भांगरभूंय | प्रतिनिधी
अबरार अहमद (4-69) आनी नसीम शाह (3-41) हांच्या उत्कृश्ट प्रदर्शना उपरांत अब्दुल्ला शफीक हाचे आक्रमक बॅटिंगे नेटार पाकिस्तानान श्रीलंके आड दुसरे टॅस्टीच्या पयल्या दिसाच आपली स्थिती घटमूट केली.
श्रीलंकेचो पयलो डाव 166 धांवड्यांचेर आडायल्या उपरांत पाकिस्तानान पयल्या दिसाचो खेळ सोंप मेरेन 2 विकेटी वगडावन 145 धांवड्यो केल्ल्यो. शफीक 74 आनी मुखेली बाबर आजम आठ धांवड्यो करून खेळपट्टीचेर आशिल्लो. दोन मॅचींचे माळेंत पाकिस्तान 1-0 असो मुखार आसा.
श्रीलंकेचो डाव सवाय भियर आडायल्या उपरांत पाकिस्तानान आक्रमक बॅटींग केली. ताणें सुरवातीच्या ओव्हरींनी स परस अदीक गतीन धांवड्यो केल्यो. पयलीं 50 बॉलांनी 50 आनी 101 बॉलांनी शंबर धांवड्यो पुर्ण केल्यो. शान मसुदान 44 बॉलांनी अर्द शेंकडो मारलो. असिता फर्नांडोन डावाचे तिसरे ओव्हरींत इमाम उल हकाक (6) बाद केल्या उपरांत आपल्या दुसऱ्या स्पेलांत मसुदाक तंबूंत धाडलो. मसुदान 47 बॉलांनी चार चवके आनी एका सक्याचे मजतीन 51 धांवड्यो केल्यो. ताणें दुसरे विकेटी खातीर शफीका वांगडा 108 धांवड्यांची आक्रमक भागिदारी केली.
ते पयलीं टॉस जिखून पयलीं बॅटींग करपाचो श्रीलंकेचो निर्णय चुकीचो थारलो. पावसाक लागून मॅच एका वरा उपरांत सुरू जाली. मॅच सुरू जायना फुडें ओपनर निशान मदुशंका (4) तिसरे ओव्हरींत धांवबाद जालो. कुशल मॅण्डिस स धांवड्यो करून शाहीन आफ्रिदीचो शिकार थारलो. नसीम शाहान अॅंजेलो मॅथ्यूज (9) आनी करुणारत्ने (17) हांकां सेगीत दोन ओव्हरींनी बाद केले. श्रीलंकेन 36 धांवड्यांचेर चार विकेटी वगडायिल्ल्यो.
धनंजय डिसिल्वा आनी दिनेश चंदीमल हांणी पांचवे विकेटी खातीर 85 भागिदारी करून श्रीलंके मॅचींत हाडपाचो यत्न केलो. नसीमान चंदीमलाक 34 धांवड्यांचेर बाद करून ही भागिदारी फोडली. डिसिल्वा 57 धांवड्यो करून अबराराचो शिकार थारलो. ही भागिदारी फुटल्या उपरांत पाकिस्तानाच्या बॉलरांनी मॅचीचेर परतून आपलो शेक दवरपाक सुरवात केली. रमेश मॅण्डिस (27) हाणें सकयले सुवाते वयल्या बॅट्समनांक घेवन पंगडाचो स्कोर 160च्या मुखार पावयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
