शेतकार जोडटा वर्साक 2 कोटी

भांगरभूंय | प्रतिनिधी

भांगरभूंय । खबरां संस्था

जयपूरः देशांत वेगवेगळ्या प्रकाराचे शेतकार आसात, जे वखदी वनस्पतींची लागवड करून खूब पयशे जोडटात. असोच एक शेतकार, जो सरकारी नोकरी सोडून गांवांत येवन एलोवेरा (कांटे कुंवर, कांटेकोर, कोरफड) लागवड करुन शेतकार म्हणून काम करपाक लागलो. हरीश धनदेव अशें ताचें नांव. हरीश हो राजस्थानी. पयलीं तो सरकारी अभियंतो आशिल्लो. जैसलमेर नगरपालिकेंत तो कामाक आसलो. पूण उपरांत ताणें नोकरी सोडून गांवांत येवन एलोवेराची लागवड करपाक सुरवात केली. हाका लागून ताचें जिवीत बदल्ले. आयज तो एलोवेरा विकून करोडपती जाला.
एक दीस तो दिल्लींतल्या शेतकी प्रदर्शनाक गेल्लो. शेतकामाचें सपन पुराय करपा खातीर ताणें नोकरेचो राजिनामो दिलो. उपरांत जैसलमेरांतल्या आपल्या गांवांत येतकच ताणें 120 एकर जमनीचेर एलोवेराची लागवड करपाक सुरवात केली. राजस्थानांतले चडशे शेतकार बाजरी, मको आनी गंव अश्या पारंपरीक पिकांची लागवड करतात. पूण हरीश हाणें हाचेभायर हेर वखदी पिकांची लागवड करपाचें थारायलें. आयज तो फकत शेतकार न्हय तर एलोवेराची लागवड करून उद्देजक जाला.
विशेश गजाल म्हळ्यार हरीश हो बार्बी डेनिस एलोवेरा ही एकूच जातीची लागवड करता. हाँगकाँग, ब्राझील आनी अमेरिकेंत हे जातीक खूब मागणी आसा. बार्बी डेनिस एलोवेराचो वापर लक्झरी कॉस्मेटिक्स उत्पादनांत कच्चो म्हाल म्हणून करतात. हाका लागून वेपारी ताच्या शेतांत पिकयल्लीं एलोवेराची पिकां विकतीं घेतात.
हरीशान जैसलमेरसे जिल्ह्यांतच ‘नॅचरलो अॅग्रो’ नांवाची कंपनी सुरू केल्या. हरीश हाणें 80 हजार एलोवेराची झाडां घेवन शेती करपाक सुरवात केली. आतां ताच्या शेतांत लाखांनी एलोवेराचीं झाडां रोयल्यात. हरीश हो पतंजलीचो अधिकृत एलोवेरा पुरवणदार. आतां हरीश ग्लोबल ग्रुप चलयता आनी संवसारभर एलोवेरा निर्यात करता. ताची वर्सुकी उलाढाल 2- 3 कोटी रुपया आसा.