समाज माध्यमांतली बुद्धीक आनी भावनीक कृत्रिमताय

भांगरभूंय | प्रतिनिधी

तंत्रज्ञानान आमची बुद्धिमत्ता तर कृत्रीम केल्याच, तेच वांगडा आमच्यो भावनाय कृत्रीम केल्यात. समाज माध्यमांचेर कोणाचीय निंदा नालस्ती करतना आमी विचार करपाची तकालस घेनात. कोणाच्योय भावना दुखावत म्हणपाचें आमी मतींत घेनात.

फाटल्या सप्तकांत ‘भांगरभूंय’चे आयतार पुरवणेंत म्हजो ‘औ फॉर औरंगजेब’ हो लेख छापून आयलो आनी ताचेर समाज
माध्यमां तशेंच एका मराठी दिसाळ्याचेर प्रतिक्रियांचो फार जालो. लेखकाक तोखणाये वांगडाच आलोचनाय म्हत्वाची आसता. तुस्त आसत वा टिका, दोनूय तटस्थपणान आनी पुराय अभ्यासान केल्ली आसची अशी अपेक्षा आसता. ती पूर्वग्रह दुशीत नासची. तिका तर्कीक आदार आसचो असो समज आसता.
समाज माध्यमां आयज सहजपणान आनी सवाय भितर उपलब्ध जाल्यांत. व्हॉटस् एप युनिव्हर्सिटी तर तेजींत आसा. द्वेश, मत्सर, फटींगपणांनी भरिल्ले पोस्ट खिणा खिणाक समाज माध्यमांचेर तयार जातात आनी कांय खिणांत सवंसाराच्या खाचीं गोंयड्यांनी पावतात. समाजांत सुशिक्षीत, सुसंस्कृत म्हूण वळख आशिल्ल्या आनी जापसालदार पदां सांबाळपी लोकांच्या खांद्यार पांय दवरून ते पोस्ट मुखार वचत रावतात. आयलें तें तश्श्याचे तश्शें मुखार धुकलप हें कांय जाणांचें वेसन जालां. आपूण मुखार धाडटल्या पोस्टांत कितलें तथ्य आसा हें लेगीत जाणून घेवपाचो ते यत्न करिनात.
एक विनोद आयकल्लो तो हांगा ज्युस्त लागता म्हूण सांगन दिसता. एक दीस एके फुटबॉल टिमीचो धनी आपले गाडयेन मडगांवच्यान पणजे वतालो. वाटेर ताका एके कडेन काळगां विकपाचो मांड दिसलो. काळगांचो नवोच स्टॉक आयिल्लो आनी तो देंवोवन घेवपाचो वावर चलिल्लो. एक मानाय ट्रकांतल्यान काळगां सकयल आशिल्ल्या दुसऱ्या मानाया कडेन उडयतालो. सकयल आशिल्लो मानाय तीं काळगां अचळय फिशालकायेन धरतालो आनी फाटल्यान दवरतालो. ताची ती काळगां जिखून धरपाची सहजताय आनी अचूकपणा पळोवन फुटबॉल टिमीचो धनी प्रभावीत जालो. ताचे मदीं एका बऱ्या गोलकिपराचे गूण ताणे पारखिले. आपली गाडी ताणें ताचे सरी थांबयली आनी त्या मानायाक दुसरे दिसा आपल्या कार्यालयांत येवन मेळूंक सांगलें.
दुसऱ्या दिसा तो मानाय ताचे कार्यालयांत आयलो तसो दिसाक पांचशें रुपया जोडपी त्या मानायाक ताणे आपल्या टिमींत गोलकिपर म्हूण घेतलो आनी म्हयन्याक पांच हजार पगार थारायलो. पांचश्यांचे सुवातेर पांच हजार पगार मेळटलो म्हूण मानाय खूश जालो आनी एक बरो फिशाल गोलकिपर मेळ्ळो म्हूण तो धनी! दुसऱ्याच दिसा ताच्या टिमीची म्हत्वाची मॅच आशिल्ली. आयची मॅच गोलकिपराच्या नेटार खात्रेन जिखपाचो धनयाक पुराय विस्वास आशिल्लो. ताणें तशी पैजय मारिल्ली. मॅच सुरू जाली. कांय वेळ गेले उपरांत विरोधी पंगडांतल्या खेळगड्यांनी जोरदार आक्रमण केलें. एक आकांताचो शॉट गोलकिपराचे दिकेन आयलो. गोलकिपरान सदांचे काळींग जिखून धरपाचे संवयेन तो सहज आडायलो. पंगडाचो धनी आनी सगले समर्थक उबे रावन तांणी गोलकिपराची तोखणाय केली. गोलकिपरान दुसऱ्याच खिणाक सदांचेच संवयेन बॉल काडलो आनी फाटल्यान उडयलो. बॉल सरळ गेलो गोलपोस्टांत. खीणभर आदीं ताळयो मारपी समर्थक आतां ताच्या ह्या कृतीचेर गाळयो मारपाक लागले. काळगां आनी फुटबॉल हातूंतलो फरक करपाची तांक त्या मानाया मदीं नाशिल्ली कारण तो अशिक्षीत आशिल्लो. आयलां तांतूंतलें कितलें फुडें-फाटीं धाडप आनी कितें आपलेच कडेन आडावन दवरप हाचें भान निदान शिकिल्ल्यांनी तरी दवरूंक जाय न्हय? तशें केलें ना जाल्यार मागीर त्या गोलकिपरावरी स्वयंगोल करून घेवपाची पाळी येवपाक शकता.
‘शिकिल्ल्या भारतीयांच्या फातरा काळजाचें आपल्याक दुख्ख जाता’ अशें महात्मा गांधीजी म्हणटाले. दुर्दैवान, आयज समाज माध्यमां सवंसाराचेर शेक गाजयतात आनी समाजांतले शिक्षीत लोक कुड्डे आनी भेड्डे जावन वागतात हाची खंत भोगता.
तंत्रज्ञान अती वेगान मुखार वता. कालचें तंत्रज्ञान आयज काळा भायलें थारता. कृत्रीम बुद्धिमत्ता (आर्टिफिशियल इंटेलिजन्स) सवंसाराक खंय घेवन वतली काय म्हणपाचो हुस्को आसाच. तंत्रज्ञान फुडले पिळगेक वरदान थारतलें काय शाप म्हणपाचें काळूच थारायतलो. तंत्रज्ञानान आमची बुद्धिमत्ता तर कृत्रीम केल्याच, तेच वांगडा आमच्यो भावनाय कृत्रीम केल्यात. समाज माध्यमांचेर कोणाचीय निंदा नालस्ती करतना आमी विचार करपाची तकालस घेनात. कोणाच्योय भावना दुखावत म्हणपाचें आमी मतींत घेनात.
दर दिसा समाज माध्यमांचेर फटीचे पोस्ट पळोवपाक मेळटात. गुगल वा हेर सर्च इंजिनांत वचून त्या पोस्टा विशींचें खरेपण जाणून घेवप शक्य आसता. पूण आयज भोवतेकांक तितलो संयम नासता. आयिल्लें तें दुसऱ्याक धाडले म्हणटकीच व्हड कितें तरी साध्य केल्ल्याची धादोसकाय तांकां मेळटा. एकल्याचे फोटे दुसऱ्याक चिकटाय आनी व्हिडिओ आसत जाल्यार तांतूंत आपल्याक सोयिस्कर बदल करून ते समाज माध्यमांचेर घाल अशे प्रकार चालू आसतात. ह्यो फटीच्यो गजाली फाल्यांची पिळगी सत्य म्हूण स्विकारत हाचो हुस्को आसा.
म्हज्या लेखाचेर प्रतिक्रिया उक्तायतना एका लागींच्या इश्टान एक प्रस्न केलो. भुरग्यांक जर ‘औ फॉर औरंगजेब’ चलता जाल्यार पोजडीं उतरां कित्याक शिकोवचीं न्हय. म्हजें मत आशिल्लें कीं तीं उतरांय योग्य पिरायेचेर योग्य मार्गान शिकोवचीं. शिकोवंक नात म्हूण तीं भुरग्यांक कळपाचीं उरतात तर? पूण योग्य तरेन शिकोवंक नात जाल्यार मुतारेंत वा वर्गांतल्या बाकांचेर तीं खात्रेन दिसतलीं. आयच्या भुरग्यांक इंटरनॅटाचेर जाय ती म्हायती मेळटा. केन्ना केन्ना ती चुकीची आसता वा चुकीच्या मार्गान मेळिल्ली आसता. देखून तांकां खरें कितें आनी फट कितें तें आमी शिकोवंक जाय. तितली तांक तांचे मदीं आमी तयार करपाक जाय. ना जाल्यार फाल्यांची पिळगी फॉरवर्ड संस्कृतायेचेर कुड्डेपणान विस्वास दवरपी घडटली हातूंत दुबाव ना.

अनंत अग्नी
9422439903