भाऊची 50 वी पुण्यतीथ सरकारान पाळची
भांगरभूंय | प्रतिनिधी
पणजी: गोंयचे पयले मुख्यमंत्री भाऊसायब बांदोडकार हांची 50 वी पुण्यतीथ 12 ऑगस्ट दिसा पाळटले. ह्या निमतान सरकारी पांवड्यार ही पुण्यतीथ गोंय सरकारान पाळची अशी आदले केंद्रीय मंत्री अॅड. रमाकांत खलप हांणी केल्ले मागणेक आपूण पुरायेन फाटबळ दिता, अशें प्राचार्य सुभाष भास्कर वेलिंगकार हांणी सांगलें.
मिरामार आशिल्ले भाऊसायबांचे समाधीक ह्या सरकारान योग्य न्याय दिवचो अशी मागणी वेलिंगकार हांणी केल्या.
12 मार्च आनी 12 ऑगस्ट ह्या दोनूच तिथीं पयलीं भाईसायबांची समाधी नितळ करपाचें काम संबंदीत खातें करता. हे दोनूच दीस समाधी स्थळ लोकां खातीर उक्तें आसता. उरिल्ले बाराय म्हयने हांगा कुलूप आसता. ही सामकी अपमानाची गजाल. हे समाधींतल्यान जावपी उदकाची गळती आजूनय सरकार आडवंक शकलें ना. ही समाधी कोणाची, ते कशे दिसताले, तांची म्हायती दिवपी तक्टे हांगा लावंक ना. तशेंच रातची लेगीत नदरेक भरता असो उजवाड हे समाधी कडेन करूंक ना, अशें वेलींगकार हांणी म्हणलें.
स. मनोहर पर्रिकार हांचे व्हड, विस्तारीत, आधुनीक आनी उजवाडान लख्ख दिसपी समाधी मुखार भाऊसायबांची समाधी फिकी पडटा. फाटल्या कितल्याश्यास वर्सां सावन मागणी करून लेगीत सरकारान ह्या प्रस्ना कडेन लक्ष दिवंक ना, अशें तांणी म्हणलें.
मुख्यमंत्री डॉ. प्रमोद सावंत हांणी हालींच स. भाऊसायबांचे समाधीचें नुतनीकरण आनी सोबितीकरण करतले अशी घोशणा केल्या. फुडल्या म्हयन्यान स. भाऊसायबांची 50 वी पुण्यतिथी आशिल्ल्यान हे संदीचो लाव घेवन मुख्यमंत्र्यान हे येवजणेचो शुभारंभ 12 ऑगस्ट दिसा करपाची मागणी प्राचार्य वेलिंगकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
