भांगरभूंय | प्रतिनिधी
राजेंद्र तालक : मडगांवां इफ्फीचे 13 चित्रपट दाखयतले
मडगांव : मडगांवच्या रवींद्र भवनांत कँटीन सुरु करपा खातीर निविदा प्रक्रियेक सरकारा कडल्यान मंजुरी मेळ्ळी. ती पुराय जाल्ल्यान आयतार मेरेन नोटीस जारी करतले. नोंदणीकृत स्वयंसेवी संस्थांक ह्या कँटीना खातीर बोली लावपाक मेळटली. 3 ते 4 ऑगस्टाक निविदा उक्ती करतले. 10 ऑगस्ट मेरेन कँटीन जातलें, अशी म्हायती रवींद्र भवनाचे अध्यक्ष राजेंद्र तालक हांणी दिली.
मडगांवां रवींद्र भवनांत कार्यकारिणीची बसका जाली. उपरांत जाल्ले पत्रकार परिशदेंत तालक हांणी ही म्हायती दिली. मजगतीं, रवींद्र भवनाचें उरिल्लें काम मान्सुना उपरांत करतले अशेंय तांणी स्पश्ट केलें.
णव संस्था- सम्राट क्लब मडगांव, दैवज्ञ भवन मडगांव, टुगेदर ऑफ मडगांव, सिध्दांत गडेकार डान्स अकादमी, फातोर्डा युवा क्लब, श्री दामबाबाले घोडे, नवयुवक हौशी मंडळ, कलारंग आनी अश्वमेध ह्या संस्थां वांगडा समीरा शेख, प्रतीमा बांदेकार, शीला काकोडकार, शिवानी पागी, अभिषेक काकोडकार, आग्नेल फुर्तादो, लक्ष्मण परब, महेश पै काणे, जॉन डिसिल्वा हांकां समितीचेर घेतल्यात. तांतूंतल्या लक्ष्मण परब, महेश पै काणे, जॉन डिसिल्वा हांचे वांगडा गडेकार डान्स अकादमी आनी सम्राट क्लबांतल्या पदाधिकार्याक कार्यकारी समितीचेर घेतले, अशी म्हायती बसकेंत दिली.
ह्या वेळार वर्सुकी कार्यावळींचें नियोजन केलें. हातूंत 1 कोटी 10 लाख 65 हजार इतलो खर्चाचो अदमास केला. वर्सभरांतले सेमिनार आनी हेर कार्यावळींचो आसपाव आसतलो. विवीध शाळा, संस्थांच्या कलाकारांक माची दिवपा खातीर रवींद्र भवन फुडाकार घेतलें. सगळ्या वांगड्यांनी ह्या कार्यावळींनी वांटो घेवचो पडटलो, जापसालदारकी सांबाळची पडटली. तशेंच समस्यां खातीर सुचवणी बॉक्स दवरतले. रवींद्र भवनांतलीं नाटकां, तियात्रां हांची म्हायती वेबसायटी वरवीं सगळ्यां मेळटली. रवींद्र भवनाच्यो ज्यो समस्या आसात तीं सगळीं कामां मान्सुना उपरांत करतले. तशेंच 15 ऑगस्टाक रवींद्र भवना कडेन येवपी रस्त्या सयत इमारतीच्या सगळ्या वाठाराक भारताच्या तिरंग्याच्या रंगाच्यो लायटी घालतले. हे विशीं वीज खातें, जिल्होधिकारी कार्यालया कडेन उलोवप जालां, अशें तालक हांणी म्हणलें.
अंदूं इफ्फीचे 13 चित्रपट
इफ्फीचे कांय शो मडगांवां जावपा खातीर मुख्यमंत्र्यांची भेट घेतली. इएसजीचे मुखेल कार्यकारी अध्यक्षांक इफ्फी खातीर रवींद्र भवन निश्चीत करपा वांगडाच 13 चित्रपट दाखोवपा खातीर गरजेच्यो सुविधायो उपलब्ध करपाचे निर्देश दिल्यात. ईएसजीचे अधिकारी आनी इफ्फीचे तांत्रीक अधिकारी पळोवणी करून गरजेच्यो सुविधा उबारतले. अंदूं मडगांव रवींद्र भवनांत इफ्फीचे सिनेमा दाखयतले, अशी म्हायती राजेंद्र तालक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
