भांगरभूंय | प्रतिनिधी
भारतीय क्रिकेट नियामक मंडळान (बीसीसीआय) चीनांत जावपी आशियायी खेळां सर्ती खातीर भारताचो दादल्यांचो आनी बायलांचो क्रिकेट पंगड धाडपाचो निर्णय घेतला. बीसीसीआयन दोनूय पंगडांची घोशणा केली. आशियायी खेळां सर्ती वेळार संवसारीक वन डे क्रिकेट सर्त जावपाची आसा, ताका लागून भारतान दुसऱ्या दर्जाचो पंगड आशियायी खेळां सर्ती खातीर धाडपाचो निर्णय घेतला.
सर्तींत ऋतुराज गायकवाडाच्या फुडारपणाखाला भारत खेळटलो. क्रिकेट खेळां प्रकारांत 18 पंगड वांटेकार जावपाची शक्यताय आसा. पूण, भारत थेट उपांत्यपुर्व फेरयेंत खेळटलो. ताका लागून फकत तीन मॅची जिखून भांगरा पदक जिखपाची संद पंगडा कडेन आसा.
28 सप्टेंबर ते 8 ऑक्टोबर ह्या कालावधीत आशियायी खेळां सर्त जातली. ते खातीर बीसीसीआयन 15 वांगडी आनी 5 राखीव खेळगडे धरून 20 जाणांची नांवां जाहीर केल्यात. पयल्या क्रमांकाचो पंगड म्हणून भारत वांटेकार जातलो. ताकाच लागून भारताक थेट उपांत्यपुर्व फेरयेंत खेळपाची संद फावो जाल्या.
ऋतुराज सयत अंदूंची आयपीएल गाजोवपी चडश्या युवा खेळगड्यांक सर्ती खातीर वेंचिल्ल्या पंगडांत सुवात दिल्या. पंजाब किंग्सच्या अर्शदीप सिंग, राजस्थान रॉयल्साच्या यशस्वी जयस्वाल, कोलकाता नायट रायडर्साच्या रिंकू सिंग हांची पंगडांत निवड केल्या.
हाचे पयलीं 2010 आनी 2014त जाल्ले आशियायी खेळां सर्तींत क्रिकेटीचो आस्पाव केल्लो. पूण, बीसीसीआयन पंगड धाडूंक नाशिल्ले. आशियायी खेळां सर्त पोरूं जावपाची आशिल्ली. पूण, कोरोना महामारीक लागून ती मुखार धुकल्ली. दादल्यांच्या गटांत श्रीलंका आनी बांगलादेश ह्या पंगडांनी भांगरा पदक जिखलां. दुसरे वटेन बायलांच्या गटांत पाकिस्तानान दोनूय खेपे वस्तादपण जोडलां.
पंगडः ऋतुराज गायकवाड (मुखेली), यशस्वी जयस्वाल, राहुल त्रिपाठी, तिलक वर्मा, रिंकू सिंग, जितेश शर्मा (विकेटकीपर), वॉशिंग्टन सुंदर, शाहबाज अहमद, रवी बिश्नोई, आवेश खान, अर्शदीप सिंग, मुकेश कुमार, शिवम मावी, शिवम दुबे, प्रभसिमरन सिंग (विकेटकीपर), राखीव खेळगडेः यश ठाकूर, साई किशोर, वेंकटेश अय्यर, दीपक हुड्डा आनी साई सुदर्शन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
