भांगरभूंय | प्रतिनिधी
उदका सरभोंवतणी आनी सैमान नटिल्लें गोंय ल्हान पूण भांगराळें राज्य. तशें पळोवंक गेल्यार गोंय आनी पावसाचें नातें मात्शें वेगळें. कारण गोंय पावसांत पाचव्याचार रंगांत न्हेसता. एखादी पावसाळ्याची सुरवात जाली काय दरेकाची सैमीक धबधब्याची सोबीतकाय प्रत्यक्षांत नियाळपाची उमळशीक आपले आपूण वाडटा. हातूंत थळाव्यां परस पर्यटकांचो आस्पाव चड. धबधब्याचें गतीन व्हांवपी उदकांत न्हावपाक कोणाक आवडचें ना? थंड शितळ उदक माथ्या वयल्यान पुराय आंग भिजयता तेन्ना मनाक वेगळी खोस भोगता. हेरांक पळोवचे परस स्वता ताचो अणभव घेवप चड गरजेचो, पूण हाचो आनंद घेतना आपल्या जिवाची काळजी घेवप लेगीत तितलेंच म्हत्वाचें.
हालींच पळयिल्ल्यो दुख्खाच्यो खबरो काळजाक पीळ घालतात. उपरांत घडिल्लो प्रकार तुमी सगले जाणांच आसतले. आयज विशय सैमीक धबधबो न्हय तर कृत्रीम धबधब्याचो.
हांव कितें सांगपाक सोदता हाचो अदमास थोड्यांक घडये आयला आसत. विस्तारान सांगचें म्हणल्यार प्रवास करतना अचकीत वाटेर मेळपी धबधबो. कितें? खंयचो काय विचारता? अरे तोच उड्डाण पुला (फ्लायओव्हरा) पोंदचो. हें आयकून मुखामळार हांसो फुल्लो न्हय? फुलतलोच, पूण हो विशय विचार करपी अशें तुमकां दिसना? आतां तुमी म्हणटले व्हांवपी उदक व्हावतलें तातूंत आमी कितें करूंक शकतात. सैमीक धबधब्याचो आनंद कृत्रीम धबधब्यार घेवया.
सारकें आसा तुमचें पूण हातूंत बारीकसाणेन लक्ष घातल्यार तें व्हांवपी उदक जेन्ना आमच्या आंगाक स्पर्श करता तें थेटपणान पावसाचें न्हय हाची जाणीव आसून लेगीत आमकां तातूंतल्यान प्रवास करचो पडटा. पूण तें उदक कितलें हळशीक आसत हाची कल्पना कोणे केन्ना केल्या व्हय? ल्हान आसतना आमी उदकांत भरिल्ल्या रस्त्यांत आपलें पांय बुडयताले आनी घरांत तापसाणी खाताले, याद जाता? तापसाणी कित्याक पडटाली हाची जाणीव आसतलींच तुमकां, तीच गत हालीं परतून जाल्या तेन्ना फक्त पांय उदकांत बुडटाले, आतां पुराय उदक आमका भिजयता. हातूंत प्रस्न खूबशे आसात. पूण ताचो पुराय मूळ भलायके कडेन जुळटा. गोंयचे उदरगती खातीर सरकार जायतीं बरीं पावलां उबारता. ही खरीच तोखणायेची गजाल, पूण ह्या तोखणाये फाटल्यान कांय गजाली दुर्लक्ष जातात अशें लेगीत दिसून येता.
एका वाठारांतल्यान दुसऱ्या वाठारांत सोंपें आनी बेगोबेग पावपा खातीर नवे उड्डाण पूल बांदून काडल्यात खरे. पूण ताची मुळावी बांदावळ बरोबर आसा काय? हाची जाप तुमकां उड्डाण पुला पोंदच्यान प्रवास करपी लोकां कडल्यान मेळटली ही खात्री आसा. खंयच्याय पुलाची बांदावळ करतना पावसा वेळार पुलार उदक सांठून उरचें न्हय म्हूण पुलाच्या दोनूय वटांनी एक ल्हानसो बुराक उदक वचपा खातीर दवरतात, पूण हाचेर लक्ष घातल्यार तुमकां कळून येतलें त्या बुरकांतल्यान व्हावपी उदक सरळ उड्डाण पुला पोंदचे मेकळे सुवातेर न्हय तर प्रवास करपी लोकांच्या माथ्यार पडटा.
चारचाकी चलोवपी तर हातूंतल्यान सुरक्षीत भायर सरतात. पूण दुचाकी चलोवप्यांनी कशें वाटावचें? हाची जाप रेनकोट अशें चितलां आसतलें तुमी हे जाणा, पूण पावस थांबले उपरांत सतत रेनकोट घालून रावप हें शक्य आसा अशें म्हाका तरी दिसना. त्या व्हांवपी उदकाचो आमच्या शरिराच्या कातीचेर कितें वायट परिणाम जावं येता हे जाचेर घडटा ताकाच कळटा. ह्या गंभीर विशयाचेर सरकाराक बेगोबेग लक्ष घालपाची गरज आसा, पावसाळो निकतोच लागला आनी धबधब्यार वचपाची उमळशिकूय वाडल्या. पूण कृत्रीम धबधब्याचेर न्हय सैमीक धबधब्याचेर.
विष्णू बाबलो नार्वेंकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
