कोरिया ओपनः चिराग- सात्विक जोडी वस्ताद फायनलींत संवसारीक नंबर एकचे जोडयेक हारयलें 

भांगरभूंय | प्रतिनिधी

खबरां संस्था
सोलः सात्विक साईराज आनी चिराग शेट्टी ह्या भारतीय जोडयने बीडब्ल्यूएफ 500 कोरिया ओपन बँडमिंटन  सर्तीत दादल्यांचे दोट्टीचें वस्तादपण मेळयलें. तांणी इंडोनेशियाच्या फजर अॅलन आनी मोहम्मद रियान हे संवसाकीर क्रमवारींत पयले सुवातेर आशिल्ले जोडयेक हारयलें. ही मॅच 62 मिनटां चल्ली. तातूंत सात्विक-चिरागान 17-21, 21-13, 21-14 अशें जैत मेळयलें.
सात्विक-चिराग जोडी अंदू इंडोनेशिया सुपर 1000 आनी स्वीस ओपन सुपर 500 सर्तींत जैतिवंत थारिल्ली. जून म्हयन्यांत इंडोनेशिया ओपन सर्त जिखले उपरांत हे भारतीय जोडयचें हे सेगीत दुसरें जैत आसा. बीडब्ल्यूएफ 500 ओपन सर्तींतलें हें तांचे तिसरें जैत आसा. हाचे पयलीं 2019 वर्सा तांणी थायलंड ओपन आनी पोरूं इंडिया ओपन सर्त जिखल्ली.
सात्विक आनी चिराग हांचो जोडी जाल्ल्या सावन तांणी जायत्यो सर्ती जिखल्यात.  तातूंत राष्ट्रकुल खेळां सर्ती आनी थॉमस कप सर्तींत भांगरा पदकां, संवसारीक बॅडमिंटन सर्तींत कांस्या पदत तशेंच सुपर 300 (सय्यद मोदी आनी स्वीस ओपन), सुपर 500 (थायलंड आनी इंडिया ओपन), सुपर 750 (फ्रेंच ओपन) आनी इंडोनेशिया ओपन सुपर 1000 हाचो आसपाव आसा.
ताचे पयलीं सात्विक साईराज आनी चिराग शेट्टी हे भारतीय जोडयेन फाटल्या शेनवारा संवसारीक क्रमवारींत दुसरे सुवातेर आशिल्ले लियांग वेई केंक आनी वांग चांग हाचेर मात केल्ली.  21-15, 24-22 असो  सरळ गेमींत जैत मेळोवन तांणी फायनलींत प्रवेश केल्लो.