भांगरभूंय | प्रतिनिधी
गँगवाॅर, गुंडगिरी, दादागिरी, अंडरवर्ल्ड डाॅन हे आमच्या देशांतल्या कांय शारांक, गांवांक नवें न्हय. चंबळचें देंगण एका काळार डाकवां खातीर गाजतालें. ह्या आनी हेर गुंडगिरीचेर साबार हिंदी सिनेमा आयल्यात. त्या राज्यांचीं नांवां घेवप आयज लोक टाळटात, कारण….!! काळा प्रमाण गुंड बदल्ल्यात, तांच्या पद्धतीय, पूण गुंडगिरी उणी जावंक ना. तेन्नाचे गुंड राजकारण्यां पसून पयस रावताले. मात उपरांत तांणी तांचे कडेन दोस्ती केली. थोडे राजकी मळाचेरुय आयले. ते मुळचे गुंड म्हणून आमकां तांची वळख आसा, पूण तांचे परस खांपे गुंड आसात, जे राजकी पड्ड्या फाटल्यान लिपून रावल्यात. तांचें रुप सोंपेपणी उक्ताडार येना. वायट मार्गाचेर चलप्यांचो अंत वायटूच जाता, अशें म्हणटात. हो अंधविस्वास जायते फावटी खरोय थारला. पूण, लोक चुकीचो मार्ग कित्याक माड्डितात, ताचेरुय विचार जावप गरजेचें. म्हणटकच तांकां उजू वाटेर हाडपाक मेळटलें. तशे लोक आयल्यातूय बी, पूण जायते खेपे समाज तांकां लागीं धरिना. गुंड, मवाली, खूनी म्हणून म्होर बसली काय ती सहजासहजी पुसून वचना.
आमच्या शांत, सोबीत गोंयांत पसून 40 वर्सां पयलीं उक्तेपणी गुंडगिरी चलताली. कांय गांव ते खातीर बदनाम आशिल्ले. लोकांक राखण दिवपाच्या नांवा खाला थंय दादागिरी चलताली. मात, मदल्या काळांत थंयचे लोक सुदारले आनी गुंडगिरी लागीं लागीं सोंपली, पूण आतां परतून ती सुरू जावपाक लागल्या, अशें दिसता. हातूंत सगले भायलेच घुस्पल्ले आसतात, असो एक गोड गैरसमज आमचे मदीं सदांच पातळिल्लो आसता. पूण तो चुकीचो हें पुराव्यान सिद्ध जालां. दोन दिसां पयलीं मेरशे गोलतकार नांवाच्या एका गँगस्टराचो खून जालो. अपमानाचो सूड घेवपाक हें कृत्य केलां अशें पुलिसांचें म्हणणें. दोन सख्ख्या भावां सयत चवगांक ताब्यांत घेतल्यात. काल एका पुलीस प्रशिक्षण घेवपी तरणाट्याक अटक जाल्या. जाचो खून जालो, त्या गोलतकाराचेरुय बरेच आरोप आसात. 2017 वर्सा मेरशे पर्यटन कुटुंबाक मारपेट जाल्ली, तातूंत ताका अटक जाल्ली. कॅरम खेळटना वाद जालो म्हूण गाडयो लासपाचो प्रकार जाल्लो. 2020 च्या जूनांत गँगवाॅर जाल्लें तातूंतय ताचो हात आशिल्ल्याच्या आरोपा वयल्यान ताका अटक जाल्ली. ह्या वाठारांत केस्तांवां जावन मागीर मारामारी जावपाचेय प्रकार घडल्यात. हालींच जयेश चोडणकार ह्या टॅक्सीकाराची कूड थंय मेळिल्ली. ताच्या पांयांक गंभीर दुखापत जाल्ली. घरच्यांनी प्रकरण लावन धरतकच खुनाचें कलम लावन दोगांक अटक केल्ली. हातूंतय एक पुलीस आसा. मेरशेच्या प्रकरणां कडेन आशिल्ल्या पुलीस कनेक्शनाचेर उजवाड पडपाक जाय. हे पुलीस थंय कित्याक, ताची चवकशी जावप चड गरजेचें. हीं प्रकरणां उक्ताडार आयलीं. अशीं आनीकूय प्रकरणां आसूं येतात, जांची सुलूस पसून कोणाक लागूंक नासतली वा लागपाक दिवंक नासतली! मेरशेच्या दोन घडणुकांनी थेट पुलीस घुस्पल्ल्याचें उक्ताडार आयलां. पुलीस खात्याक लागिल्लो हो दाग. तो पुसपाक आतां मुखार ते कितें पावलां उखलतात, तें दिसतलेंच.
म्हारगाय वाडली काय चंगळवादाची संवय जाल्ल्यांक पयशांचो उणाव भासपाक लागता. कारण सद्दां मचमचींत खावप, पिवप आनी हेर गजाली करपाची संवकळ जाल्ली आसता. मागीर भ्रश्टाचाराचे मार्ग नोकरेक आशिल्ले आपणायतात. उरिल्ले घुंवळे वखदां विकपाच्या, चोरपाच्या रस्त्याचेर पावल दवरतात. तर थोडे खंडणी, प्रोटेक्शन मनी बी घेवन जोडटात. मागीर 2- 3 टोळयो करून ते वेवसायिकांक लुट्टात. कोणे वाडी वाडलीच ना जाल्यार ताका जिवेशीं मारप. मुंबय एका काळार गँगवाॅरां जातालीं ताचे फाटलें कारण हेंच. ह्या सगल्या वेव्हारांत झटपट पयसो मेळटा. कश्ट करीनासतना पांच वर्सां भितर कोट्याधीश जावपाक मेळटा. मागीर कोणाक आसचें ना, हाचें आकर्शण? ह्या ‘गल्ली का दादां’ चें पुलीस आनी राजकी फुडाऱ्यां कडेन लागींचे संबंद आसतात. ह्या गुंडांक सर, भाई म्हणपी व्हडले अधिकारी, फुडारी आसात! निमणो सगलो पयश्यांचो खेळ!!
गोंय हें शांतिकाय आशिल्लें राज्य अशें आमी म्हणटात, पूण तें खऱ्यांनीच तशें आसा व्हय, हाचो दरेकल्या गोंयकारान विचार करपाक जाय…. आनी हाचेर उपायूय
काडपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
