चार म्हयन्यांत सात चित्ते सोंपले
भांगरभूंय | प्रतिनिधी
भोपाळ : मध्य प्रदेशांतल्या कुनो राष्ट्रीय अभयारण्यांत आनीक एक चित्तो मेल्ल्याची म्हायती मेळ्ळ्या. फाटल्या चार म्हयन्यांतली ही सातवी घडणूक.
फेब्रुवारींत दक्षीण आफ्रिकेंतल्यान हाडिल्ल्या तेजसाची कूड संरक्षित उक्त्या पांजऱ्यांत मेळ्ळी. चार वर्सांचो ‘तेजस’ दुसऱ्या चित्तो वा वागा वांगडा झगडीं करतना मेला आसूं येता, अशें कुनोचे वरिश्ठ रान अधिकारी जे. एस. चौहानान सांगलें. अधिकृत पत्रका प्रमाण, मंगळारा सकाळीं 11 वरांचे सुमाराक 6 व्या क्रमांकाच्या संरक्षित वाठारांतल्या तेजसाचे मानेचेर कांय घावे जाल्ल्याचें कर्मचाऱ्यांक दिसलें. उपरांत उपचारा पयलीं ताका बेशुद्ध करपाची मान्यताय मेळोवन दनपरां 2 वरांचेर पशुवैजकी तज्ञांचो पंगड थंय पावलो. पूण त्या वेळार चित्तो मेल्लो मेळ्ळो.
9 मे दिसा ‘दक्ष’ हाका मरण आयले उपरांत चित्त्यांक रानांत सोडपाची प्रक्रिया थांबयल्ली. 9 जुलयाक ‘प्रभाश’ आनी ‘पावक’ ह्या दोन चित्तांक परत रानांत सोडले उपरांत ही घडणूक घडल्या.
चार म्हयन्यांतली सातवी घडणूक
27 मार्चाक ‘साशा’ नांवाचे मादी चित्त्याक मूत्रपिंडाच्या दुयेंसान मरण आयलें. उपरांत 23 एप्रिलाक ‘उदय’ आनी 9 मे दिसा ‘दक्ष’ हांकां मरण आयलें. बऱ्याच वर्सां उपरांत भारतांत जल्मल्ल्या ‘ज्वाला’ च्या चार बछड्यां मदल्या तीन बछड्यांक मरण आयले. चार म्हयन्यां परस उण्या काळांत मरण आयिल्लो ‘तेजस’ हो सातवो चीत्तो आशिल्ल्यान ह्या प्रकल्पाचेर प्रस्नचिन्न उबें जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
