भांगरभूंय | प्रतिनिधी
भारत आनी येजमान वॅस्ट इंडीज ह्या पंगडां मदीं चालू आशिल्ले दुसरे टॅस्टीच्या पांचव्या दिसाक पावसाक लागून निमाणी खबर मेळ मेरेन सुरवात जावंक नाशिल्ली. पावसाक लागून पयल्या सत्रांत एकूय बॉल घालपाक मेळूंक ना.
चवथ्या दिसाचो खेळांत लेगीत पावसान आडखळ हाडिल्ली. वॅस्ट इंडीज 365 धांवड्यांचे कठीण मोखीचो फाटलाव करतना 2 विकेटी वगडावन 76 धांवड्यो केल्ल्यो. दोनूय विकेटी आर आश्विनान घेतल्यो. अशे तरेन वॅस्ट इंडीज अजून जैता पसून 289 धांवड्यांनी फाटीं आसा.
दोन मॅचींची माळ 2-0 फरकान जिखून संवसारीक टॅस्ट वस्तादपण (डब्ल्युटीसी) सर्तीच्या तिसऱ्या चक्रा खातीर म्हत्वाचे गूण मेळोवपाक भारत इत्सूक आसा. चवथ्या दिसाचो खेळ सोंपिल्लो त्या वेळार जर्मेन ब्लॅकवूड 20 आनी ओपनर तेजनारायण चंद्रपॉल 24 धांवड्यो करून खेळटालो.
भारतान वॅस्ट इंडीजाचो पयलो डाव 255चेर सोंपयिल्लो. पयल्या डावांत 183 धांवड्यांची आघाडी घेवपी भारतान आपलो दुसरो डाव 24 ओव्हरींनी 2 विकेटी वगडावन 181 धांवड्यो करून च्या च्या विसवा उपरांत रोखडोच घोशीत करून वॅस्ट इंडीजाक जैता खातीर 365 धांवड्यांची मोख दिल्ली. मोखीचो फाटलाव करतना विंडिजान चवथ्या दिसाचो खेळ सोंप मेरेन 2 विकेटी वगडावन 76 धांवड्यो केल्ल्यो.
ते पयलीं भारतान आपल्या दुसऱ्या डावाक आक्रमक सुरवात केली. मुखेली रोहीत शर्मान मैदानाच्या चारूय वटांनी शॉर्ट मारून आपलो अर्द शेंकडो पुर्ण केलो. अखेरेक 57 धांवड्यो करून गाब्रिएलाच्या बॉलाचेर बाद जालो. ते शुभमन गिल मैदानांत देंवना फुडें पावसान हाजेरी लायली. ते उपरांत पावस थांबल्या उपरांत यशस्वी जयस्वालान आपली लय वगडायली. तो 38 धांवड्यो करून बाद जालो. वॅरीकेनान ताची विकेट घेतली.
मजगतीं, आर आश्विन आनी रवींद्र जडेजा हांणी मेळून 500 विकेटी पुर्ण केल्यो. दोगांयनी वांगडा खेळटना 500 विकेटी घेतल्यात. हातूंतल्यो 274 आश्विनान आनी जडेजान 226 विकेटी मेळयल्यात.
भारता वतीन सगल्यांत चड विकेटी घेवपाचो विक्रम हरभजन सिंग आनी अनील कुंबळे हांच्या नांवाचेर आसा. दोगांयनी मेळून 501 विकेटी घेतल्यात. हे जोडयेची बरोबरी करपाक आश्विन-जडेजा हे जोडयेक फकत एके विकेटीची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
