भांगरभूंय | प्रतिनिधी
कितले फावटी घरांतल्यान भायर सरतना बायलां घरा परतून वचून दार सारकें लायला काय, गॅस बंद केला काय, गिझर बंद
केला काय ह्यो गजाली परतून तपासून परतून भायर सरतात? खूबशीं जाणां अशीं करतात आसतलीं. हेच दादले कितले फावटी करतात हाचो विचार आमी केन्ना केला? खूब कमी प्रमाणांत आसतलें. हाचो अर्थ दादल्यांक चड यादी उरतात आनी बायलां विसरतात असो जायना. हाचो अर्थ घरांतलें हें म्हत्वाचे हुस्के आमी फक्त बायलांचे गांठीक बांदल्यात, दादल्यांच्या न्हय असो जाता. चुकून फाल्यां घरांत कितेंय अशें तशें जालें जाल्यार ताची जबाबदारी आमी सहज बायलांचेर लादून मेकळे जातले असो ताचो अर्थ. आनी हें पिळग्यान पिळग्यो अशेंच चलत आयलां. ह्यो संवयो फक्त बायलांक गुलाम म्हूण पळोवपी वा घरांतलीं सगलीं कामां बायलांचेर लादून पांय वयर काडून बसपी दादल्यांच्योच अशेंय न्हय. पूण घराचे एकूण भलायकेंत थंय रावपी सगल्यांचोच सारको वांटो आसूंक जाय. अशे परिस्थितींत, बायलांचो वांटो सदांच चडूच आसता.
काम न्हय जबाबदारी!
घरांत जावपी कामांक आमी केन्ना काम म्हूण पळयच नात. चडशे फावटी ती आमची जबाबदारी वा कर्तव्य आसता. त्या कामाचो कोणाक पगार मेळना, कोणाक कसलो मोबदलो मेळना, कांय घरांनी तर सादी कवतुकाची दोन उतरां लेगीत मेळनात. अशा वेळार घरांत चड वालोर भायर वचून काम करून पयशे घरांत हाडपी कर्त्या मनश्याक, आनी तो कर्तो मनीस चडशे फावटी दादलोच आसचो असो आमचो अट्टाहास. ना म्हणल्यार बायलांक आतां काम करपाची, नोकरी करपाची, पयशे जोडून हाडपाची मेकळीक दिल्या ह्या समाजान.
कारण ना जाल्यार आतां घरांतलो हिशोब सारको जुळना अशें चित्र जावंक लागलां. पूण हेंवूय करतना ते बायलेन घरांतल्या जबाबदार्यां कडेन आडनदर करूं नये अशेंच दिसता सगल्यांक. तिणें सरये वयली कसरत करीत सगले सांबाळचें हीच आमची अपेक्षा. तिच्या सपनांक, तिच्या आकांक्षांक आनी म्हत्वाचें म्हणल्यार तिचे बुध्दीमत्तेक अजुनूय हो समाज दुय्यमच स्थान दिता. मात तिचे कडल्यान जोडपाची अपेक्षा दवरपी हो समाज घरांतूय अशेच बदल जावचें हे कशेंच मानून घेना. ज्या दिसा बायलेन आपली बुध्दीमत्ता सिध्द करून घरा भायर पांय दवरलो त्याच दिसाच्यान घरांतूय फावो ते बदल जावंक जाय आशिल्ले. घरांतलीं कामां ही फक्त जबाबदारी न्हय जाल्यार तिवूय एक तरेन कामांच आनी म्हणून ती सगल्यांनी समान तरेन करपाक जाय हेंवूय पटोवपाची एक समान प्रक्रिया सुरू जावंक जाय आशिल्ली. मात ती जाल्ली दिसना, आनी हाचोच परिणाम म्हूण आयज आमी बायलांक दोट्टी चेपणा खाला चिड्डीत आसात.
बायलांची कामां?
खंयचींच कामां हीं लिंगीक आदाराचेर जोखप शक्यूच ना. खंयचेंय काम हें दादल्याचें वा बायलेचें आसपाक शकना. तें व्यक्तीचें आसता. दर एका व्यक्तीक भूक लागता, दर एका व्यक्तीक नितळ रावंक आवडटा, दर एका व्यक्तीक काळजी, मोग जाय आसता. म्हणटकूच ह्यो गरजो भागोवपाचेंय काम त्या दर एका व्यक्तीचें आसपाक जाय. भूक जर दादलो आनी बायलेक समान लागता जाल्यार मागीर रांदपाची जबाबदारी सदांच बायलेच्या आंगार कित्याक येवन पडटा? नितळसाण ही सगल्यां खातीर गरजेची आसत जाल्यार कपडे धुवपाक, आपलें घर नितळ दवरपाक एखाद्या दादल्याक कित्याक लज दिसची? काळजी, मोग आमकां सगल्यांक जाय दिसता जाल्यार ह्यो भावना फक्त बायलांनीच कित्याक उक्तेपणान दाखोवच्यो?
भुरगीं जर दोगांय आवय-बापायचीं जाल्यार तांचो अभ्यास, तांच्यो गरजो, तांची शाळा, ह्यो जबाबदार्यो आमी समान वांटून घेवपाक नाकात? पूण हें क्वचितूच आमकां जाल्लें दिसता. घरांत आदार म्हूण ल्हान सान गजाली करपी दादले घरांत सगलें सारकें आसा न्हय, कितें जाय, नाका, कितें कमी आसा आनी वयर सांगिल्लें प्रमाण कितें चालू बंद आसा हाचें सगलें वजें बायलांच्या माथ्यार मारून मेकळे जातात. ह्यो सगल्यो गजाली बायलोच बर्यो करतात, समजतात असो बेठोच समज ह्या समाजान केला आनी बायलांच्या काळजांत ल्हानपणांतच रुजवणा घालां. ह्यो नस्त्यो रुजवणा घाल्ल्यो बियो जाता तितले बेगीन हुमटावन ह्या समाजाक योग्य दिकेन व्हरपाची गरज आसा.
ल्हान आसतना सावन जबाबदारी!
चली ल्हान आसतना सावन तिच्या मनांत आमी अशे तरेच्यो ल्हान ल्हान गजाली रुजयत आसतात. जेवणा उपरांत बाबून ताट, पेलो थंयच दवरल्यार जाता, बायन मात तो काडून धुवून भितर दवरूंक जाय. बाबून कितल्योय आड्डी मारल्यार जाता, बायन मात ल्हवूच उलोवंक जाय. बाबून रांदचेकुडींत पावल दवरल्यार मळब कोसळटा, बायन मात ल्हानपणांतल्यान रांदपाक शिकपाक जाय. अशें आनी खूब कितें. कितलेशेच शिकिल्ल्या घरांनी ल्हान भावाची जबाबदारी लेगीत घरांतली व्हडली भयण उबारतना दिसता. हें करतना स्वताचें शिक्षण, स्वताची सपनां तें चुलीत घालता. खंयच्याय गजालीचो पर्याय पयली चल्याक. तें मागीर शिक्षण जावं वा सादे कपडे लेगीत. अशे परिस्थितींत एखादी चली आपले भितर न्युनगंड निर्माण करीतच व्हड जाता आनी ताकाय आपणें स्वता ही सरये वयली कसरत करत रावप हेंच सत्य दिसता. आपल्याक अर्थीक स्वातंत्र्य जाय, घरा भायर पडपाक जाय जाल्यार घरांतूय बरी सून, बायल म्हूण सिध्द करचें पडटलें हेंच ती आपल्या गांठीक बांदता आनी तशेंच तरेन वावुरता. परिणाम म्हणल्यार पिराय वाडटा तशें ती आपल्याचेर मानसीक तशेंच शारिरीक अत्याचार करीत रावता, आनी आपली भलायकी इबाडून घेता.
आमच्या देशांत वाडपी बायलांच्या मानसीक तशेंच शारिरीक दुयेंसांक जबाबदार आमीच आसात… विसरूं नाकात!
अन्वेषा सिंगबाळ
9923442746
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
