भांगरभूंय | प्रतिनिधी
खबरां संस्था
डॉमनिकाः भारत आनी वेस्ट इंडिज हांचे मदल्या पयले टॅस्ट मॅचींत दुसऱ्या दिसा शेंकडो करपी यशस्वी जयस्वाल हाच्या दोट्टी शेंकड्या कडेन क्रिकेट मोगीचें लक्ष आशिल्लें. मात तिसऱ्या दिसा 16 चौके आनी एका चौक्यान 171 धांवड्यो करून तो आवट जालो. दोट्टी शेंकडो करपाक ताका 29 धांवड्यो जाय आशिल्ल्यो तेन्ना अल्झारी जोसेफान ताका कॅच आवट केलो. ताची ही खेळी आनी कॅप्टन रोहीत शर्माचो शेंकडो (103) हाका लागून तिसऱ्या दिसा उपहारा मेरेन भारतान 4 आवट 400 धांवड्यो करून 250 धांवड्यांची आघाडी घेतिल्ली विराट कोहली 72 धांवड्यो करून शेंकड्याचे वाटेर आशिल्लो.
तिसऱ्या दिसा शुभमन गील (6) आनी अजिंक्य रहाणे (3) आवट जाल्या उपरांत विराट कोहली आनी रवींद्र जडेजा हांणी भारतीय डावाची सूत्रां आपल्या हातांत घेतली. उपहाराच्या वेळार जडेजा 21 धांवड्याचेर खेळटाले. जयस्वालान 387 बॉलांत 171 धांवड्यो करून एक विक्रम केलो. टॅस्ट पदार्पणात इतल्यो धांवड्यो करपी तो तिसर भारतीय बॅट्समन थारला. 2013 वर्सा मोहालीत ऑस्ट्रेलिये आड शीखर धवनान ओपनर म्हणून 183 धांवड्यो केल्लो. ताचे पयलीं रोहीत शर्मान 177 धांवड्यो केल्ल्यो.
टॅस्ट पदार्पणात जयस्वाल दोट्टी शेकडो करपाक अपेशी थारलो. मात विदेशी भूंयेर टॅस्ट पदार्पणात भारता खातीर सगल्यांत चड धांवड्यो करपी तो बॅट्समन थारलो. गुंडप्पा विश्वनाथान 1969 वर्सा पदार्पणाचे टॅस्टींत 137 धांवड्यो केल्लोय आनी यशस्वीन 171 धांवड्यो करून ताका फाटीं उडयलें.
22 वर्सांचो विक्रम मोडलो
कॅप्टन रोहीत शर्मा आनी यशस्वी जयस्वाल ह्या भारताच्या ओपनरांनी शेंकडे करून पयले विकेटी खातीर 229 धांवड्यांची भागिदारी केली. शेकड्याचे खेळा सयत तांणी 22 वर्साचो पोरणो विक्रम मोडलो. 2002 वर्सा मुंबयच्या वानखेडे स्टेडियमाचेर विरेंद्र सेहवाग आनी संजय बांगर हांणी पयले विकेटी खातीर 201 धांवड्यांची भागिदारी केल्ली. रोहीन-यशस्वी जोडयेन तो वेस्ट इंडिजांत मोडलो.
रोहितान 10 चौके आनी 2 सक्यांनी 103 धांवड्यो केल्यो. दोनूय ओपनरांनी जायते विक्रम मोडले. वेस्ट इंडिज भूंयेर शेकड्यांची भागिदारी करपी रोहीत-यशस्वी ही 2006 उपरांतची पयली जोडी थारल्या. कॅरेबियनांत फकत चार भारतीय ओपनर जोडयांनी शेंकड्याची भागिदारी केल्या. 1971 वर्सा सुनील गावस्कार -अशोक मंडक जोडेयेन 123 धांवड्यांची नाबाद भागिदारी केल्ली. गावस्करान अंशुमन गायकवाडा वांगडा शेंकड्याची भागिदारी केल्ली. वीरेंद्र सेहवाग आनी वसीफ जाफर हांणी 2006 वर्सा 159 धांवड्याची सलामी दिल्ली. 17 वर्सां उपरातं रोहीत- यशस्वी जोडयेन व्हो विक्रम मोडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
