भांगरभूंय | प्रतिनिधी
खबरां संस्था
नवी दिल्लीः आशियाई खेळां सर्त लागीं पावल्या मात भारतीय कुस्ती अजून वादांतल्यान भायर पडपाक शकली ना. भारतीय पंगड वेंचून काडपाचे प्रक्रिये विशीं वाद आसा. वेगवेगळ्या गटांतल्या कुस्तीगीरांच्या उक्त्यो चांचणी 22 आनी 23 जुलयाक दिल्लींतल्या केडी जाधव इनडोअरर स्टेडियमांत जातल्यो. ह्या चांचण्यांतल्या जैतिवंतांची पंगडांत निवड जाता. मात हे फावट तशी परिस्थिती ना.
उक्ती चांचणी जिखल्यो तरी कुस्तीगीरांक आशियाई सर्ती खातीर ते पात्र आसात काय ना हें कळपा खातीर तांका प्रतिक्षा करची पडटली. खेळां मंत्रालयाचे सुचोवणे प्रमाण सध्या भारतीय कुस्ती म्हासंघाची जापसालदारी आशिल्लया अॅडहॉक समितीन ब्रिजभूषण शरण सिंह हाचे आड आंदोलन करपी 6 कुस्तीगीरांक चांचणेतल्यान सूट दिल्या. 8 तें 10 ऑगस्ट मजगती तांची स्वतंत्र चांचणी घेतले अशें समितीन सांगलां. आलिम्पीक पदक जैतिवंत बजरंग पुनिया आनी साक्षी मलिक हांच्या सयत विनेश फोगाट आनी हेर कुस्तीगीरांचो तातूंत आसपाव आसा.
23 जुलय ही आशियाई सर्ती खातीर भारतीय कुस्तीगीरांचीं नांवा जाहीर करपाची निमाणी तारीक आसा. तो मेरेन ऑलिम्पीक कावंसील ऑफ इंडिया कडेन(ओसीए) नांवां धाडलीं ना जाल्यार भारतीय कुस्ती पंगडाक हे सर्तींत वांटेकार जावपाक मेळचें ना. समिती उक्ते चांचण्यां वरवी पंगड वेंचून काडटली आनी आंदोलनांत वाटेकार जाल्ल्या कुस्तीगीरांचीं नावा स्टँडबायांत दवरतले. 10 ऑगस्टक उक्ते चांचणीत बरी कामगिरी करपी कुस्तीगीर आनी तांचे मदीं कुस्ती जातल्यो आनी स्टँडबायांत आशिल्ले जिखल्यार तांचो आसपाव भारतीय पंगडांत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
