भांगरभूंय | प्रतिनिधी
समाजांत परिवर्तन घडोवन हाडटलो जाल्यार पयलीं मनशाक समाजभान आसूंक जाय. ताचे कडेन संवेदनशीलताय आसपाक
जाय. दर एका मनशान समाजाचे जडण घडणींत आपलें योगदान दिवप गरजेचें आसता. मनीस हो समाजाचो एक म्हत्वाचो घटक. ताची जीण समाजाचेर आधारून आसा, आनी तो आसा म्हूण समाज आसा. ताका समाजा पसून वेगळावंक नजं, आनी म्हणून दर एकल्यान समाजाचे प्रती आपणाल्या कर्तव्याक प्रमाणीकपणान पाळो दिवंक जाय. पूण खरेपणी कोण दिता हो मोटो प्रश्न? चडशे लोक आपले मर्जे प्रमाण जियेतना दिश्टी पडटात. समाजाचें नितिमत्तेचें कोणाक पडून गेल्लें ना. समाज माल्लो झक. जो तो आपलेंच चित्ता. समाजाचें कोणाकूच लागून गेल्लें ना. समाज रसातळाक गेलो म्हूण तांकां (समाज विद्वाट्यांक) कांयच फरक पडना. आरे पूण समाजांत जें कितें वायट घडटा ताचे बरें – वायट परिणाम नकळत तुज्या म्हज्या घरांत रिगता तें आमकां दिसना.
कांय जाण समाजा खातीर भरपूर धडपडटात, पूण तांकां फावो तशें लोकां कडल्यान सहकार्य मेळना. उरफाटें लोकूच भ्रश्टाचाराक सारें उदक घालीत आसतात. हांगासर दर एकलो आपूण वयर सरपाक समाजाचो (दुर्बळ लोकांचो) वापरूच करतना दिश्टी पडटा. आमी चडावत लोक समाजा कडल्यान फक्त घेता, परतफेड करपाचें नांव काडिनात. असल्यांनी समाजाचो उध्दार कसो जातलो? आयजवेर आपणें समाजा खातीर कितें योगदान दिलां? हाचें दर एकल्यान आत्मपरिक्षण करपाक जाय. कारण ज्या समाजांत हांव वावुरता त्या समाजा खातीर समाजाच्या हिता खातीर म्हजी कसली तरी लागणूक आसा म्हणपाचें म्हाका भान आसूंक जाय. आमच्या हाताक फक्त घेवपाचीच सवंय न लायता, दुसऱ्याक दिवपाचीय संवय लावपाक जाय.
आमी आमचें घर निवळ दवरतात. आमी आमच्या घरांत आमकां जाय त्यो सगल्यो सुविधा निर्माण करतात. मागीर गांवाक, समाजाक लागपी सुविधा कोणें निर्माण करपाच्यो? गांवांत समृध्दी कोणें हाडपाची? गांवच्या सरपंचान मूं? सरपंचाक तेंको दिवंक आमी ग्रामपंचायतींनी जावपी ग्रामसभांक व्हड संख्येन हाजीर रावन भौसाचे प्रस्न मांडपाक नाका? पंचाक, सरपंचाक जागे करूंक नाका? आयज समाजसेवा करप म्हणल्यार राजकी प्रवासाची वाट चलप अशें समीकरण जालां, आनी ताका लागून खऱ्या निसुवार्थी समाज वावुरप्यां कडेन लोक दुबावान पळोवंक लागल्यात.
आयजकाल उठ सूठ कोणूय एका रातयांत समाजसेवक जाता. काम कमी जायरात चड अशें दिसूंक लागलां. घरच्यांनी आनी गांवान उंवाळून उडयिल्लें मनीस आयज समाजसेवक म्हूण मिरयतात हें समाजाक घातक. दर एकलो आपुणूच व्हडलो तत्वगिज्ञांनी कसो उलयता, बरयता पूण निश्पत्ती शुन्य. आयज सगल्यांकूच झटपट गिरेस्त जावपाची सपनां पडूंक लागल्यांत, आनी ताका लागून लोक रिणांत बुडूंक लागल्यात. परिणाम बॅंको दारांत येवन बसपाक लागतकूच ती व्यक्ती लोक लज्जेक लागून आपणाल्या बायल भुरग्यां सयत आत्महत्या करून मकळो जाता.
कांय बोगस फायनान्स कंपनीं लोकांक डबल टिबल पयशे करून दिता म्हूण सांगता आनी अशिक्षीत लोकां वांगडा सुशिक्षितांकूय लाखांनी रुपयांची तोपी घालून धांव मारतात. अशो फायनान्स कंपनीं आयल्यो कितल्यो आनी गेल्यो कितल्यो हिशेब आनी कोंत ना. चडशे लोक असल्या गौडबंगालांनी फटवल्यात, पूण लजेक लागून कोण सांगिनात. खरें म्हणल्यार जांकां कोणाक असलो वायट अणभव आयिल्लो आसता ताणें जनजागृताय करून लोकांक सादूर करपाचें आसता़. पूण तो तें करिना. आपूण जसो फोंडांत पडला तशें तुमीय पडात. तातूंत ताका समधान भोगता. ही वृत्ती बरी न्हय. अडीअडचणींत सांपडिल्ल्यांक मजत करप मनशाचो धर्म. कोणाकूय मजत करप आसता. तें समाजकार्य. बुडटल्याचे तकलेर फातर आपटूंक फावना. वा माडा वेल्यान पडिल्ल्याक पिराड्यान बडोवंक जायना.
नामनेचे साहित्यीक काळे हांणी एकी कडेन म्हणलां की, ‘‘जो मेरेन स्वताच्या कुंटुंबाचें पोट भरून शिल्लक कांय उरना, तो मरेन समाजकार्याच्या आनी राजकारण्याच्या नादाक तरणाट्यांनी लागपाक फावना.’’ खऱ्यांनीच पयलीं आमी स्वावलंबी आनी आत्मनिर्भर जावंक जाय. समाजसेवा करतना लोकां कडेन पयशे मागचे पडूंक जायना. तूं अशें कितें समाजहिताचें प्रामाणीकपणान काम कर, जेणे करून पयशे घेवन लोक तुज्या म्हऱ्यांत येतले. दर एक मनशान आपणालो जल्म सार्थकी लायतलो जाल्यार समाजसेवे बगर पर्याय ना. पूण सगल्यांत पयलीं ताणें आपलो आनी आपल्या कुंटुंबाचो विकास करूंक जाय. कुटुंबा कडेन आडनदर करून कोणेच समाजसेवेंत देंवचो न्हय. ती हुतहुतेपणां जातलीं. समाजसेवकांक घरच्यां कडल्यान भरपूर तेंको मेळपाक जाय. आनी तेंको तेन्नाच मेळटा जेन्ना तुजी घरचीं मनशां सुखी आसतात, आनी तूं जें समाजकार्य करता ताचो तांकां व्हड अभिमान दिसता. कुटुंबाक वाऱ्यार उडोवन समाजकार्य करता ताका पावलां पावलाक गाळयांचो शिंवोर पडटा, घरच्यां कडल्यान आनी समाजा कडल्यानूय.
म्हणून दर एकल्यान समाज सेवेंत देंवतना पेलपाक जाता तितलींच समाजसेवा करचीं सगल्यांक गोळो मारून उपकारना. मनशाक समाजसेवा कर म्हणून कोण सांगिना, ती मनशाची सभावीक वृत्ती. जो मनीस संवेदनशील आसता थंय तीं आपसुकूच वयर सरता. ताका सांगचें पडना. खंयच्याच जेश्ठ समाजसुधारकांक तूं हें काम कर म्हणून कोणें सांगलें ना. जाच्या काळजांत मनीसपणाचो झरो आनी करुणेची माया व्हांवताली तांकांच समाजाचे प्रती मनीसपणाचो पाजर फुटलो, आनी म्हणून त्यो व्यक्ती सासणाच्यो समाजाचें यादींत आसात. त्या व्यक्तींची तांच्या जिवनपटाची आमी पारायणां करपाक जाय. निखटे समाजसेवक म्हूण मिरयलें म्हूण जायना. समाजसेवक हें उतर इतलें सवाय निखालस जावंक ना. समाजसेवक म्हणजे समाजा खातीर त्याग आनी जिवन समर्पीत करपाची सभावीक वृत्ती आशिल्ली व्यक्ती. आयच्या समाजांत अशो व्यक्ती मेळत व्हय?
काशिनाथ नायक
9158345844
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
