भांगरभूंय | प्रतिनिधी
खबरां संस्था
मँचेंस्टरः ऑस्ट्रेलिया- इंग्लंड हाचे मदले चवथ्या टॅस्टीच्या चवथ्या दिसा पावसान आडखळ हाडली. पावसास लागून खेळ थांबोवचो पडलो तेन्ना ऑस्ट्रेलियेन आपल्या दुसऱ्या डावांत 5 आवट 214 धांवड्यो केल्यो. इंग्लंडाच्या पयल्या डावांतल्या 592 धांवड्यां पसून अजून ते 61 धांवड्यांनी फाटीं आसात. मार्नुस लाबुशेनाचो शेंकडो (111) हे चवथ्या दिसाचें वैशिश्ट्य आशिल्लें. ताणे 10 चौके आनी 2 सक्यांनी शेंकडो केलो. खेळ थांबोवचो पडलो तेन्ना कॅमरून ग्रीन (3) आनी मिचेल मार्श (31) खेळटाले.
चवथ्या दिसा पावसाक लागून पयल्या सत्रांतलो खेळ जावपाक शकलो ना.. दुसऱ्या आनी तिसऱ्या सत्रांत पावसाक लागून खेळ बंद करचो पडटालो. ताका लागून खेळ वेळ जावचे पयलीं सोपोवचो पडलो. चवथ्या दिसा फकत 30 ओव्हरींचो खेळ जावपाक शकलो. निमाण्या दिसाय पावस पडपाचो अदमास आसा. इंग्लंड मजबूत परिस्थितींत आसा.
चवथ्या दिसा ऑस्ट्रेलियेन 4 आवट 113 धांवड्या वयल्यान खेळपाक सुरवात केली. लाबुशेन शेंकडो करून आवट जालो.जो रुटान ताची विकेठ घेतली. पांचव्या दिसा पावस पडल्यार खेळ जावचो ना आनी इंग्लंडाक ही अॅशेस माळ 1-2 अशी वोगडावची पडपाची भिरांत आसा. ऑस्ट्रेलियेन पयल्यो दोन टॅस्ट मॅची जिखल्यात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
