‘मड’गांवचो चिरंतन कोयर

भांगरभूंय | प्रतिनिधी

आतां दरेक तालुक्यांत साळगांवां आसा तसलो वा ताचे परस उणे तांकीचो कोयर विलो प्रकल्प उबारपाचो वेळ आयला.

वर्स अखेरे मेरेन गोंयच्या रस्त्यांचेर प्लास्टीक, कोयर दिसचो ना, अशी घोशणा जावन आतां सादारण 11 वर्सां जायत आयलीं, पूण हो कोयर वाडतूच आसा. फाटल्या कांय वर्सांनी तर ताणें वेवसायाचें रुप घेतलां. म्हणल्यार कोयराचेर वर्साक लाखांनी रुपया जोडपाक मेळटात. शॅडो कावंसील फाॅर मडगांव हे मडगांव पालिकेच्या कारभाराचेर बारीकसाणेन लक्ष दवरपी संस्थेन कांय गंभीर आरोप, टिका केल्या, ती ह्या कोयरा संबंदीच आसा. ‘जगप्रसिद्ध’ सोनसडो (भांगराचो शिताडो काय भांगराचें पठार?) यार्डांतल्या कोयराचेर आमी परत – परत सांगून सुद्धा प्रक्रिया जायना. फक्त प्रतिज्ञापत्रां सादर करप आनी आयचें काम फाल्यां धुकलप इतलेंच चल्लां. कोयराचो विलो लावपाक लाखांनी रुपया खर्च जातात, मात कोयर प्रक्रिये विणें पडून आसा, अशें शॅडो कावंसिलान म्हणलां. हो कोयर साळगांवां प्रक्रिया करपाक धाडपाचो वेळ आयिल्ल्याची टिकाय तांणी केल्या. गोंयांतली कोयराची समस्या पळयल्यार आतां दरेका तालुक्यांत साळगांवां आसा तसलो वा ताचे परस उणे तांकीचो कोयर विलो प्रकल्प उबारपाचो वेळ आयला. सरकारान पालिका, पंचायतींच्या साह्यान ते नदरेन आतांच पावलां उबारल्यार बरीं.
देशभरांतल्या राज्यांतलीं सरकारां झपाझप कामां करिनात देखून न्यायालयांक हस्तक्षेप करचो पडटा. सोनसड्या संबंदी शॅडा कावंसिलान न्यायालयाकूच उलो मारला. नागरिकांक सध्या कोयराक लागून त्रास, मनस्ताप सोंसचे पडटात. सोनसड्या वयल्या कामां खातीर साबार वेळा न्यायालयान मुजत वाड दिल्या. तरीय हें काम जावंक ना. हे खातीर पांच मुख्यमंत्र्यांनी अध्यक्षपद सांबाळिल्ली वेवस्थापन समिती जापसालदार आसा, असोय आरोप तांणी केला. समितीच्यो बसका जातात, पूण कोणाक तरी फायदो जातलो, अशे तरेन निर्णय घेवपाचे प्रकार घडल्यात, असोय तांचो दावो. शॅडो कावंसील म्हणटा, ‘96 हजार क्युबीक मिटर कोयर आसा अशें सांगून 5 कोटींचें अदमास पत्रक केल्लें. मागीर कोयर 2.31 लाख क्युबीक मिटरांचेर पावलो आनी ही रक्कम 43 कोटींचेर पावली. एका कामाची एक निविदा काडिनात. पाख्याचें काम एकल्याक आनी बुन्यादीचें काम दुसऱ्याक दितात.’ वेवस्थापन समितीन हाचेर स्पश्टीकरण दिवन मडगांवकारांच्या मनांतलो दुबाव बेगोबेग पयस करूंक फावो. समिती वयल्या प्रामाणीक, देवमनशांनी ओगीच कित्याक चिखलांत स्वताचे हात- पांय बुडोवन घेवचे? सोनसड्याची समस्या ही चिरंतन. कितलींशींच वर्सां ती आसा. अश्वत्थामाचो घावो एकवेळ पेखत, पूण न्हय हो सोनसडो. कोयराचो हो प्रस्न केन्ना सुटावो जातलो काय?
सोनसड्यार हें अशें, तर तेवटेन मार्केटांत दुसरेंच. नुस्त्या मार्केट वाठारांतल्यो कोयराच्यो राशी ना करपाक अपेस आयिल्ल्यान एसजीपीडीएचें मंडळ बरखास्त करचें, अशी मागणी काँग्रेसीन केल्या. मडगांव पालिका आनी एसजीपीडीए एकमेकां कडेन बोटां दाखयतात, पूण मार्केटांतली कोयर समस्या कोणूच हात उखलिनात. ताका लागून दुयेंसां पातळपाक शकतात. हालींच नुस्तें कातरून दिवपी नुस्तेकारांनी कोयराची समस्या सगल्यांचे नदरेक हाडून दिल्ली. राखणे वणत, फुटपाथीचेर कोयर दिसता. पालिकेन कोयराचीं बल्लां दवरूंक नात? हो कोयर दरदिसा पालिका उखली ना? मागीर कोयराच्यो राशी कश्यो जातात? मडगांवूच न्हय, तर गोंयांतले भोवतेक सगलेच बाजार, खास करून नुस्त्याचे बाजार सामके हळशीक, बुरशे आसतात. हाका जापसालदार कोण? शक्य आसल्यार थारावीक वेळार पालिकेची कोयरा गाडी बाजारांत हाडून नुस्तेकारांक, हाॅटेलकारांक तांचो कोयर तातूंत रकोवपाक सांगपाक जाय. घरांतलो कोयर एकठांय करतात, तसोय हो कोयर एकठांय करूं येता.
मिरामार दर्यावेळ नितळसाण कार्यावळी खातीर सरकारान एकाच दिसा 84 लाख रुपया मोडिल्ले, अशें काँग्रेसीन म्हणलां. हो पयसो मार्केट नितळसाणीचेर खर्च करूं येतालो, अशें तांकां दिसता. फक्त शारांतल्यो पालिकाच न्हय, तर सगल्या पंचायतींनीय मार्केटां नितळ उरतलीं हाची जापसालदारकी घेवपाक जाय. कारण मार्केटाचो आमच्या आहार, भलायके कडेन संबंद आसा. म्हणटकूच नितळसाण ही जायच. बाजार बुरशे दवरप हो ‘स्वच्छ भारत, नितळ गोंय’ मोहिमेचो प्रत्यक्ष अपमान. मडगांव हें गोंयांतलें दुसऱ्या क्रमांकाचें राज्य. संस्कृतीक राजधानी म्हूण ताचे कडेन एका काळार पळयताले. ताची अशी आवतिकाय जावप बरें न्हय. ‘मड’गांवांतलो चिखल, कोयर नश्ट जावचो, अशी दामबाबा कडेन प्रार्थना करुया.