भांगरभूंय | प्रतिनिधी
भारत आनी वॅस्ट इंडिज ह्या पंगडां मदीं आयच्यान पयली टॅस्ट विंडसर पार्क मैदानाचेर सुरू जातली. भारताचो पंगड वॅस्ट इंडिजांत दोनूच टॅस्टी खेळपाचो आशिल्ल्यान पयले टॅस्टी सावन भारताक बरो खेळ करचो पडटलो.
भारत पंगडान वॅस्ट इंडिज भोंवडे वयलो फाटल्यो चार मॅची जिखल्यात. ह्या माळांनी भारतान एक लेगीत मॅच वगडावंक ना. हालींच झिम्बाब्वेंत जाल्ले संवसारीक वन डे पात्रताय फेरयेंत वॅस्ट इंडिजान सामकें बाबत प्रदर्शन केल्लें. ताका पयले खेपे संवसारीक वन डे सर्त चुकतली. वॅस्ट इंडिजाचो पंगड सामको दुबळो जाला अशें जाणकार म्हणटात. पूण, टॅस्टींत ताचे विशीं अशें म्हणप चुकीचें थारतलें. वॅस्ट इंडिजान फाटल्या तीन घरगुती टॅस्ट माळेंत पाकिस्ताना आड बादाबाद, जाल्यार इंग्लंड आनी बांगलादेश हांकां हारयल्यात. ताका लागून भारताक सतर्क रावपाची गरज आसा.
हे खेपे वॅस्ट इंडिजाचे भोंवडेर थोडी युवा अणभवहीन भारतीय पंगड पावला. 16 वांगड्यांच्या पंगडांत फकत पांच खेळगड्यांक कॅरिबियनांत खेळपाचो अणभव आसा. भारताच्या पंगडांत आठ तज्ञ बॅट्समन आसा. तातूंतल्या फकत रोहित शर्मा, विराट कोहली आनी अजिंक्य रहाणे हांकां कॅरिबियांत खेळपाचो अणभव आसा. ताका लागून ह्याच तीन बॅट्समनांचेर अतिरिक्त जापसालदारकी आसतली. ह्या तिगांयनी मेळून कॅरिबियनांत 17 टॅस्टी खेळ्ळ्यात.
रोहित शर्मा आनी विराट कोहली हांकां आंतरराष्ट्रीय पांवड्याचेर खेळपाचो खूब अणभव आसा. पूण, वॅस्ट इंडीज भुंयेचेर म्हणपा सारकें प्रदर्शन करपाक जमूंक ना. रोहित कॅरिबियनांत फकत दोन टॅस्टी खेळ्ळा. ताची सरासरी 25.00 आसा. कोहलीन णव टॅस्टींनी 35.61चे सरासरीन धांवड्यो केल्यात. ताणें एक दोट्टी शेंकडो मारला. ती खेळी सोडली जाल्यार कॅरिबियनांत बाकीच्या 12 डावांनी फकत दोनूच खेपे 50चो आंकडो हुपला. मजेशीर म्हणल्यार रोहित आनी कोहली परस अणभवी स्पिनर आर आश्विनाची सरासरी बरी आसा. ताणें 58.75चे सरासरीन धांवड्यो केल्यात.
हालींच भारताच्या पंगडांत पुनरागमन करपी अजिंक्य रहाणे कॅरिबियांत स टॅस्टी खेळ्ळा आनी शंबरा परस चड सरासरीन धांवड्यो केल्यात. पूण, हे खेपे परिस्थिती वेगळी आसा. मुखेल कारण म्हणल्यार हे भोंवडेर ताका बरें प्रदर्शन करचें पडटलें ना जाल्यार परतून पंगडांतल्यान भायर बसचें पडुये. साबार युवा खेळगडे टॅस्ट पंगडांत सुवात मेळोवपाचे धडेर आसात. एक बाबत भोंवडी रहाणेक परतून पंगडांतल्यान भायर बसुये. रहाणे 83तल्यो 49 टॅस्टी विदेशांत खेळ्ळा. ताणें 40.28चे सरासरीन 3223 धांवड्यो केल्यात. ताणें 12तले आठ शेंकडे विदेशांत मारल्यात.
मजगतीं, विशेश म्हणल्यार विंडसरांत वट्ट स वर्सांनी पयली टॅस्ट जाता.
दोनूय पंगडां मदीं 2011त विंडसरांत पयली टॅस्ट जाल्ली. ती मॅच बादाबाद उरिल्ली. ते उपरांत ह्या मैदानाचेर जाल्ल्या सगल्या मॅचींचो निकाल लागला.
विंडसर पार्क जरी कॅरिबियन देशांत आसलो तरी थंयची खेळपट्टी ही स्पिनरांक मजत करपी आसा. वॅस्ट इंडिजाचो ऑफ स्पिनर शेन शिलिंगफोर्डान ह्या मैदानाचेर दोन टॅस्टींतल्यान 20 विकेटी घेतल्यात. हे खेळपट्टीचेर सगल्यांत चड विकेटी घेवपाचे वळेरेंत देवेंद्र बिशू पयले आनी ऑस्ट्रेलियेचो नॅथन लायन तिसरे सुवातेर आसा.
हे आंकडेवारी वयल्यान विंडसराची खेळपट्टी ही स्पिनरांक मजत करपी आसतली हें स्पश्ट जाता. ताका लागून पयले टॅस्टींत आर आश्विन, रवींद्र जडेजा आनी अक्षर पटेल हे स्पिनरांचें त्रिकूट खेळटना दिसुये. ह्या मैदानाचेर आतां मेरेन 400 धांवड्यो जावंक ना. ताका लागून बॅट्समनां कडल्यान मोठी खेळी जाल्ली क्वचीत पळोवपाक मेळटा.
डॉमनिकीच्या चारूय वटेन दर्या आसा. ताका लागून हांगा बरोच पावस पडटा. आयच्यान सुरू जावपी टॅस्टींत पांचूय दीस पावस पडपाची शक्यताय आसा. निमाण्या दिसा चड पावस पाडुये असो अदमास हवामान खात्यान उक्तायला.
भारताचो पंगड असोः रोहित शर्मा (मुखेली), शुभमन गिल, ऋतुराज गायकवाड, विराट कोहली, यशस्वी जैसवाल, अजिंक्य रहाणे (उप मुखेली), केएस भरत (विकेटकीपर), इशान किशन (विकेटकीपर), आर. अश्विन, रविंद्र जडेजा, शार्दुल ठाकूर, अक्षर पटेल, मोहम्मद सिराज, मुकेश कुमार, जयदेव उनाडकट आनी नवदीप सैनी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
