भांगरभूंय | प्रतिनिधी
गाडयो, घोडे, मोटार सायकली आनी सायकली हीं जालीं गिरेस्तकायचीं लक्षणां… उरल्यो त्यो बशी… लागीं वचपाक इकरा नंबर आनी पयस वचपाक चार स रोदांची बस… आवांताद बस, झमझमीत वारें आनी नाकान भरपी वास… तेलकट, नुस्त्याचो, घामेचो, आनी सकाळीं उसरां उठल्यार गडबडेन सगले जाग्यार वडोवपाक विसरून बस धरपाच्या कळवळ्यान भायर सरिल्लो वास… दुयेंत मनीस आपल्या आंगार थापिल्ल्या वखदांचो घमघमाट घेवन ‘बाबा!! मातसो बसपाक दिता?’ म्हण आशेन बाबडो जावन आंग घश्टेवपी.
‘फुडें सर’ अशें आकांतान आनी तळमळेन सांगपी एकटोच, बशीचो कंडक्टर, मनांत आस तयार करपाची शक्त आशिल्लो अंतरयामी मनीस म्हणल्यार कंडक्टर, ‘अतें सीट खाली जातले थंय उबो राव.’ मुंयेक मुसाकय भोंवपाक जागो आसचो ना पूण त्या दुरदृश्टी आशिल्ल्या मनशाक ‘कितलो जागो आसा मरे, भितर सरकय,’ म्हणपाचें तत्वगिन्यान हो असादारण मनीस दिता. मनशां मनशां भितर एकचाराचें ब्रिद झळकयत, ‘बाबा मातसो तेंकून राव’ म्हणपी हो म्हान आत्मो.
ताका जबाबदारी घेवपाची तांक ताच्या उतरार विश्वास दवरून दोन पावलार देंवपी, आमल्याच्या दोणान खचाखच भरिल्ल्या आमल्यांतल्यान चिड्डत मुड्डत फाटल्यान सरकतल्या आमच्या सारक्या अतीसामान्यांक अणभव येता. हातांत ना येवपी जिणेर कशें चडप आनी वयल्यान ‘या, या, वच वच’ असो नेट जिणेक दिवप हें शिकपा सारकें. देव जावपाक एकच बोटान चुकिल्लो तो, दोन बोटांच्या गाचान हजारांच्यो नोटी सांबाळपाची कुशळटाय ताचे कडच्यान शिकची.
आरक्षणाच्यो कुबड्यो निखळावन फुडें सरपाच्या यत्नान कांय बायलो दिल्लें आरक्षण सोडून जनरलांत बसतात. पूण रितें सीट दिसलें म्हणून बसल्यार तांच्या मदली काली भायर सरता, पूण आरक्षण न्हयकारून दुसऱ्याल्या सिटार बशिल्लीं न्हिदेचें ऑस्कर विनिंग सवंग करतात. तरणाट्यांचे पांय चड दुखूंक लागल्यात. जाणटेलो चडलो काय कानांत आवाज वाडोवन भायर पळयतात, घुघूम सुद्दा इतली मान मोडपाक शकना ताचे परस हांची मान मोडटा.
दनपारची सरकारी बस तर सांगूं नजो. जगांतले सगले वाजंत्री एकठांय करून नव्या उमेदीचें वाजंतर वाजोवपी बस. ए.आय. च्या जगांत सगल्यांत पयलीं उणेच विशेक वर्सां फाटीं ह्या बसींनी मनीसरहीत वाजंतराचो सोद लायलो. तो हारशाचो खर्रर्र असो एकसुरो आवाज, तर नट सैल जाल्या सिटाचो ताका ठेको. आनी त्या ठेक्यार जार जावन लकपी आमी. केन्ना केन्ना तर मोडक्या सिटांनी लोकांक योग शिकयला, जशें शिर्शासन, तकली सकयल पांय वयर. पावरफूल मालीश जाता ती वेगळी.
पावसा दिसांनी जितली सत्री भायर भिजना तितली ती बसीच्या भितर भिजता. घडये बशीच्या धनयाक मनाक आस आसत, नवीन बस किल्लल्यार चड जोड जातली म्हणून तो पावसा पयलीं ताचेर ताडपत्री घालपाक मुद्दम विसरता.
ह्या प्रवासाचो अणभव घेवंक नाशिल्ल्या मनशान जीण पुरायपणान जगली म्हणपाक येना.
सारंग अग्रासनी
9921868202
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
