीच्यो फायनली कांपाला वयल्या इन्डोर स्टेडियमाचेर जाल्ल्यो.
चलयांच्या गटांतले फायनलींत लॉयला उच्च माध्यमीक विद्यालयान कुजिराच्या मुष्ठिफंड उच्च माध्यमीक विद्यालयाक उमळशीक वाडोवपी मॅचींत 3-2 अशा फरकान हारयलें. जैतिवंत पंगडांत शनाया साल्ढाणा, जीना काब्राल, रिया कुडचडकार, उर्वी सुर्लकार, ईशा बार्रेटो हांचो आस्पाव आशिल्लो. पंगडाक शारिरीक शिक्षण शिक्षक सुरेंद्र देसाय हांचें मार्गदर्शन लाबिल्लें.
चल्यांच्या गटांतले फायनलींत किंग्स हायस्कुलान पणजीच्या डॉन बॉस्को उच्च माध्यमीक विद्यालयाक 3-0 असो हारयलें. जैतिवंत पंगडांत अगस्त्य मोटवानी, डॅव्ह डायस, झियान विराणी, आरव अय्यर, वंश पटेल ह्या खेळगड्यांचो आस्पाव आशिल्लो. पंगडाक शारिरीक शिक्षण शिक्षक सगूण गांवकार हांचें मार्गदर्शन लाबिल्लें.
इनामां भेटवण सुवाळ्याक बोर्डा सरकारी म्हाविद्यालयाचे शारिरीक शिक्षण संचालक अॅरन परेरा, दिवचलच्या नारायण झांटये म्हाविद्यालयाचे शारिरीक शिक्षण संचालक सत्यवान हरमलकार, हरमलच्या गणपत पार्सेंकार म्हाविद्यालयाचे शारिरीक शिक्षण संचालक अनिकेत केरकार, खेळां खात्याचे राज्य खेळां आयोजक अनंत सावळ, तंत्रीक अधिकारी विष्णू कोलवाळकार आनी जयवंत उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
