भांगरभूंय | प्रतिनिधी
पाद्री भावाचें आयकून कितलेशेच क्रिस्तांव घराब्यांनी नव्यान एकवट जाता. वायट रस्त्याचेर चलतल्या तरणाटे बरे मार्गार आयल्यांत, खूब भुरग्यांक बरे संस्कार फावो जाल्यांत.
क्रिस्तांव धर्म हो अख्या संवसारांत आसा, आनी खूब व्हडा प्रमाणांत आसा. क्रिस्तांव धर्म मोग, शांती आनी देव भिरांतीन जिवीत जियेंवक उलो मारता. तशेंच बारीकसाणेन सांगतलो जाल्यार खूब कितें आसा. पूण दुसरो धर्म ही शिकवण दिनात अशें हांव बिल्कूल म्हणूंक सोदीना. आनी तसो कोणेय गैरसमज करून घेवचोय न्हय, दरेकल्याक आप- आपलो धर्म हो व्हड आसुंकूच जाय.
क्रिस्तांव धर्म कसो चलता. बेश्टोच चलना ? तो बरे तरेन फुडें वच्चे खातीर पाद्रीं भावांचेर जबाबदारी आसता. आनी ती पाळप सोंपें न्हय. हजारांनी लोकांक जिव्या वाचो मोग दिवंक घडये धनया देवान तांकां जायतें बळ दिलां आसत. पाद्रीं, जातलो जाल्यार ताका खेरीत भाशेन देवाचें आपोवणें येवंक जाय. आदल्या काळार कोणागेर तीन चले बी आसल्यार एकल्याक आवय- बापूय पाद्रींपणाचें शिकप करूंक गांवच्या पादविगाराक सांगून सेमिनारींत घालतालीं. आनी थंय भुरग्यांक फावो ते संस्कार आनी शिकप दिवन फुडें वचून नशिबांत आसल्यार तांका पाद्रीपणांचो लोब फावतालो. आयज लेगीत आवय – बापायगेर एकलो चलो आसल्यार लेगीत ताका पाद्रीपणाचें आपोवणें येता. आनी जायतें जाणा त्या आपोवण्यांक मान दितात.
एक पाद्री जातलो जाल्यार पयले सुवातेर आवय- बापायक आपलें काळीज व्हड करचें पडटा. कित्याक आपलो एकलो भुरगो तीं देवाचो मोग शिंपडूंक आमचे खातीर भेटयतात. जायते त्याग करून आपल्या भुरग्यांक शिकोवचें पडटा. जाण्टेपणार आपलो सांगात जातलो म्हूण न्हय? पूण बरो गवळी जावन जेझूच्या पावलांनी फुडें वचून देवाची शिकवण दुसऱ्यांक पर्गटूंक, दुसऱ्यां समजून घेवंक, धर्माचो वावर शांतीकायेन फुडें व्हरूंक. देवाचेर भावार्थ दवरून आनी आमी आमचें जिवीत बरें भशेन जियेंवक आनी आमकां फावो त्या वेळार फावो तसलें मार्गदर्शन करूंक. एक पाद्री आसप म्हणजे आवय- बापायक मान फावता. घरच्यांक, गांवच्यांक आनी सोयऱ्यांक लेगीत अभिमान भोगता. पूण एका पाद्रीचें जिवीत म्हणल्यार कितें काय? दर दिसा सकाळीं पांच वरांचेर उठून आपली तयारी करून ते आमकां मिसाचे भेटेंत देवाचें उतर पर्गट्टात. आमी मानतात त्या जिव्या जेझूचें मास आनी रगत आमकां दिवन सुभागी करतात. मीस सोंपले उपरांत जायतो लोक आपल्या पातकांची नवसरणी करूंक पाद्रींचे लागीं कुमसार जातात. पाद्रींक ताचें पातोक समजता. आनी आपल्या मागणेंतल्यान देवान तांकां भोगसूं म्हूण भावार्थान पातक आदारतल्यां पसत मागतात.
आमचे पासत जेझू खुर्सावेलें मरण स्विकारलें. तेच परी एक पाद्री आमचे पसत देवान धाडिल्ल्या पाद्रीपणाचें आपोवणें स्विकारता. आपलें जिवीत दुस-या पसत भेटयता. आमी एक दीस कोणागेरुय गेल्यार आमकां न्हीद पडना. पूण पाद्री जिवीतभर आपलें घरदार सोडून आमचे पसत जागरणां करता. वेतात थंयसर आपलीं फामील हेंय चिंतून तांकां देवाच्या मळ्यांत वावर करचो पडटा. हें सगळें करतना तांकां जाय तें सोंसचें पडटा. पूण देवान आपल्याक वेंचून काडला. त्या वावराक ते फाट केन्नाच करीनात. जशे परी एक पेटपी मेणवात आमकां उजवाड घालून आपूण काबार जाता. तेच परीं आमचे पसत पाद्री आपली जीण झरयतात.
मनशांचो जल्म जातकच बाप्तीज्मा वरवीं एक पाद्री त्या भुरग्यांक क्रिस्तांव धर्मांत भितर काडटा. क्रिस्तांव धर्मांत आनीक एक वांगडी वाडलो म्हूण जायतो लोक खुशाल जाता. वाड्यांत वा गांवांत वा समुदायांत खोशयेचें वारें पसरता. ते भायर क्रिस्तांव धर्मांत भितर सरिल्ल्या भुरग्यांचें आवय – बापायक पाद्री जायतीं शिकवण दिता. एका पाद्री वरवीं भुरगीं क्रिस्तांव धर्मांतलीं शिकवण शिकोवंक पावतात. काजार जातना पाद्रीच्या आशिर्वादाची गरज, मनीस मेलोय जाल्यार मातयेक लावपाक पाद्री जाय पडटा. पाद्री नासतना क्रिस्तांव धर्मांतलें एकूय फुगसांव जांवक कठीण म्हळ्यार जाता.
शंबरांनी न्हय पूण हजारांनी लोकांचे प्रस्न सुटावे करूंक पाद्री वावुरता, कांय लोक आपलें खाजगी जिविताचे प्रस्नूय घेवन पाद्रीचे लागीं येतात. तेन्ना पाद्री भावाचें आयकून कितलेशेच क्रिस्तांव घराब्यांनी नव्यान एकवट जाता. वायट रस्त्याचेर चलतल्या तरणाटे बरे मार्गार आयल्यांत, खूब भुरग्यांक बरे संस्कार फावो जाल्यांत. तरणाट्या चेडवांक रेस्पेदाची खुणां मेळ्ळ्यांत. शेजारांच्या मदीं जावपी केस्तांवां पालयल्यांत. पाद्रींक लागून आमच्या लोकांचें खूब बरें जाल्लें आसा, खरेंच हें आमचें भाग्य.
आमी मनशां जायते फावटीं चुकतात, तेन्ना पाद्रीं आमकां भोगशितात, पूण आमी कितें करतात ? केन्ना- केन्नाय पाद्रींचेय लागीं चुकीं घडटात आसत पूण फावो तेन्ना आमीय तांकां भोगसणी दिवंक जाय अशें तुमकां दिसना ? एक फावटी न्हय सत्तर फावटी भोगशियात. कित्याक वायट आनी पातोक करप्यांची झडट्टी देव घेता. आमी आनी तुमी कोण? आमी आमचें मनीसपण आनी धर्म शांतीकायेन सांबाळूंया.
ऍडवीन फर्नांडीस,
9850456556
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
