भांगरभूंय | प्रतिनिधी
भांगरभूंय । खबरां संस्था
पुणे : मराठी सिनेसृश्टींतले ‘विनोद खन्ना’ म्हूण जांकां पाचारताले, ते अभिनेते रवींद्र महाजनी (७४) संवसाराक अंतरले. तळेगांव दाभाडे लागसारच्या आंबी गांवांतल्या फ्लॅटांत तांची कूड मेळ्ळी. २-३ दिसां पयलीं तांकां मरण आयलां, अशें पुलिसांनी सांगलें. फाटले आठ म्हयने ते थंय एकलेच रावताले. सध्या ते बांदकाम वेवसायांत आशिल्ले. फ्लॅटांतल्या दुर्गध येता म्हूण शेजाऱ्यांनी कागाळ केली, तेन्ना हो प्रकार उक्ताडार आयलो. तांच्या देवता सिनेमांतल्या ‘खेळ कुणाला दैवाचा कळला?’ ह्या गीताची याद तांच्या चाहत्यांक आयले बगर रावली ना. अभिनेतो गश्मीर महाजनी हो तांचो पूत.
सुरवातेक टॅक्सी ड्रायव्हर म्हूण ते काम करताले. व्ही शांताराम हांणी तांकां १९७५ त ‘झूंज’ सिनेमांत पयले खेपे काम दिलें. मागीर तांणी लक्ष्मी (१९७८), दुनिया करी सलाम (१९७९), गोंधळात गोंधळ (१९८१), मुंबईचा फौजदार (१९८५), उपरांत देवता, देवूळ बंद, देवघर, हळदी कुंकू, आराम हराम आहे, थोरली जाऊ, सून माझी लाडकी, कळत नकळत, लक्ष्मीची पावले, चांदणे शिंपीत जा, हीच खरी दौलत, चोरावर मोर, सावली प्रेमाची अशा साबार सिनेमांनी काम केलें.
महाजनी हांणी दिग्दर्शक, निर्माते म्हूणय काम केलां. १९९७ च्या ‘सत्तेसाठी काहीही’ ह्या सिनेमाचें दिग्दर्शन आनी निर्मिती तांणी केल्या. निसर्ग राजा ऐक सांगतो, दत्त दर्शनाला जायाचं, कोण होतास तू अशी तांचीं बरींच पदां गाजल्यांत.
महाजनी हांचो पूत गश्मीर मुंबय रावता. पोस्ट मार्टेमा उपरांत कूड गश्मीर हांचे कडेन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
