भांगरभूंय | प्रतिनिधी
दोन खेपेची ऑलिम्पीक पदक जैतिवंत पी व्ही सिंधूचें जपान ओपन बॅडमिंटन सर्तींतलें आव्हान पयलेच फेरयेंत सोंपलें. जाल्यार दादल्यांच्या एकोड्या गटांत लक्ष्य सेन आनी दोट्टी गटांत सात्विक आनी चिराग हे जोडयेन फुडले फेरयेंत सुवात मेळयली.
सिंधूक पयले फेरयेंत चीनाचे झांग यी मान हिच्या कडल्यान 21-12 आनी 21-13 अशा फरकान हार घेवची पडली. मॅच 32 मिनटां मेरेन चल्ली. ह्या म्हयन्याचे सुरवातीक जाल्ले कोरिया ओपन बॅडमिंटन सर्तींत लेगीत सिंधूचें आव्हान पयले फेरयेंत सोंपिल्लें.
संवसारीक क्रमवारींत दुसरे सुवातेर आशिल्ली सात्विक साईराज रंकीरेड्डी आनी चिराग शेट्टी हे भारताचे जोडयेन इंडोनेशियाचे लियो रोली कर्नांडो आनी डॅनिएल मार्टिन हे जोडयेक 21-16, 11-21 आनी 21-13 अशा तीन गेमींनी हारयली. मॅच सुमार एक वर चल्ली.
दादल्यांच्या एकोड्या गटांत लक्ष्य सेनान आपल्याच देशाच्या प्रियांशू राजावताक 21-15, 12-21 आनी 24-22 हारोवन फुडले फेरयेंत सुवात मेळयली. आनीक एके मॅचींत मिथुन मंजुनाथाक चीनाच्या वेंग होंग यांग कडल्यान हार घेवची पडली.
जपान ओपनांतलो प्रभाव पॅरीस ऑलिम्पीकाचे पात्रताय रॅंकिंगेचेर पडपाक शकता. जपान ओपनाचो निकाल पॅरीस ऑलिम्पीकाचे पात्रताय फेरयेचे रॅंकिंगे खातीर मेजतले. बॅडमिंटनाचो पात्रताय विंडो अंदूंच्या एक मे सावन सुरू जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
