भांगरभूंय | प्रतिनिधी
फुटबाॅल हो गोंयचो स्वास. नुस्त्या इतलोच गोंयकारांक फुटबाॅल मोगाचो. केरळ आनी अस्तंत बंगाला भशेन गोंयानूय राष्ट्रीय पांवड्यार जायते खेळगडे दिल्यात. आयजूय दितात. मात, हालींसाराक आमच्या ह्या राज्य खेळा कडेन आडनदर जावपाक लागल्याशी दिसता. फुटबाॅल उदरगत म्हामंडळ आनी गोंय फुटबाॅल संघटणे मदीं समन्यव ना, फुटबाॅल खेळगड्यांक प्रशिक्षण मेळना, प्रशिक्षकांक वेळार पगार मेळना, अशे जायते मुद्दे दोन दिसां पयलीं विधानसभेंत आयले. खेळां मंत्र्यान तातूंत लक्ष घालपाचेंय उतर दिलां. गोंयच्या फुटबाॅल पंगडाची राष्ट्रीय पांवड्या वयल्या सर्तींतली कामगिरी निसरत निसरत सकयल पावल्या. दुखदिणी गजाल म्हणल्यार ज्या राज्यांनी हालींच्या काळांत फुटबाॅल रुजलो, तांणी पसून गोंयाक हारयले. खेळा मंत्र्यांनी सर्तीचे स म्हयने पयलींच फुटबाॅल पंगड वेंचून ताका प्रशिक्षण दिवपाचें उतर दिल्लें. हो विशय लावन धरलो जाल्यार गोंयाक फुटबाॅल मळार आदले दीस दिसूं येतात. बरे खेळगडे गोंयच्या पंगडांक खेळटले, हाचे खातिरूय यत्न जावंक जाय.
गोंयांत फुटबाॅलाच्यो राज्य आनी तालुको पांवड्यार साबार संघटणा आसात. तांचो एकमेकां मदीं समन्वय आसपाक जाय. फक्त आनी फक्त फुटबाॅल हेंच लक्ष्य आसल्यार हें घडून येवप तशें कठीण न्हय. फुटबाॅल उदरगत म्हामंडळाक (जीएफडीसी) गोंय फुटबाॅल संघटणेची (जीएफए) मान्यताय ना. देखून जीएफडीसींत प्रशिक्षण घेवपी तरणाट्या खेळगड्यांक सर्तींनी वांटो घेवपाक मेळना, अशें लोकप्रतिनिधींचें म्हणणें. खंयच्याय खेळांत जैत जोडलें जाल्यार प्रशिक्षण आनी थळाव्या, राज्य पांवड्यार चडांत चड मॅची खेळप गरजेचें. तशें केल्यारूच राष्ट्रीय, आंतरराष्ट्रीय पांवड्यार आपशीच खेळ सुदारता. अर्थांत खेळांत एकजूट जाय, एकमेकां वांगडा खेळगड्यांचो ताळमेळ जाय. बऱ्यांतलो बरो खेळ करपाची जिद्द जाय. मात हांगा दोन संघटणांचें एकमेकां कडेन जुळना, हाका कितें म्हणपाचें? आतां सरकारान प्रशिक्षकांक वेळार पगार दिवपाचें उतर दिलां. तो वाडयतले, अशेंय सांगलां. गोंयचे खेळगडे आयएफएलांत देशांतल्या नामनेच्या पंगडां खातीर खेळटात. म्हणटकूच हांगां गुणवत्ता ना अशें म्हणपाक मेळचें ना. फक्त गरज आसा ती खेळगड्यांक उर्बा दिवपाची. फाटीर हात दवरून खेळ म्हणपाची. जीएफडीसीक 6 कोटींचो निधी मेळटा, तातूंतलो अडेज कोटी पगाराचेर खर्च जाता. तेन्ना हो निधी वाडोवपाची अर्थसंकल्पांत तरतूद करची, अशी मागणी आमदारांनी केल्या. गोंयांत फुटबाॅल जिवो दवरपाक उद्देग समुहांचें योगदान आसा. मात आतां कांय जाणांनी तातूंतल्यान आंग काडून घेतलां. तेन्ना फुटबाॅल वयर काडपाक सरकाराकूच चड माथें मारचें पडटलें.
फाटीं जीएफएचे अध्यक्ष कायतान फर्नांडीस हांणी प्रशिक्षण शिबिरां आनी सर्तींचो आंकडो वाडपाक जाय, अशें मत उक्तायिल्लें. हाचेर खेळाचो संबंद येता त्या सगल्या खात्यांनी मार्ग काडप गरजेचें. खाजगी क्लब आनी शिक्षणीक संस्थाय ह्या मळार व्हडलें काम करपाक शकतात. राज्य आनी राष्ट्रीय पांवड्या वयल्यो सर्ती जाहीर जातात आनी दुसऱ्या दिसाच्यान जीएफए कोच सोदता, असो गंभीर आरोपूय फाटीं जाल्लो. बरो कोच मेळ्ळ्यार बरें आसा, नाजाल्यार जांचो खेळगड्यां कडेन व्हडलोसो संबंद येवंक ना, असो कोच नेमतात खंय. अशें जावप समा न्हय. गोंयच्या फुटबाॅलाचें लुकसाण करपी ही गजाल. गोंयांत एका परस एक बरे कोच आसात. तांकां सोदून राज्य पांवड्या वयल्या पंगडाक प्रशिक्षण दिवपाक हाडपाक जाय. तेवूय बी सर्तीची तारीख जाहीर जावचे पयलीं!!
कांय लोक पदां खातीर जीएफएचेर आयल्यात, असो आरोपूय हालींच जाल्लो. तातूंत नवें कितें आसा? राष्ट्रीय कुस्ती संघटणेचें दोळे उक्तें करपी एकूच उदाहरण पुरो. हुंवार, मोड, सुनामी, ज्वालामुखी, भुंयकांप सगलें एकाच वेळार येवन पसून बृजभूशण सिंह कुस्ती संघटणेच्या अध्यक्षपदाक दसून आशिल्लो… सध्या नासलो तरी कांय म्हयन्यां भितर ताका तें पद परत मेळूं येता. सध्या ताचो जांवय कुस्ती संघटणेच्या वेंचणूक रिंगणांत आसा. देशांतल्या सगल्या व्हडल्या खेळा संघटणांचेर राजकी फुडारी आसात. गोंयां सयत. आॅलिंपिकांत भांगरा पदकां मेळोवपी खेळगड्यांक उपासाक बसचें पडटा, मागीर राज्य, तालुको पांवड्या वयले खेळगडे किस झाड के पत्ते?
गोंयचो फुटबाॅल वयर काडपा खातीर झुजा पांवड्यार यत्न जावंक जाय. नाजाल्यार फुटबाॅल म्हणल्यार गोंय हें समीकरण, प्रतिमा ल्हवू ल्हवू करून पुसून वतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
