टीम इंडियाची झणझणीत जैतान सुरवात

भांगरभूंय | प्रतिनिधी

भारतान येजमान वॅस्ट इंडिजा आडचे पयले टॅस्टींत झणझणीत जैत जोडलें. एक वटेन जाल्ले मॅचींत ताणें माळेंतली पयली टॅस्ट डाव आनी 141 धांवड्यांनी जिखली. ह्या जैतान भारतान 1-0 अशा फरकान आघाडी घेतली. दुसरी टॅस्ट 20 जुलय सावन पोर्ट ऑफ स्पेनांत सुरू जातली.

टॉस जिखून पयलीं बॅटींग करपाचो निर्णय घेवपी वॅस्ट इंडिजाक व्हड धांवसंख्या उबारपाक जमली ना. भारतान ताचो डाव फकत 150चेर सोंपयलो. ते उपरांत यशस्वी जयस्वाल आनी रोहित शर्मा हांच्या शेंकड्या नेटार भारतान आपलो पयलो डाव 5 बाद 421 धांवड्यांचेर घोशीत केलो. अशे तरेन भारतान पयल्या डावांत 271 धांवड्यांची आघाडी घेतली. दुसऱ्या डावांत लेगीत वॅस्ट इंडिजाच्या बॅट्समनांक भारताच्या बॉलरां मुखार तग धरपाक जमलो ना. ताचो दुसरो डाव 130चेर सोंपलो.

संवसारीक टॅस्ट वस्तादपण सर्तीचे फायनल मॅचींतल्यान भायर दवरिल्लो आर आश्विन आनी पदार्पण करपी यशस्वी जयस्वाल जैताचे हिरो थारले. आश्विनान मॅचींत 12 विकेटी घेतल्यो पयल्या डावांत पांच आनी दुसऱ्या डावांत सात विकेटी मेळयल्यो, जाल्यार जयस्वालान 171 धांवड्यांची खेळी केली. ताची प्लेयर ऑफ द मॅची खातीर निवड जाली. ह्या दोगां खेरीत मुखेली रोहित शर्मान लेगीत मोलादीक योगदान दिलें. ताणें 103 धांवड्यांची खेळी केली.

टर्न जावपी खेळपट्टीचेर रोहित शर्मान आर आश्विन आनी रवींद्र जडेजा हांचेर पुर्ण विस्वास दवरून तांकां चडांत चड ओव्हरी दिल्यो. दोगांनीय 20तल्यो 17 विकेटी घेतल्यो. आश्विनान कारकिर्दींत 34वे खेपे एका डावांत पांच विकेटी घेवपाचो पराक्रम केलो.

मजगतीं, भारतान आपलो डाव घोशीत केल्या उपरांत सुरवातीच्यो चार ओव्हरी फास्ट बॉलरांनी घाल्यो ते उपरांत जडेजा आनी आश्विन ह्या स्पिनरांनी सगलीं सुत्रां आपल्या हातांत घेतलीं. दोगांयनी थारावीक अंतरान विकेटी घेतल्यो.

जडेजान भारताक पयलें येस मेळोवन दितना तेजनारायण चंद्रपॉलाक (12) एलबीडब्ल्यू बाद केलो. ते उपरांत आश्विनान दुसरो ओपनर आनी मुखेली क्रेग ब्रेथवेटाची (20) विकेट घेतली. दोगूय विकेटी घेत आसतना मोहम्मद सिराज आयलो. ताणें एक विकेटी घेतली. विंडिजाचो अर्दो पंगड 58 धांवड्यांचेर तंबूंत परतून गेल्लो.

जेसन होल्डर आनी थळावो खेळगडो एलिक अथानाझे हांणी विंडिजाचो डाव सांबाळपाचो यत्न केलो. पयल्या डावांत 47 धांवड्यो करपी अथानाझेन दुसऱ्या डावांत लेगीत कांय आकर्शक शॉर्ट मारले. पूण, वैयक्तीक 28 धांवड्यांचेर ताका आश्विनान तंबूंत धाडलो. ताच्या फाटोफाट अल्झारी जोसेफाक (13) बाद केलो. आश्विनाची ही दुसऱ्या डावांतली चवथी विकेट थारली. ते उपरांत ताणें आनीक दोन विकेटी घेतल्यो. टॅस्टींत 10 विकेटी घेवपाची ताची ही आठवी खेप.

इशांत शर्मा (10-108) उपरांत मॅचींत धा विकेटी घेवपी आश्विन भारताचो पयलो बॉलर थारलो. भारता खातीर आंतरराष्ट्रीय क्रिकेटींत सगल्यांत चड विकेटी घेवपाचे वळेरेंत आश्विन दुसरे सुवातेर पावलो. अनील कुंबळे 953 विकेटी घेवन पयले सुवातेर आसा. आश्विन 708 विकेटी घेवन दुसरे आनी हरभजन सिंग 707 विकेटी सयत तिसरे सुवातेर आसा.

—————

भारत पावलो पयले सुवातेर

भारतान ह्या जैता सयत आयसीसी संवसारीक टॅस्ट वस्तादपण सर्तीचे गुणतकट्यांत पयले सुवातेर पावलो. संवसारीक टॅस्ट वस्तादपण अंतर्गत खेळिल्ले मॅचींत भारताचे 12 गूण जाल्यात. ताणें ऑस्ट्रेलियेक दुसरे सुवातेर धुकल्लो.

संवसारीक टॅस्ट वस्तादपण सर्तीचे तिसरे आवृत्तींत आतां मेरेन चार पंगडांनी किमान एक मॅच खेळ्ळ्या. भारता खेरीत हे वळेरेंत ऑस्ट्रेलिया, इंग्लंड आनी वॅस्ट इंडिजाचो आस्पाव आसा. ऑस्ट्रेलिया पयलीं पयले सुवातेर आशिल्लो. ताणें इंग्लंडा आडच्यो दोन मॅची जिखिल्ल्यो. पूण, तिसरे मॅचींत ताका हार घेवची पडली. ऑस्ट्रेलियेचे 22 गूण आसात आनी भारता फकत 12 तरी पूण, भारतान एकूय हार घेवंक नाशिल्ल्यान भारताची गुणांची टक्केवारी 100 आसा.