भांगरभूंय | प्रतिनिधी
तो एक निजाचो विनोदी कलाकार म्हणून ताका सर्गेस्त एँथनी मॅंडीसा कडेन सर करूंक लागले. आयज सुमार बत्तीस वर्सां सोंपलीं, ताचो जागो अजून लेगीत कोणेंच घेवंक जावंक ना.
बाब कार्लुस नोरोन्हा हो बड्डें (फातोड्डें, मडगांव) हांगां जल्मलो. ताच्या आंगांत जायते कलेचे गुण आसले म्हणपाचें ताच्या भुरगेपणांतूच सिद्ध जातालें. इश्कोलांत जावं वाड्यांत तो कॉन्सर्टांनी भाग घेतालो. वेगवेगळे तरेचो अभिनय करतालो, तशेंच सुवादीक ताळ्यान गायतालो. पयलीं गांवच्या तियात्रांनी, उपरांत गांवा भायल्या तियात्रांनीय तो न्हेसूंक पावलो. पयलीं पयलीं तो सर्गेस्त फादर कायतान हांच्या तियात्रांनी फकत कांतारां म्हणटालो, जांव तीं विनोदी, देसेंत एकोडीं, दुयेत, त्रियो, चौको वा पांचको. ताचे आवडीचें कांतार म्हळ्यार दुओ. तो आनी सर्गेस्त कायतान गोमीस (C C Boys) ह्या नांवान सांगाता दुओ गायताले. तांच्या दुओ कांतारांक लागून तो चड नामना जोडूंक पावलो. हे दुओ म्हणटना लोक तांकां माचयेर परत परत आपयतालो. आख्खें गोंयभर ते गाजले आनी परजळ्ळे. ह्या दुओंक लागून नामनेच्या दिग्दर्शकांच्या तियात्रांनीय तो न्हेसूंक पावलो. त्या वेळार सर्गेस्त आरिस्तिदेस डायस हाचो ‘दोया’ हो तियात्र भायर सरिल्लो. तातूंत तो दुओ म्हणटालो. उपरांत सर्गेस्त रॉबीन वाज, सर्गेस्त नॅल्सन आफोंस हांच्या तियात्रांनी तो नामना जोडूंक पावलो. उपरांत ताणें आनीक फाटीं वळून पळयलें ना.
प्रेमानंद सांगोडकार हांचे तियात्र ‘दोळे धांपचे आदीं’ आनी ‘दुसरो रोस्तो’, हांतूंत तो न्हेसलो. उपरांत लिगोरियो फेर्नांदीस हाणें ताका आपल्या पंगडांत घेतलो. ताचो खेळतियात्र (नॉन स्टॉप शो) ‘ओरोंभ आनी शेवोट’, जो जबरसो चलना जालो, हातूंत ताणें अभिनय केला. उपरांत लिगोरियोच्याच ‘देवाचो व्होड उपकार’ आनी ‘जेजुदास’ ह्या खेळतियात्रांनीय तो न्हेसलो. ‘जेजुदास’ ह्या खेळतियात्रांत ताची विनोदी भुमिका बेसबरी जाली. त्या वेळार ‘सिने टायम्स’ आनी ‘गोवा टायम्स’ ह्या कोंकणी सातोळ्यांनी ताका वाखाणलो.
तो एक निजाचो विनोदी कलाकार म्हणून ताका सर्गेस्त एँथनी मॅंडीसा कडेन सर करूंक लागले. त्या वेळार ‘जेजुदास’ ह्या खेळतियात्राक ‘Man of the Year’ म्हणून ‘मुरली देवरा तस्रीप’ फावो जाली. मागीर तो मिनीन दे बांदार हांच्या पंगडांत भितर सरलो. तो चड नांवलौकीक जालो तो मिनीनाच्या ‘सुकोरिना’ ह्या खेळतियात्रांत. ताका कोणूच वळखना असो तो उरलो ना. उपरांत मिनीनाच्याच ‘पोयलो मार्तीर फ्लोरियान वाज’ ह्याय खेळतियात्रांत ताणें लोकांक पोटभर
हांसयले. खंयच्याच दिग्दर्शकाक तो न्हेसुंनासतना उरला अशें म्हाका दिसना. त्या वेळा वयल्या शेंकड्या मेरेन प्रयोग जाल्ल्या खेळतियात्रांनी तो न्हेसला. तशेंच मिनीन दे बांदार हाचो ‘दुडू आनी गिन्यान’, लिगोरियो फेर्नांदीस हाचो ‘जुदास’, सर्गेस्त ए. ऍम. पाशेक हाचो ‘फातोर’ ह्या तिनूय शेंकडो हुपिल्ल्या खेळतियात्रांनी ताणें अभिनय केला. मिनीन दे बांदार हाचो ‘सोंवसारांत आसताना दियात’ ह्या खेळतियात्रांत ताणें केल्लो अभिनय निमाणो थारलो. ते उपरांत आनीक तो कोंकणी माचयेर दिसलो ना. अकस्मात तो हो संवसार सोडून गेलो.
आयज सुमार बत्तीस वर्सां सोंपलीं, ताचो जागो अजून लेगीत कोणेंच घेवंक जावंक ना. तो जागो अजुनूय खाली आसा म्हणल्यार फट जावची ना. पूण ताचो ताळो आमकां बॉनिफासियो डायस हाच्या ‘दोत देणें सावदी अरेबियाचें’ ह्या व्हिडियो फिल्मांत तशेंच ‘व्हिडियो वर्ल्ड’ हाणें तयार केल्ले ऑडियो कॅसेटींत आयकूंक मेळटा. ताचीं ‘गितारिस्त’ आनी ‘गोंयकार’ हीं दुओ कांतारां तांतूंत गायिल्लीं आसात. जाल्यार बॉनिफासियो डायस हाचीं व्हिडियो फिल्मां ‘जुलूम’ आनी ‘जाबाबदारी’ हांतूंत ताणें विनोदी भुमिका केल्यात.
कार्लूस हो एक कलाकार, सदांच हांसत्या तोंडाचो, फकांडेर कसो, बरो कांतोरिस्त, बरी भुमिका करपी, बरो तियात्रिस्त जावन गेलो.
(लिप्यांतर : मिनीन आल्मेदा)
– विल्सन डायस
फातोड्डें, मडगांव
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
