भांगरभूंय | प्रतिनिधी
जबाबदारीची वाडटी रांग.. तारेवेली कसरत कशी करूं सांग? हो विशय घेवन हांवें ‘चित्रंगी’ मेळाव्यांत उलोवचें अशी विनंती आठ- धा वर्सां फाटी काणकोणां जाल्ल्या ‘चित्रंगी’ मेळाव्या वेळार म्हाका आताचें कोंकणी भाशा मंडळाचें अध्यक्ष अन्वेषा सिंगबाळान केल्ली. भाशणाक लागुन मुद्दे बी तयार केले, पूण काय कारणांक लागून हांव थंय पावलें ना. कांय दिसां फाटीं ‘चित्रंगी’ व्हाट्सअॅप गृपाचेर ह्याच विशयाचेर भासाभास चलताली तेन्ना परत एकदां तेच मुद्दे चर्चेक आयले आनी लक्षांत आयलें, एक दशक उलटलें तरी व्हडलो बदल जावंक ना, ना परिस्थीतींत, ना मानसिकतेंत.
आमचे भितरल्या चडश्या बायलांक अशीच जबाबदारीची वाडटी रांग सांबाळत, सरये वेली कसरत करत जगचें पडटा. पूण हे करता आसतना थोडें आपल्या भितर बागोवन पळोवप, थोडें अंतर्मुख जावप हें सगळ्यांत गरजेचें! पयली गजाल – सरये वेली कसरत कित्याक करूं सांग? अशें दुसऱ्याक कित्याक विचारप? आपणे आपल्याक पयलीं विचारप. कित्याक करता हांव सरये वेली कसरत? बारीक पळोवंक वचत जाल्यार हातूंतल्यो कितल्यो गजाली हांवें स्वताच म्हजेर लादून घेतल्यात. हातूंतल्यो कितल्यो गजाली हांवें ठाम रावन, जाच्यो ताचे कडल्यान करुन घेवंक जाता? आपणे दाखयल्ल्या अधिकचे मायेक लागून आनी बरें म्हणून घेवपाच्या हावेसाक लागून ह्या रांकेंतल्यो कितल्यो गजाली आंगार पडल्यात? कामाची योग्य वांटणी करत आनी ते विशीं ठाम रावत जाल्यार म्हज्यावेल्या जबाबदारीची रांक कमी जावं येता काय? स्वभिमुख जावन ह्या गजालींची चांचपणी करप गरजेचें.
म्हजे वळखीची अशीं कितलीशींच जाणां आसात, जांच्या घरांत धा तरांचे जिन्नस शिजतात. कितें तर घोवाक तीखट जाय, धुवेक गोडच जाय, पुताचें नुस्त्या शिवाय पान हालना आनी हें इतलें सगलें करुनय हाचो जिचेर जीव ती मेथयेची भाजी मात घरांत केन्नाच शिजना, कारण ती घरांत हेर कोणाक आवडना. थोडी अशींय आसात जी ब्रश मारल्या बगर कपडे निवळूच जायनात अशें जाहीर करत कपड्यांचो ढीग घश्टीत वरांची वरां वाट लायतात. एखाद्या कॉलरीचेर ब्रश मारप हांव समजु शकतां पूण वॉशिंग मशीनां सारकी सोय आसतना हीं असलीं कामां आंगार ओडून घेवप्यांक कितें म्हणप? बेठें शीत आवडटा, आपल्याक न्ही आं, घरांतल्या हेर कोणाक तरी म्हणून कुकरान शीत शिजय नासतना वाळणीचेर शीत वाळपीय आसात!
आपणे थोडे खंबीर रावन, आपुणूय मनीस आनी आपल्योय कांय मर्यादा आसतात हाची जाणीव दवरून घरांतल्या प्रत्येकान वागूंक जाय हो धडो उतरांनी आनी करण्यांनी घालून दिवचोच पडटलो. सुरवातीकूच ह्यो गजाली स्पश्ट करत जाल्यार खुबश्यो गोश्टी आपशींच जाग्यार पडूंक शकतात. आनी आपली घरचीं, घोव, भुरगीं आपले दुस्मान काय न्ही. आपूण जेन्ना पयले फावट खंबीर रावन तांची जबाबदारी तांका निभोवंक लायतलीं तेन्ना एखादरे दिसतुय तांकां वायट. पूण कांय तेंपान आंगवळणी पडटकूच ताचो वेगळो त्रास जावचो ना. तांकांय बी आनी तुकाय बी. आनी सगळ्यांत म्हत्वाचें म्हणल्यार अशें स्वावलंबन आसप तांच्या, चड करून भुरग्यांच्या फुडारा पासत फायद्याचेच जातलें. आनी तुमकांय तुमची स्पेस मेळटली. आनी तुमी स्वता पसत आनी घरा पासतयबी क्वालिटी टायम दिवंक शकतलीं.
जबाबदारीची रांग वाडोवपाक आनीक एक घटक जबाबदार आसता. देव – धर्म, लग्नां आनी हेर विधी आनी कार्यां. हें जाल्यार करुंकच जाय, तें जाल्यार शास्त्रा प्रमाण जावपाकूच जाय अशें आपणेंय म्हणप आनी दुसऱ्या कडल्यानूय आयकून घेवप. आनी मागीर वाजेत जाता वा जायना म्हणनासतना तें करप. कितें अर्थ आसा हाका? अमक्या सणांक अमकीं शास्त्रां, तमके खावपाचे नग जावपाकूच जाय म्हूण पडत मरत ते करप. आहेर पावोवपाक जाय म्हणून दनपारच्या कडार आनी तेंय बी मदले दिसा लग्न दवरलां म्हूण लग्न जावप्याक गाळी घालत वचप. ह्या आनी असल्या गजालींक जबाबदारीच्या वळेरींतल्यान कट मारूंक जाता जाल्यारूय पळोवंक जायच.
जबाबदारीच्या रांगेतल्या जबाबदारींची एक वळेरी वा लिस्ट करपाची संवय घालची. तातूंतली कितली कामां घरच्या हेर सदस्यां कडल्यान, दुसऱ्यां कडल्यान करून घेवंक जाता, डेलिगेट करपाक जाता, कितलीं आपणे ‘आ बैल मुझे मार’ करत आंगार ओडून घेतल्यांत, कितलीं कामां जबाबदारी म्हूण आपणें करपाक जाय, कितलीं कामां करना जाल्यार कांयच फरक पडपाचो ना तांची वर्गवारी केल्यार खूबच फायद्याचें जातलें.
आयज आमचे मदतीक कितलींशीच वेगवेगळे भाशेची यंत्रां आसात. इंटरनेटाच्या माध्यमांतल्यान तांचे विशीं म्हायती करून घेत जाल्यार दिसपट्टीची कितलींशींच कामां कमी जावं शकतात. देखीक परवडटा जाल्यार वॉशिंग मशीना बरोबर ड्रायरुय घेतलो जाल्यार कपडे भायर सुकत घालप, काडप हातूंतलो वेळ वाचतलो, चड करून पावसांत. इलेक्ट्रिक कटर, फूड प्रोसेसर हांचो वापर करून वेळ वाटोवं येता. मायक्रोवेव्ह घेवन कुक अँड सर्व्ह आयदनां वापरलीं जाल्यार घासपाच्या आयदनांची रास कमी करपाक येता. परवडटा जाल्यार डिशवॉशर घेवचो. खूब मदत जाता आनी वेळय वाचता. एखादो दुसरो सुबेज भांगराचो जिनस करचे परस ह्या मशीनांनी गुंतवणुक करत जाल्यार खरेंच फरक पडूं येता. आता तर ऑनलायन खरेदी, लाँड्री, बारीक खरेदी पासत स्विगी जीनी सारके पर्यायुय सोंपेपणान उपलब्ध आसात. सणाचो फराळ खंयच्याय आपमजत गटा कडल्यान वा बारीक धंदो करून आपल्या पांयार उबो रावूंक सोदतल्या कडल्यान करून घेवं येता. जबाबदारीचे रांगेचे नियोजन आनी ती हाताळपाचे विचारपूर्वक आयोजन केले जाल्यार तुमची खरशेवणी कमी जातली.
आनीक एक गजाल जी म्हाका स्वताक खूप फायद्याची जाल्या ती म्हटल्यार लिस्ट दवरून वेळेचें नियोजन करप. कांय वर्सां पयलीं हांव आतां आसा तितलें नियोजनबद्ध काम करनाशिल्लें. सदांच धांवपळीत उरतालें. म्हजी रोखडी करपाची (शॉर्ट टर्म) आणि चड वेळ लागतलो अशीं (लॉंग टर्म ) कामांची, घरगुती आनी ऑफिसाच्या कामाची अशीं वेगवेगळी चेकलिस्टां (यादयो) आसात. जांचो हांव दिसपट्टो आढावो घेता. मुद्दाम करून पळयात. हाचो खूब फायदो जाताच जाता. कसलीं कसलीं कामां करचीं आसात तांचे लिस्ट पेपरार वा मोबायलार दवरप. जशें काम जालें तशें वळेरेंतल्यान कट करप. सगळे तरेच्या मोबायलांचेर अशो स्व आयोजनाच्यो (स्वताक ऑर्गनायज) करपा पासतच्यो सुविधा आसात. त्यो सोदुन काडून तांचो वापर करात.
आनीक एक गजाल, आमगेर बाये दुसऱ्यान केल्लें कोता येना अशें म्हणत. आपुणूच सगळें करतलें अशें म्हणत, सगळेंच आंगार ओडून घेनासतना शक्य आसलें जाल्यार थोडीं कामां तरी कामाक मनीस दवरून करून घेवचीं. म्हजी एक इश्टीण म्हणटा तशी ‘आपल्याक जायती आपली स्पेस आपणे दुसरे बायले कडल्यान विकत घेवप’. कामाक येतल्यांक तांच्या कामाचो योग्य मोबदलो दिवन, तांचे आपल्या जिवितांतले म्हत्व वळखून, तांची कदर करत जाल्यार तुमच्या बरोबर तांच्याय आयुश्यांत सकारात्मक फरक जातलोच जातलो.
घे म्हणून जबाबदाऱ्यांचे वजें तकलेर घेवन सरये वयली कसरत विटून आनी नाकापुरो जावन करत रावशीत जाल्यार आपल्या सुंदर जिविताची उबगण करुन उडयतले. चल उठ इश्टीणी आनी लाग कामाक, कातर घेवन जबाबदारीची रांग स्लीम आनी ट्रिम करपाक… ऑल द बेस्ट!
संगीता नायक
8805162600
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
