भांगरभूंय | प्रतिनिधी
खबरां संस्था
मॅन्चेस्टरः इंग्लड आनी ऑस्ट्रेलिया हाचे मदले अॅशेस माळेंतल्या चवथे टॅस्ट मॅचीत ऑस्ट्रेलियेच्या पयल्या डावांतल्या 317 धांवड्यांक बिरेस्तारा दुसऱ्या दिसा इंग्लंडान निमाण्या सत्रा मेरेन 2 आवट 323 धांवड्यांची दमदार जाप दिली. ओपनर झॅक क्रावले नाबांद 185 आनी जो रूट 69 धांवड्यांचेर खेळटाले. बुधवारच्या पयल्या दिसा इंग्लंडाचो अणभवी फास्ट बॉलर स्टुअर्ट ब्रॉडान टेस्ट क्रिकेटीं 600 विकेटी घेवपाचो पराक्रम केलो. टॅव्हिस हेडाची विकेट घेवन ही कामगिरी करपी ब्रॉड इंग्लंडाचो दुसरो बॉलर थारलो. ताचे पयली म्हान फास्ट बॉलर जेम्स अँडरसनान इंग्लंडा खातीर ही कामगिरी केल्ली.
इंग्लंडाचो ओपनर झॅक क्रावले शेंकडो आनी मोईन अलीचो (57) अर्द शेंकडो हाका लागून 1 आवट 9 उपरांत इंग्लंडान 2 बाद 130 चो टप्पो हातासलो. ओपनर बॅन ड्युकेट 1 धांवडेचेर स्टार्कान कॅच आवट केल्या उपरांत क्रावले- मोईल अली जोडयेन डाव साल्वार केलो. मोईन आवट जाल्या उपरांत क्रावलेन जो रुटा वांगडा ऑस्ट्रेलियन बॉलरांक तोंड दिलें. निमाणी खबर आयली तेन्ना इंग्लंडा आपल्या पयल्या डावांत 2 बाद 323 धांवड्यो केल्ल्यो. क्रावले 185 (201चौके आनी 3 सके) आनी रूट 69 ( 7 चौके आनी 1 सको) धांवड्यांचेर खेळटाले.
ब्रॉडाच्यो टॅस्ट क्रिकेटीत 600 विकेटी
जेम्स अँडरसनाच्या नांवार 688 टॅस्ट विकेटी आसात. ब्रॉड 600 विकेटींचो टप्पो हासासपी संवसारीक क्रिकेटींतलो पांचवो बॉलर थारला. ताचे पयलीं मुथय्या मुरलीधरन (800 विकेटी), शेन वॉर्न (708 विकेटी), जेम्स अँडरसन ( 688 विकेटी), अनिल कुंबळे (619 विकेटी) हांणी 600 परस चड विकेटी घेतल्यात.
ब्रॉडान ऑस्ट्रेलियेच्या पयल्या डावांत उस्मान ख्वाजा आनी हेडाक आवट केलें. ब्रॉडान ऑस्ट्रेलिये आडच्या टॅस्ट मॅचींत इंग्लंडा वतीन सगल्यांच चड विकेटी घेवपाचो इयान बोथमाचो विक्रम मोडलो. इंग्लड आड ऑस्ट्रेलिया टॅस्ट मॅचींत ताच्या नांवार आता 149 विकेटी लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
