भांगरभूंय | प्रतिनिधी
पूण नेगेटिव्हीटीक मसालो लावप काय ना? म्हणून मसालो लायतना समाजाचो आनी फुडले पिळगेचे मानसिकतेचा विचार गरजेचो काय ना?
म्हजी मम्मी उलयता आसतना विंगड विंगड म्हणीनी उलयताली. आपसुकच तिच्या तोंडांतल्यान जायत्यो पोरन्यो म्हणी हांव आयकतालों. तातूंतलीच एक म्हण म्हणल्यार ‘सोर्तींत जाता ते अर्तीन जायना!’
सोर्ति वाटो म्हणजे सोंपे भाशेन दुसऱ्यान केले म्हणून आपुणय बी तें करप. चडशे फावटी आपली तांक नासतना सोर्तीवाट्याक लागून लेगीत जिनसां घेवप वा साबार गोश्टी करप घडटा, Duline Shopping तर एक फावट पळयल्ली वस्त परत परत दोळ्यां मुखार हाडीत आसता. ही गजाल ह्या दिसांनी चडांत चड वाडत चल्ल्य शी दिसता. आयच्या युगांत जंय ‘Use and throw policy’, चलता थंय खंयचीय वस्त बदलप खुबच वाडलां आनी तें सोंपें अशें दिसूंक लागलां. “म्हाका हो टिवीचेर जायरातींत दिसता तो मोबायल जायच. तातूंत लेटेस्ट फिचर्स जायतीं आसात, जीं म्हज्या सद्याच्या मोबायलांत नांत, असो हट्ट आयचीं भुरगीं करता आसतना पालकांक प्रस्न पडटा की आतां त्या पोरण्या मोबायलाचें किदें करप काय? आनी दुसरें म्हणल्यार पालकांनी जर आपल्या भुरगेंपणांत कितें जातालें ताचेर इल्लेशें उलोवणे केलें जाल्यार तांकां भुरग्याची जाप मेळटा की ‘तो काळ वेगळो आशिल्लो, आतां काळ बदलला..! “
तशें पळोवपाक गेल्यार आतांच्या तेंपार मनशाची मनांय बी बदल्ल्यांत? राजकारणी ह्या पक्षांतल्यान त्या पक्षांत आपल्या फायद्या प्रमाण वतात तें सगळ्यांनी पळयल्लें, पूण आतां खंयचोय मनीस रोखडोच बदलपाची शक्यताय आसता आनी तशें घड़टाय बी. हाचें कारण सत खबर आसून लेगीत तो मॅजोरिटी बरोबर रावप सुरक्षित समजता आनी आजकाल सत्या वांगडा रावपी लोक कमी आसतात. हाजे फाटल्यान ‘दुस्वास करप’ हें एक मुख्य कारण जावन आसा. कोणय खंयच्याय मळार वयर सरता तेन्ना ताचे साबार कश्ट, त्या कामा खातीर आपणांक लायक करपाक ताणें दिल्लो वेळ, ताणें केलो त्याग हें सगळें कोणांक यादीत आसना, पुण त्याच मनशाक हें सगळें खबर आसता. व्हडल्या पांवण्यार पाविल्ले आपल्या आपल्या मळां वयले लोक सदांच जमनीर (हम्बल) आसतात, अशें लेखकर रोबिन शर्मा आपल्या Who will cry when you die या बेस्ट सेलर पुस्तकांत म्हणटात (धडो 77 – बी हम्बल).
इंटरनेट आनी खास करून सोशल मिडियान लोकांच्या मनांचेर भोवच चड परिणाम केला. कोणय नवी गाडी वा व्हडली वस्त घेता तेन्ना सोशल मिडियाचेर फोटो सयत पोस्ट घालयाची आजकाल पद्धत जावन पडल्या. तेन्ना कितलेसेच लोक ताका परबीं दिवपी मॅसेजी घालतात, पुण तातूंतल्यो कितल्यो मना सावन आनी उपाट खोशयेच्यो आसतात? तातूंत नसायचोय बी वास आसता काय?
Negativity sells Fast अशें हांवें एका पुस्तकांत वाचिल्लें. पूण नेगेटिव्हीटीक मसालो लावप काय ना? म्हणून मसालो लायतना समाजाचो आनी फुडले पिळगेचे मानसिकतेचा विचार गरजेचो काय ना?
सकारात्मक चिंतनां, सत्या वांगडा रावपाची तांक ही आयज गरज जावन पडल्या. आजकाल खुबश्या गोश्टींचो बाजार जाला. तातूंतल्यान बरी जीण आनी बरो फुडार घडोवपा खातीर बऱ्या पुस्तकांचो, जी चिंतनांक रचनात्मक वाट दाखयतात, समविचारीक लोकांचो मेळ (असोसिएशन) जे सकारात्मकताय आनी सत्य पातळावपाक सोदतात, आपल्या कामांचेर श्रद्धा आनी मोग ह्यो गरजेच्यो गोश्टी जावन आसात.
आदर्श विलास सिनाय कुडचडकार
98232 51212
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
