रानांक उजो लागून 40 परस चड लोकांक मरण
भांगरभूंय | प्रतिनिधी
भांगरभूंय । खबरां संस्था
अथेन्स : अल्जेरिया, इटली आनी ग्रीस देशांतल्या रानांक लागिल्ल्या उज्यान 40 परस चड लोकांक मरण आयलां. हजारांनी लोकांचें सुरक्षीत सुवातेर स्थलांतर केलां. भूमध्य दर्या वाठारांतल्या इटली, ग्रीस आनी भूमध्य दर्याकक तेंकून आशिल्ल्या अल्जेरिया देशाक उश्णतायेक लागून वणव्याचो फटको बसलो. ग्रीसांतल्या सगळ्या जुव्यांचेर आपत्कालीन स्थिती जाहीर केल्या. कोर्फू आनी एव्हिया ह्या जुव्यांचेर वणवो पातळ्ळा. ताका लागून उश्णताय बरीच वाडिल्ल्यान तापमान 44 अंश सेल्सियस मेरेन वाडलां.
ग्रीसांतल्या रानांक लागिल्लो उजो इटलीतूय पातळ्ळा. देखून सिसिली आनी पुगलिया प्रदेशांतल्या हजारांनी लोकांक घरदार सोडून वच्चें पडलां. वेगान येवपी वार्याक आनी जळपी वनस्पतीक लागून उजो पालोवपी दळांक उजो पालोवपाक बरेच त्रास घेवचे पडटात. सगळ्यांत चड अल्जेरियांत 10 सैनिकां वांगडा 34 जाणांक मरण आयलां. भितरले 23 जाण बेजया ह्या दर्यादेगे वयल्या प्रांतांतले आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
