डाॅ. नीलम गोऱ्हे क्रांतीज्योत पेटयत?

भांगरभूंय | प्रतिनिधी

डाॅ. गोऱ्हे ह्यो देसांतल्या अस्तुरी सबळीकरणातल्यो म्हत्वाच्यो फुडारी. महाराष्ट्रच न्हय देसांतल्या कांय राज्यांनी महिला आयोगाचे घडणुके खातीर त्यो वावुरल्यात. अस्तुरे विशींच्या कायद्याचे बांदावळी खातीरय वावुरतना ताणीं बरयल्लीं पुस्तकां वाचल्यार देसाच्या समान नागरी कायद्याचे बांदावळी पासत त्यो म्हत्वाच्यो आसतल्यो.

आमच्या देसाची अर्थिक राजधानी मुंबय आसपाविल्लें महाराष्ट्र राज्य देसातल्या व्हडल्या राज्यांतले एक. स्त्रीशक्ती, स्त्रीशिक्षण चळवळ, अभिव्यक्ती स्वातंत्र्य, नागरिकांक हक्क आनी लागणुकीची शिकवण दिवपी महात्मा ज्योतिबा फुले, महर्षी धोंडो केशव कर्वे, लोकमान्य बाळ गंगाधर टिळक हांची जल्मभूंय. आॅगस्ट क्रांतीदीस चळवळय ह्याच राज्यांतल्यान मुखार गेली. त्याच राज्यांत देसाची 2024 ची लोकसभा वेंचणूक लागीं आयिल्ली आसतना जें राजकी बदलाचें राजकारण फाटलीं वर्सभर चलता तें देसाक वेगळे वाटेन व्हरतलें. पयलींचे केंद्रीय मंत्री पृथ्वीराज चव्हाण हालींच एके मुलाखतींत देस फकत दोन राजकी पक्षांच्या राजकारणा कडेन वता, अशें मत उक्तायलां. 

आदीं शिवसेना, फाटल्या सप्तकांत राष्ट्रवादी काँग्रेसीत जाल्लीं आमदारांची पक्षांतरां लोकसभा वेंचणुकेंत महाराष्ट्राक म्हत्व आसा हें दाखोवन दिवपी. उत्तर प्रदेसाच्या उपरांत महाराष्ट्रांत सगल्यांत चड लोकसभा, राज्यसभा मतदारसंघ आसात. महाराष्ट्र विधानसभा वेंचणूक जायत सावन त्या राज्यांत जाल्ल्या राजकी बदलांचो परिणाम अर्थकारणाचेर जावंक ना, पूण केंद्रीय मान्यतायेविणे उदरगतींत महाराष्ट्र विकास आघाडी सरकारा वेळार आडमेळीं आयलीं हें महाराष्ट्राचे मुख्यमंत्री एकनाथ शिंदे, उपमुख्यमंत्री अजितदादा पवार हाणीं मान्य केलां. फाटलें सप्तक सोंपतना महाराष्ट्र विधान परिषदेची उपसभापती डाॅ. नीलम गोऱ्हे हांचो सरकाराक तेंको दिवप पयलींचे मुख्यमंत्री उद्धव ठाकरे हांकां धपको दिवपी अशें राजकी पंडितांक दिसता. मात, महाराष्ट्राच्या राजकारणाची दिका पळयल्यार उद्धव आनी राज ठाकरे एकठांय येवन, राष्ट्रवादी काँग्रेस सरकारांत आयिल्ल्यान उचांबळीत जाल्ले सरकारांतले शिवसेनेंत वचपाक शकतात.  सर्वोच्च न्यायालयान श्री. शिंदे हांचे शिवसेनेक खरी थारायिल्ल्यान लुकसाण उद्धवजी ठाकरे हांकां जालां. 

डाॅ. गोऱ्हे ह्यो एक समाजिक कार्यकर्त्योच न्हय स्त्रीशक्ती चळवळ आनी अस्तुरी सक्षमीकरणांत वांटो उखलपी फुडारी. राष्ट्रवादी काँग्रेसीक वेंर पडिल्ली आसतना आनी दोन गटांत राष्ट्रवादीच्या चिन्ना पासतच्या लडायेच्या बोवाळांत डाॅ.गोऱ्हे सरकारा बरोबर वचप भाजप खातीर बळगें. तांचे कडेन विधान परिषदेचें कार्यकारी अध्यक्षपदय आसा. त्या पदाचेर तांकां पावोवप वा सरकारांत तांचो आसपाव करून घेवप आनी महाराष्ट्रांतले स्त्रीशक्तीची व्हडा प्रमाणांत मतां मेळोवप ही भाजपाची मोख आसुये. 

महाराष्ट्र, उत्तर प्रदेश राज्यांत सरकार सत्तेर आशिल्ल्याचो भाजपाक मोठो लाव जातलो. कर्नाटक विधानसभा वेंचणुकेन काँग्रेसीक बळ मेळ्ळां तें उणे करपा खातीर भाजपा राजकारण खेळटलेंच, एकादरे काँग्रेसीतय दोन गट महाराष्ट्रांत पडपाक शकतात. राजकारणाक आनीक फांटे फुटल्यार महाराष्ट्रांत राष्ट्रपती राजवट हाडून लोकसभे वांगडा विधानसभेच्यो वेंचणुकोय घेवपाची भाजपा तयारी दिसता. कोणाक लुकसाण जातलें, फायदो जातलो तें राजकारण फुडें सरकतना होलमतलें. कर्नाटकावरी एकाच राजकी पक्षाचें सरकार महाराष्ट्रांत येवपाची शक्यताय न्हयकारूंक येवची ना. 

डाॅ. गोऱ्हे ह्यो देसांतल्या अस्तुरी सबळीकरणातल्यो म्हत्वाच्यो फुडारी. महाराष्ट्रच न्हय देसांतल्या कांय राज्यांनी महिला आयोगाचे घडणुके खातीर त्यो वावुरल्यात. अस्तुरे विशींच्या कायद्याचे बांदावळी खातीरय वावुरतना ताणीं बरयल्लीं पुस्तकां वाचल्यार देसाच्या समान नागरी कायद्याचे बांदावळी पासत त्यो म्हत्वाच्यो आसतल्यो. समान नागरी कायदो, अस्तुरी विकासाचीं केंद्र सरकाराचीं पावलां पळोवन आपणे महाराष्ट्र सरकारा वांगडा वचपाचो निर्णय घेतलो हें ताणीं सांगलां. समान नागरी कायद्यांतल्यो कुटुंब कायद्या विशीं तजवीजो करपा पासत देसांतल्या स्त्रीशक्तीक एकठावप, तांचीं मनां समजून घेवप आनी कायद्यांत फुडाराचे नदरेन त्यो बांदप सोपें न्हय. 

डाॅ. गोऱ्हे फुडारिल्ल्या विचारांच्यो, भाजपाकच न्हय संघशक्तीकय आपल्या विचारां बराबर घेवन वचपाची तांक तांचे मदीं आसा. मनुवादी शिक्क्यांतल्यान भायर येवपा खातीर प्रधानमंत्री नरेंद्र मोदी हांच्या सरकारान केल्ले येत्न फळादीक केन्ना जातले? 33 टक्के न्हय 45 ते 50 टक्के संख्येन संसदेत अस्तुरी पावल्यारच. समान नागरी कायद्याचे बांदावळीची प्रक्रिया वीस वर्सां आदीं सुरु जाल्ली, बायलां राखीवता विधेयकाचेंय तेंच. आतां फुडल्या पांच वर्सांत दोनय सपना पुराय जावप गरजेचें ते खातीर अभ्यासक, गिन्यानी, पदवी मेरेन शिक्षण घेतिल्ले संसदेंत, विधानसभेंत जाय. एक राष्ट्र एक वेंचणूक ही कल्पना, बळिष्ट पक्षांतरबंदी कायद्याची वाटय तीच. पयलो पावंडो अंदुचे लोकसभा वेंचणुकेंत 40 टक्के अस्तुरेक संसदेर धाडपाचो, समान नागरी कायद्याचें सपन तेन्नाच जातलो. डाॅ. गोऱ्हे ते वाटे वयल्यो एक वारकरी जातल्यो हातूंत दुबाव ना. समान नागरी कायद्यांतल्यो बारीकसाणी गोंयच्यो अस्तुरी चळवळींतल्यो भयणी सबिना मार्टिन्स, अॅड.आल्बर्टिना आल्मेदा हांचे कडल्यान तशेंच स्त्रीमुक्ती, स्त्रीशक्ती चळवळींतल्यान, वावरांतल्यान तांकां कळ्ळ्यात. समान नागरी कायद्याची भासाभास देसांत चालू जातना  महाराष्ट्रांत सरकारा वाटेन रावन भाजपांत, देसांत क्रांतीज्योत पेटयतल्यो अशी आस्त बाळगूया?

– सुहासिनी प्रभुगांवकार