कृती घातकूच, वृत्ती चड घातक

भांगरभूंय | प्रतिनिधी

हिंसाचार, वावड्यो पातळावन पूर्वे कडलीं हीं शांत राज्यां अस्वस्थ, अस्थीर करपा फाटल्यान नेमकें कसलें षडयंत्र आसा, आनी तें कोण करता, ताचो खोल मेरेन वचून तपास जावंक जाय.

जात, धर्माक मारिल्ली वेंग सदळ करून सारासार विवेक बुद्द जागृत केल्यार बऱ्योच समाजीक समस्या सुटूं येतात. मात, आमच्या देशांत धर्मीक उन्माद अदीं मदीं तेंगशेर पाविल्लो जाणवता. कांय वाठारांनी केस्तांवां, मारामारी, दादागिरी सदचीच. चकमकीय जातात. खास करून सणां- परबां वेळार. हे विशीं चड सांगपाची गरज ना. निमाणें सगले एकाच xx चे कुडके! हे कडवे, ते मवाळ, हे बेरकी, ते भोळे… अशें म्हणपा सारकी परिस्थिती आयज उरूंक ना. ह्याच रागाक मागीर फांटे फुट्टात आनी संद मेळ्ळी काय ती तिडक वयर सरता. तातूंत विचारधारेच्या दाव्याक बांदिल्लो मनीस, संस्था आसल्यार कितें जायत तें कोणूच सांगूक शकना. पयर मणीपूरांतलो एक व्हिडिओ व्हायरल जाला, तो मनीसपणाक लजेक घालपी. मुख्यमंत्री, प्रधानमंत्री, सरन्यायाधीशान हे घडणुके विशीं तिडक उक्तायल्या.
मणीपूर कित्याक पेटलां? भोवसंख्य मैती (मैतेयी) समाज खूब काळा सावन आपणाक अनुसुचीत जमातीचो दर्जो दिवचो अशी मागणी करता. आंदोलनां, केशीं उपरांत न्यायालयान तांकां तो दिवपाचो निकाल दिलो. मैती चडशे हिंदू. दोंगरांनी रावपी नागा आनी कुकी ह्या आदिवासी अनुसुचीत जमातींनी ह्या निकालाक हरकत घेतली. हे चडशे क्रिस्तांव. मैतींक आमच्या आरक्षणांत वांटेकार करिनासतना वेगळें आरक्षण दिवचें हे खातीर तांणी आंदोलन सुरू केलें. दर्जो मेळटकूच तांकां आपल्या वाठारांत जमनी, नोकरी आनी हेर हक्क मेळटले, असो तांचो दावो! शांतिकायेन चलिल्लें आंदोलन 3 मे दिसा अचकीत हिंसक जालें. ताचे फाटले कारण म्हणल्यार वावड्यो. अर्थांत हो दुसरो विशय. 4 मेक पुलीस हिंसा जाली थंयच्यान पळून गेल्ल्या कांय लोकांक घेवन पुलीस स्टेशनाचेर वताले. तेन्ना एक जमाव तांकां आडावन त्या लोकांक घेवन गेलो. मागीर भितरल्या दोन बायलांक खुनाची धमकी दिवन कपडे काडपाक लायले. तांची धींड काडली. हो तमाशो पळोवपाक लज भाजून खाल्लीं दोन पांयांचीं जनावरां व्हड संख्येन हजर आशिल्लीं. तातूंतलीं कांय तांचेर बलात्कारूय करपाक सोदतालीं, अशें एके बायलेन सांगलां. बलात्कार जाला, अशेंय कांय लोकांचें मत आसा. एके बायलेच्या भावान विरोध केलो, तर ताका मरसर बडयलो. त्यो बायलो पळून गेल्यो. नाजाल्यार त्योय मरपाच्यो. पुलिसांनी हें व्हडलेंशें मनार घेवंक ना. कारण कागाळ ना. आतां मात तांची पॅण्ट ‘हळडुवी’ जावपाक पावल्या. धींड काडप्यांचो मुखेली हिरादास सिंह (32) हाका आनी हेर दोगांक अटक जाल्या. लोकांनी हिरादासाचें घर काल लासून उडयलां. मुख्यमंत्री एन बिरेन सिंहान ताचेर आनी हेरांचेर कडक कारवाय करतले अशें ट्वीट केलां. ही घडणूक देशा खातीर लजेची. दोशींचेर कारवाय जातली, अशें प्रधानमंत्री नरेंद्र मोदी हांणी सांगलां.
ह्या व्हिडिओक लागून मणीपूर परतून पेटलां. निदर्शनां सुरू जाल्यांत. ह्या प्रकरणाचो अर्थांत सगलेच राजकी फायदो घेतले, हातूंत दुबाव ना. सर्वोच्च न्यायालयान ह्या व्हिडिओची दखल घेतिल्ल्यान सरकाराक आतां वेगान पावलां उखलचींच पडटलीं. “ही गजाल स्विकारपा सारकी ना. आमकां खूब हुस्को जाला. राज्य आनी केंद्र सरकारान कितें पावलां उखल्ल्यांत, तें ह्या सप्तकांतूच सांगचें, नाजाल्यार आमकां आदेश दिवचो पडटलो. आमी फुडली सुनावणी 28 जुलयाक घेतले”, अशें सरन्यायाधीश चंद्रचूड हांच्या खंडपीठान जाहीर केलां.
मणीपूरांत फाटले तीन म्हयने चालू आशिल्ल्या जातीय हिंसाचारांत देडशें वयर लोकांक मरण आयलां. कोट्यांनी रुपयांची मालमत्ता लासून गोबर जाल्या. हजारांनी लोक घरदार सोडून तंबुंनी रावतात. तांच्या मनांत सुडाची भावना खदखदता. ती बेगीन शांत जायत अशें दिसना. ताचे परिणाम देशाक फुडाराक भोगचे पडूं येतात. तशें जावचें न्हय. हिंसाचार, वावड्यो पातळावन पूर्वे कडलीं हीं शांत राज्यां अस्वस्थ, अस्थीर करपा फाटल्यान नेमकें कसलें षडयंत्र आसा, आनी तें कोण करता, ताचो खोल मेरेन वचून तपास जावंक जाय. जातीय, धर्मीक अहंकारांतल्यान धींड काडपाची ही कृती घातकूच, पूण ताचे परस चड घातक ही वृत्ती. मुखार ती असल्या आनीक कृतींक उर्बा दिवंक शकता. मेंदू बाविल्ल्या वा तो घाणाक दवरिल्ल्या सगल्याच लोकांनी हें सदांच मतींत दवरपाक जाय.