भांगरभूंय | प्रतिनिधी
वॅस्ट इंडिजा आड हांगाच्या पोर्ट ऑफ स्पेनाच्या क्विन्स पार्क ओव्हल मैदानाचेर चालू आशिल्ले दुसरे टॅस्टीच्या दुसऱ्या दिसा भारतान निमाणी बातमी मेळ मेरेन 6 विकेटी वगडावन 388 धांवड्यो केल्ल्यो. आर आश्विन 17 आनी ईशान किशन 21 धांवड्यांचेर खेळटाले. अश्टतासांचो खेळगडो रवींद्र जडेजा 61 धांवड्यो करून बाद जालो.
ते पयलीं विराट कोहलीन 121 धांवड्यांची खेळी केली. ताणें टॅस्ट कारकिर्दींतलो 29वो शेंकडो पुर्ण केलो. तशेच आंतरराष्ट्रीय क्रिकेटींतलो ताचो हो 76वो शेंकडो थारलो. टॅस्ट क्रिकेटींत शेंकडे मारपांत कोहलीन ऑस्ट्रेलियेचो आदलो म्हान बॅट्समन डॉन ब्रॅडमनाची बरोबरी केली. ब्रॅडमनान 29 शेंकडे मारल्यात. संवसारांत वट्ट 15 बॅट्समनांनी हाचे परस चड शेंकडे मारल्यात. सचिन तेंडुलकर 51 टॅस्ट शेंकड्यां सयत पयले सुवातेर आसा.
भारतीय बॅट्समनां मदीं तेंडुलकरा खेरीत राहुल द्रविड (36) आनी सुनील गावस्कर (34) हांणी कोहली परस चड शेंकडे मारल्यात. कोहलीचे 76 आंतरराष्ट्रीय शेंकडे जाल्यात. हातूंत 29 टॅस्ट शेंकड्यां परस वन डे क्रिकेटींत 46 आनी आंतरराष्ट्रीय टी-20त एक शेंकडो मारला. आंतरराष्ट्रीय क्रिकेटींत कोहली परस सचिन तेंडुलकरान (100) चड शेंकडे मारल्यात.
कोहलीन 55 म्हयन्यांनी विदेशी भुंयेर पयलो शेंकडो मारलो. विदेशांत ताणें आपलो निमाणो शेंकडो डिसेंबर 2018त ऑस्ट्रेलिये आड पर्थ टॅस्टींत मारिल्लो.
मजगतीं, कोहली आनी जडेजा हांणी पांचवे विकेटी खातीर 286 बॉलांनी 159 धांवड्यांची भागिदारी केली. कोहली 121 धांवड्यो करून धांवबाद जालो, जाल्यार जडेजा 61 धांवड्यो करून तंबूंत परतलो.
ते पयलीं पयल्या दिसा टॉस हारल्या उपरांत पयलीं बॅटींग करपी भारताक मुखेली रोहीत शर्मा आनी यशस्वी जयस्वाल हांणी बरी सुरवात करून दिल्ली. यशस्वी 57 आनी रोहीत 80 धांवड्यो करून बाद जालो.
ते उपरांत तिसरे सुवातेर खेळपाक आयिल्ल्यान कोहलीन डाव सांबाळ्ळो. दुसरे वटेच्यान शुभमन गिल आनी अजिंक्य रहाणे अपेशी थारले. वळेरेन 10 आनी आठ धांवड्यो करून ते तंबूंत परतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
