संत अमोघ लीला दास हांचेर म्हयन्याची बंदी

भांगरभूंय | प्रतिनिधी

इस्काॅनाचो निर्णय : स्वामी विवेकानंदा वयली टिका भुजली

नवी दिल्ली : इंटरनॅशनल सोसायटी फॉर कृष्ण चेतनान (ISKCON) आपल्या संतां मदल्या संत अमोघ लीला दास हांचेर एक म्हयन्याची बंदी घाल्या. रामकृष्ण परमहंस आनी स्वामी विवेकानंद हांचो अपमान करपी उलोवप केल्ले खातीर इस्कॉनान हो निर्णय घेतला.
स्वामी विवेकानंद (१२ जाने. १८६३ – ४ जुलय १९०२) हे विचारांनी सामके लवचिक अशे संत आशिल्ले. ते नुस्तेंय खाताले. ते गायन, वादन करताले. तांकां फुटबाॅल खेळपूय खूब आवडटालें. हें स्वता तांणी आनी तांच्या वेळा वयल्या साहित्यीकांनी बरोवन दवरलां. हालींच अमोघ लीला दास हांणी स्वामी विवेकानंद आनी तांचे गुरु रामकृष्ण परमहंस (१८ फेब्रु. १८३६- १६ आॅगस्ट १८८६) हांचे विशीं वादग्रस्त वक्तव्य केल्लें. स्वामी विवेकानंद हे जर नुस्तें खाताले तर तांकां ‘अध्यात्मीक’ म्हणपाचें?? अशें उलोवप दास हांणी केल्लें. अध्यात्मीक मनशाच्या काळजांत करुणा, दया, मोग आसता. अध्यात्मीक मनीस केन्नाच नुस्तें खावचो ना. कारण नुस्त्याकूय वेदना जातात, अशें तांणी सांगलें.
गीता पठण करचे परस फुटबाॅल खेळप श्रेश्ठ, अशें सिद्धपुरुस केन्नाच सांगचो ना. (स्वामी विवेकानंद हांचे कडेन एकदां कांय तरणाटे गेल्ले. गीते विशीं चर्चा करपाक. तेन्ना तांणी सांगलें, ‘आमचे तरणाटे सशक्त आसपाक जाय. धर्म मागीर. घटमूट जायात तरणाट्यांनो, हो म्हजो तुमकां सल्लो. फुटबाॅल खेळ्ळ्यार तुमी बेगीन सर्गाच्या लागीं पावतले.)
तुळशीच्या पाना परस वांयगें श्रेश्ठ, कारण तें खाल्यार पोट भरता, अशें एखादो सिद्धपुरुस कसो कितें म्हणपाक शकता? स्वामी विवेकानंदांचीं हीं मतां म्हाका पटनात. ते म्हज्या मुखार आशिल्ले जाल्यार हांव तांकां साश्टांग नमस्कार करपाचो. पूण तांच्या ह्या मतां कडेन हांव सहमत ना. रामकृष्ण परमहंस हांणी स्वामी विवेकानंदांक ‘जतो मत तथो पथ’ (जितलीं मतां, तितले रस्ते) अशी शिकवण दिल्ली. ताचेरुय संत दास हांणी उपहासात्मक टिका केली. दरेक मार्ग हो एकाच जाग्यार वचून मेळना, अशें तांणी म्हणिल्लें.
ह्या वक्तव्यांक लागून आनी स्वामी विवेकानंद, रामकृष्ण परमहंस हांचे वयले टिकेक लागून संत दास हांकां एक म्हयन्या खातीर इस्कोनांतल्यान निलंबीत केल्यात. दास हांणी ह्या काळांत दोंगराचेर वचून ध्यान धारणा करपाचें थारयलां.

दास नेमके कोण?
अमोघ लीला दास हें सोशल मीडिया वयलें एक प्रसिद्ध नांव. तांचे व्हिडीओ व्हड प्रमाणांत व्हायरल जातात. तांचें खरें नांव आशिष अरोरा. ते अध्यात्मीक गुरु, इस्कॉन मंदिर द्वारकाचे (दिल्ली) उपाध्यक्ष आसात.
ते लखनौच्या एका धर्मीक कुटुंबातले. २००० वर्सा बारावेंत आसतना तांणी देव सोदपाक घर सोडलें. मागीर परत आयले आनी तांणी सॉफ्टवॅर इंजिनिअर जावपाचो निर्णय घेतलो. २००४ त पदवी घेतकच तांणी अमेरिकेंतले एके बहुराष्ट्रीय कंपनींत काम करपाक सुरवात केली. २९ व्या वर्सा अमोघ लीला दास हे इस्कॉनांत वांटेकार जाले. इंजिनिअर संत अमोघ दास हांकां सोशल मीडियाचेर हजारांनी लोक फॉलो करतात.