भांगरभूंय | प्रतिनिधी
कावळो खांदयेर बसपाक आनी ती मोडपाक वेळूय लागना. ‘भांगरभूंय’ दिसाळ्यांतल्या आयताराच्या
‘विखुरिल्ल्या पानां’तल्या लिखाणाचें तेंच जालां. तीन दिसां आदीं त्या सदरांत कला अकादमीचेर राज्य विधानसभेंत आदले उपमुख्यमंत्री आमदार विजय सरदेसाय बोवाळ करतले, असो प्रस्न उप्रासायिल्लो. कला अकादमी फक्त एक कलेचो खांबो न्हय ती सृजनशिलतायेची वाट. ते वाटेर चलत हजारांनी व्हड जाल्यात, देश विदेशाच्या कोनशांनी पावल्यात. नामनेचे कलाकारूच न्हय साहित्यिकांच्यो, सिनेमाच्या दिग्दर्शकांच्यो, राजकारण्यांच्यो आनी भुरग्यांच्योय भावना जोडिल्ल्यो आसात. कला अकादमीच्या मुखेल थिएटराची न्हय तर उकत्या थिएटराच्या कोनशाची वणत, पाखें मोडटा तेन्ना अकादमी कडेन जोडिल्ल्यांच्या मना काळजाकय दुख्ख भोगता.
पाखें, वणत कित्याक मोडली, कोसळ्ळी? ती कालची, आयची क्रिया न्हय, बांदकामाच्या पोंदा उदक शिरकून, झिरपून उरिल्ल्यान मुळा सावन वणटी पडटात तेच वांगडा सवकासायेन, पोखरून कुडक्या, कपच्यांनी ती पडची ना व्हय? वणत पडची म्हूण तिका धपको दिला? आम आदमी पार्टेचे फुडारी इंजिनीयर वाल्मिकी नायक म्हणटात ते प्रमाण जतनाय न घेतिल्ल्यान वा नकळटा चूक जाल्ल्यानय पाखें मोडलां आसुये.
कला अकादमीच्या मुखेल वाठारांत वावर सुरू आसतना भायल्यान बारीकसाण घेतल्यार भितर कितें चल्लां तें सदांच त्या वाठारांत यो वच करतल्यांक कळटालेंच. भितरल्यो सुदारणा जातनाच अकादमीचे फाटले वटेन म्हळ्यार मांडवी न्हंयचे देगेर पांय वाटेर काँक्रिटाचें बांदकाम जालां. ती वाट पणजे मार्केटा लागीं धेंपो हावसा मुखार आशिल्ले पासये लागसार खासा परशुराम पुतळ्या पासत उबारिल्ल्या पुलाक तेंकल्या. त्या बांदकामा खातीर सामग्री हाडपाक कला अकादमीच्या ओपन अॅर थेटरा फाटल्यांतल्यान मातयेचो रस्तो जाला. लागसारूच आशिल्ल्या महावीर पार्कांतूय भुरग्यांक खेळपाक, कामगारांक रावपाक बांदकाम जालां. बांदकामांत हालीं मशिनरी हायटेक पूण जड क्रेन, शाॅवेल्स वापरतात, कला अकादमी, स्मार्ट सिटी आनी महावीर पार्कांतल्या बांदकामां खातीर मशिनरीचो उपेग जाला. कांपाला वेल्या नव्या वाॅक वे चेर चलपी, भोंवपी, बसपी, धांवपी शेंकड्यांनी आसात. तातूंत मशिनरी हाडटा, व्हरतना पळोवपी, दुबावय वर्सा सावन उक्तावपी आशिल्ले.
‘भांगरभूंयें’तल्या ‘इमेजीन पणजी’ माळेंतल्यान, ‘होमखण’ काॅलमांतल्या लिखाणांतल्यान साबार जाणांनी ते विशीं प्रस्न उप्रासायिल्ले. लिखाण गंभीरपणान घेतल्यार थिएटर, थिएटराचें पाखें वाटावतलें आशिल्लें, पूण धा वर्सां आदीं आदले आमदार, उपसभापती, कवी, लेखक विष्णू वाघ हे कला अकादमीचे अध्यक्ष आसतना ओपन क्लोज थेटराचो आराखडो जाल्लो. ओपन अॅर थिएटराच्या भोंवतणीचो, वातावरणाचो अभ्यास करून नवो आराखडो आर्किटेक्ट राजा खेडेकार हांणी केल्लो. त्या आराखड्याची येवजण कला अकादमींत चालीक लावपा पासत पोरण्या बांदकामाचेर बुलडोजर चलयला आसत? बांदकामांत आशिल्ले कंपनीन पयलींच्या पणजेचो, बदलिल्ल्या पणजेंतल्या वातावरणाचो अभ्यास केला? दीसपट्टे नदर दवरपी, कुशळ कामगार कंपनीत आसतलेच, रात-दीस तांणी वावर केला, पाखें मोडटकीचय कामकाज थांबिल्लें ना.
स्मार्ट सिटी आनी पणजेंतल्या हेर बांदकामांतल्यान वातावरणांत बदल जाल्यात, पावसय चड पडला. वातावरण बदलाचो, मांडवी न्हंयेच्या उदकाच्या बदलिल्ल्या प्रवाहाचो अभ्यास करून कला अकादमीचो फुडार थारावचो. कला अकादमीचो वाठार काँक्रिटा वांगडा पाचवोचार जाला, मुखेल थिएटर तीन चार म्हन्यां भितर सुरू करपाक अडचण ना. मोडिल्ल्या पाख्याची चवकशी राजकारण, राजकी पक्षां पसून पयस रावपी उंचेली कुशळटाय आशिल्ले गोंयांतले जाणकार करूंक शकनात?
चौकशेचीं नाटकां नाका, न्यायालयाचीय नदर कला अकादमीचेर आसा हें सगल्यांनी मतींत दवरचें.
कला अकादमीचो मांडवीदेगे वयलो वाठार पर्यावरण संवेदनशील आसा, पणजीच रेबकणांतल्यान उबारिल्ली. पणजी अजुनूय गोंयची राजधानी, येणावळ दिवपी आशिल्ल्यान ती सांबाळची पडटलीच. कला अकादमीच न्हय जाल्यार हेर दायज इमारती, वाठारांकूय राखण जाय. बांदकामांचेर शीम मेर, शिस्त येवपाची गरज आसा. स्मार्ट सिटी वेवस्थापना कडेन बोटां दाखोवन जापसालदारकी सोंपची ना, स्मार्ट वेवस्थापन गरजेचें. भौशीक बांदकाम, साधन सुविधा विकास म्हामंडळ, कला आनी संस्कृती खातें, म्हापालिका, स्मार्ट सिटीची इमेजीन पणजी कंपनीक पाख्यान धांवक लायलें. देखरेख हाचे फुडेंय आसची, पणजी तुमची, आमची, तांची, समेस्तांची, गोंयची, भारताची, विदेशाची, ती सोबीत, घटमूट उरची हें नदरेंतल्यान चवकशी जाय.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
