साडे आठ कोटी शेतकारांच्या खात्यांत 2 -2 हजार रुपया
भांगरभूंय | प्रतिनिधी
भांगरभूंय । खबरां संस्था
सीकर : देशांतल्या करोडांनी शेतकारां खातीर आयचो दीस खास आसा. आयज प्रधानमंत्री किसान सन्मान निधी येवजणेचो 14 वो हप्तो शेतकार्यांच्या खात्यांत जमा जाला. कोट्यांनी शेतकार हाची वाट पळयताले. प्रधानमंत्री नरेंद्र मोदी हांणी आयज राजस्थानांतल्यान सीकर हांगा एके कार्यावळींत ही रक्कम वांटली. 8.5 कोटी शेतकारांच्या खात्यांत दरेकी 2000 रुपया पावल्यात.
दर वर्सा शेतकारांक अर्थीक मजत
प्रधानमंत्री किसान येवजणेचो एप्रील ते जुलय 2023 ह्या काळांतलो लाव शेतकारांक दिला. प्रधानमंत्री मोदी हांचे हस्तुकीं ऑनलायन समारंभा वरवीं येवजणेचो 14 वो हप्ता वाटलो. भारत सरकार दरवर्सा शेतकारांक 6000 रुपयांची अर्थीक मजत करता. हे स हजार रुपया चार म्हयन्यांनी दोन हजार अशें करून शेतकारांच्या खात्यांत येतात. आतां मेरेन 13 हप्ते शेतकार्यांच्या खात्यांत जमा जाल्ले. आयज 14 वो हप्तो जमा जाला.
प्रधानमंत्री किसान समृद्धी केंद्रां
प्रधानमंत्री नरेंद्र मोदी हांचे हस्तुकीं आयज 1 लाख 25 हजार प्रधानमंत्री किसान समृद्धी केंद्रांचें लोकार्पण केलें. केंद्र सरकार टप्प्याटप्प्यान देशांतल्या सारें विक्री केंद्रांचें रुपांतर प्रधानमंत्री किसान समृद्धी केंद्रांत करता. ही केंद्रां शेतकारांच्यो विवीध तरेच्यो गरजो पुराय करतलीं आनी शेतकारांक विवीध सामानाची (सारें, बीं, आवतां) पुरवण करतलीं. सरकाराच्या विवीध येवजण्यांची म्हायतीय ह्या केंद्रां वरवीं शेतकारां मेरेन पावतली.
मजगतीं, राजस्थानांतल्या धौलपूर, चित्तोडगड, सिरोही, श्री गंगानगर आनी सीकर हांगां उबारिल्ल्या पांच वैजकी म्हाविद्यालयांचें उक्तावणूय प्रधानमंत्री मोदी हांचे हस्तुकीं जालें. राज्यांत आनीक सात वैजकी म्हाविद्यालयांचो बुन्यादी फातर मोदी हांचे हस्तुकीं बसयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
