भांगरभूंय | प्रतिनिधी
मनशाची पिराय आनी देशाची पिराय हातूंत एकसारकेंपण आसना. ह्या दोनूय पिरायां मदीं फरक आसा. पोरूं आमी
आमच्या देशाची अमृत महोत्सवी मनयली. म्हणल्यार पोरूं आमच्या देशाक जल्मून 75 वर्सां जालीं. तरिकूय आमचो देश अजुनूय बाळ अवस्थेंत आसा. मनशा वरी देशाक पिरायेची मर्यादा नासता. मनशाक 75 वर्सां जातकूच तो वृद्ध – म्हातारो जाता. तो निवृत्त जाता. हाचे कारण ताचे जिवीत सिमीत आसता. पूण देशाची गजाल तशी नासता. देश चिरकालीन आसता. हाचोच अर्थ असो की पिराय हें उतर subjective आसता. तें कोणा पासत वापरलां हें जाणप म्हत्वाचें आसता.
हालींच महाराष्ट्र राज्यांतलो एक राजकी फुडारी अजीत पवार हांणी आपल्या काकाक म्हणल्यार शरद पवाराक उद्देशून म्हणलें, ‘तूं आतां 82-83 वर्सांचो वृद्ध जाला. तुवें राजकारण खूब केलें. आतां हें सगलें बंद करपाचो वेळ आयला.’ मुखार म्हणलें, ‘तूं आमचें दैवत आसा अशें म्हणून काकाक फुलांय बी माळ्ळीं. पूण हातूंतल्यान एक प्रस्न उप्रासता. तो म्हणल्यार एखादऱ्या मनशाक राजकारणांत भितर सरपाक आनी तातूंतल्यान भायर येवपाक ताची पिराय गरजेची आसता व्हय? आमी जाणांत लग्न जावपाक पिरायेची अट लागता म्हूण. एखादऱ्याक सरकारी नोकरी हातासपाक पिरायेचें बंधन आसता म्हूण, आनी नोकरी मेळ्ळे उपरांत थारावीक पिराय जातकूच तो सेवा निवृत्त जाता म्हूण. मनशाक आपणाल्या खासगी जिवितांत निवृत्तीची पिराय नासता. हांगां जमता तो मेरेन तो काम करता. जेन्ना काम जमना तेन्ना तो आपसूक निवृत्त जाता.
दुसरी गजाल म्हणल्यार जण एका मनशाची तांक आनी ताची बुध्द खेरीत आसता. संत ज्ञानेश्वर महाराजान आपणाल्या पिरायेच्या फक्त सोळाव्या वर्सा ‘भावार्थ दिपीका’ हो श्रीमान भगवदगीतेचेर भाश्य करपी ग्रंथ रचलो आनी पिरायेच्या निखट्या बाविसाव्या वर्सा समाधी घेतली. आपले बुंदवंतकायेन अख्खो संवसार जिखपी स्वामी विवेकनंद फक्त 39 वर्सां जगलो. हाची उरफाटी गजाल भारताचो राष्ट्रपिता महात्मा गांधी हांची. ह्या म्हापुरसाक खूब वर्सां जगपाची उमेद आसली. आपणाल्या पिरायेच्या 73व्या वर्सा भलायकेन घटमूट आशिल्लो महात्माजी म्हणूंक लागलो, ‘म्हाका म्हजें पुराय जिवीत जगूंक जाय, आनी म्हज्या मतान पुराय जिवीत म्हणल्यार 124 वर्सां. आनी तेन्ना मेरेन फक्त भारतूच न्हय तर अाख्खें जग मुक्त जातलें. पूण आपणाले इत्से प्रमाण तो जगूंक शकलो ना. ताच्या पिरायेच्या 79 वर्सा ताची हत्या जाली.
प्रधानमंत्री इंदिराजीची हत्या तिच्या पिरायेच्या 66व्या वर्सा जाली. भारताचो आनीक एक राजकी फुडारी मोरारजी देसाय ताच्या पिरायेच्या 99 वर्सा मेरेन जियेलो. तो परायेच्या 81 व्या वर्सा देशाचो प्रधानमंत्री जालो. उपरांत धा वर्सां तो राजकारणांत सक्रीय आसलो.
आयज लेगीत जगभर कितलेशेच जाण्टेले आपल्या आपल्या देशाची धुरा सांबाळटात. हांव आतां तुमचे मुखार भितरल्या पांच फुडाऱ्यांचीं नांवां आनी तांची पिराय दवरता. 1. कॅमरून देशाचो अध्यक्ष पॉल बिया, पिराय 90 वर्सां. 2. पॅलेस्टायन देशाचो अध्यक्ष महम्मद अब्बास, पिराय 87 वर्सां, 3 सावदी अरेबियाचो राजा सलमान बीन, पिराय 87 वर्सा, 4. आयरलॅण्डचो अध्यक्ष मायकल हंग्ज, पिराय 82 वर्सां आनी 5 नॉर्वें देशाचो राजा पांचवो हेराल्ड, पिराय 86 वर्सा.
आनीक एक गजाल. जिवितांतल्या हेर मळा वरीं राजकारण न्हय. इंग्लीशींत एक वाक्यप्रचार घोळणुकेंत आसा. ‘ Life begins at 40’ हाचो अर्थ असो की मनशाक आपणाले जिवीत सारकें बरें कळपाक ताका ताचे पिरायेचीं 39 वर्सां हुपचीं पडटात. 40व्या वर्सा तो जीण समजुपा इतलो जून जाता. तर मागीर राजकारणा सारके खोल आनी घुस्पागोंदळाचे मळ समजुपाक आनी तातूंत थिराय मेळपाक पिरायेचें साठावें वर्स उजवाडल्यार तातूंत अजाप तें कसलें?
अजीता वरी आदींच काका – मामा राजकारणांत आसल्यार ती गजाल मात्शी सोंपी जाता. पूण सरसामान्य राजकारण्याक राजकारणांत मुरपाक उण्यांत उणीं साठी तरी हुपचीच पडटा. सत्तेची चटक राजकारण्याक राजकारणांत दसून दवरता. कांय वर्सां फाटीं अजीताचो काका शरद पवार चार खेपे महाराष्ट्राचो मुखेलमंत्री जाल्लो. तो केंद्रीय मंत्रीय बी जाल्लो. आतां ताका परतून मुखेलमंत्री वा प्रधानमंत्री जायन दिसलो जाल्यार ताचो हातूंत कसलो गुन्यांव? सत्तेची गोडीच तशी आसता. शरदर पवाराच्या पुतण्यान ती अणभवल्यांत. हाचे आदीं दोन फावटी तो महाराष्ट्र राज्याचो पालवी मुख्यमंत्री जाल्लो. आतां तो तिसरे फावटी त्या पदार पावला. देखून आतां ताका त्या राज्याचो मुखेलमंत्री जायन दिसप सभावीक आसा. आयचे घटकेक अजीत पवारान एक गजाल स्पश्ट करची, ती म्हणल्यार तो आपल्या पिरायेच्या खंयच्या वर्सा राजकारणांतल्यान निवृत्त जातलो तें जाहीर
करचें.
प्रदीप लवंदे
9923292022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
