भांगरभूंय | प्रतिनिधी
भांगरभूंय । प्रतिनिधी
मुरगांवः विद्यार्थ्यांनी आपलें ध्येय हातासपा खातीर जिद्दीन यत्न करीत रावपाक जाय. कितल्योय समस्या सामकार आयल्यार प्रयत्न करपाचें सोडून दिवपाक जायना अशें मुरगांवचो आमदार संकल्प आमोणकार हाणे सांगलें. गोंय क्षत्रीय मराठा समाजाच्या मुरगांव फांट्या वतीन धावी आनी बारावेचे परिक्षेंत बरी टक्केवारी घेवंन पास जाल्ल्या विद्यार्थ्यांक शिश्यवृत्ती भेटोवपाचे कार्यावळींत ते मुखेल सोयरे आशिल्ले.
बायणा हांगच्या रवींद्र भवनांत जाल्ले हे कार्यावळीक मानाचे सोयरे म्हणून सेंट्रल लायब्ररीचे क्युरेटर डॉ सुशांत तांडेल, डॉ सूरज काणेकार, समाजाचे ज्येश्ठ फुडारी पद्मनाभ आमोणकार, रेखा आमोणकार, समाज फांट्याचो अध्यक्ष सुनील शेट आनी हेर पदाधिकारी हाजीर आशिल्ले. जिणेंत प्रगती करपाक जाय जाल्यार शिक्षणा बगर पर्याय ना. वाचनात गिन्यानात भर पडटा, जीण समृद्ध जाता. ते खातीर विद्यार्थ्यांनी सेगीत कितें तरी वाचन रावपाक जाय असें डॉ तांडेल हांणे सांगले. विद्यार्थ्यांनी आपली कारकिर्द घडयतना मनीसपण शेंणचे ना हाचे कडेन लक्ष दिवपाक जाय असें काणेकार हाणे सांगलें.
मानेस्तांचे हस्तुकीं विद्यार्थ्यांक शिश्यवृ्त्ती भेटयल्यो. बारावेचे परिक्षेंत 96 टक्के गुण मेळयल्लो दीप राजेंद्र सावंत तशेंच जेईई अॅडव्हान्स परिक्षेत येसस्वी थारल्लो विक्रम चोडणकार हाचो आमदार संकल्प आमोणकाराचे हस्तु खासा भोवमान केलो. पद्मनाभ आमोणकार आनी रेखा आमोणकार हाणी समाजा खातीर दिल्ल्या योगदाना खातीर डॉ सूरज काणेकाराच्या हस्तुकीं तांचो भोवमान केलो. अक्षदा वाडेकार, वैशाली आमोणकार, सुनयना शेट हांणी सोयऱ्यांची वळख करून दिली. सुनील शेट हांणी येवकार दिलो आनी शांताराम पराडकरान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
