2025 मेरेन 20,000 भारतीय विद्यार्थी फ्रांन्साक

भांगरभूंय | प्रतिनिधी

भांगरभूंय । खबरां संस्था

नवी दिल्ली : फाटल्या वर्सा फ्रेंच दूतावासान 500 भारतीय विद्यार्थ्यांक 15 कोटी रुपयांची रमण- चर्पाक शिश्यवृत्ती दिली. विज्ञान आनी तंत्रज्ञानांत पदव्युत्तर पदवी मेळोवपा खातीर 12 ते 36 म्हयने आनी पी एच डी खातीर 10 म्हयने निधी दितात. 2018 वर्सा सावन फ्रँको इंडियन ट्रस्ट भारतीय विद्यार्थ्यांक शिश्यवृत्ती दिता.
सद्या भारतांतल्यान फ्रांन्साक वचपी 70% भारतीय विद्यार्थी वेवस्थापनाचे अभ्यास करतात आनी ताचे उपरांत सुमार 11% विद्यार्थी अभियांत्रिकी अभ्यास करतात. उरिल्ले 19 टक्के मनीस मानवीशास्त्र, फॅशन डिझायनिंग आनी पर्यटन अभ्यासक्रमांत वतात.
फ्रांन्स भारतीय विद्यार्थ्यां खातीर एक व्हड शिक्षणीक थळ जावपाचो आसा. फ्रांन्सान 2025 मेरेन दर वर्सा 20 हजार भारतीय विद्यार्थ्यांक फ्रांन्सांत शिकपाक आपोवपाचें ध्येय थारायलां. 13 जुलयाक प्रधानमंत्री नरेंद्र मोदी हांच्या फ्रांस भोंवडे वेळार संरक्षण, वेपार, उर्जा आनी शिक्षण ह्या मळार कांय म्हत्वाचे कबलाती जावपाची शक्यताय आसा.
फ्रेंच परराश्ट्र मंत्री कॅथरीन कोलोन्नान सांगलें, कोरोना उपरांत फ्रांसांत येवपी भारतीय विद्यार्थ्यांचो आंकडो वाडला. फाटल्या शिक्षणीक सत्रांतल्यान 10 हजार भारतीय विद्यार्थी आयल्यात. 2025 मेरेन दर वर्सा 20 हजारां परस चड भारतीय विद्यार्थी येतले. हाचे खातीर सगली तयारी पुराय जाल्या. भारतांतल्या 12 शारांनी ‘कॅम्पस फ्रांस’ कडल्यान विद्यार्थ्यांक सल्लो दितात. 2021- 22 वर्सा फ्रांसांत भारतीय विद्यार्थ्यांचो आंकडो 6 हजार आशिल्लो. फ्रान्स सरकारान अहमदाबाद, बेंगळुरू, भोपाळ, चंदीगड, चेन्नय, दिल्ली, हैदराबाद, जयपूर, कोची, कोलकाता, मुंबय आनी पुणे ह्या शारांनी ‘कॅम्पस फ्रांस’ वरवीं सल्लो दितात. तशेंच 14 तज्ञांची नेमणूक केल्या. फ्रांन्सांत शिकपाक सोदपी लोकांक ते मार्गदर्शन करतात.