एआय लिसा सांगता ओडिया, इंग्लीश खबरो
भांगरभूंय | प्रतिनिधी
देशांतली पयली एआय खबरा निवेदिका
भुवनेश्वर : ओडिशाचें पयलें खाजगी उपग्रह खबरां चॅनल ओटीव्हीन आयतारा भुवनेश्वरांत जाल्ल्या सुवाळ्यांत देश आनी राज्यांतल्या पयल्या आर्टिफिशियल इंटेलिजन्स (एआय) खबरां निवेदकाचें लाँचिंग केलें.
खबरां निवेदिका लिसाची वळख करून दितना ओडिशा टेलिव्हिजन लिमिटेडाची (ओटीव्ही) वेवस्थापकीय संचालक जगी मंगत पांडा हांणी सांगलें, एक काळ आशिल्लो जेन्ना संगणक एक आश्चर्यकारक गजाल आसताली. पूण वेळ बदल्ला आनी सध्या लोक इंटरनॅटाचेर चड वेळ घालोवपाक लागल्यात. ताका लागून, काळा वांगडा रावन दूरचित्रवाणी पत्रकारितेंत आमी 25 वर्सां यशस्वीपणान पुराय केल्ल्यांत. ओटीव्हीन ओडिशाचो पयलो आर्टिफिशियल इंटेलिजन्स खबरां निवेदिकेचें लोकार्पण करून एक वांटचिरो घाला. ए.आय.चो वापर टी.वी. चेर चालू जाला. आमची लिसा आनीक वाटचिरे हुपतली हाची खात्री आसा. ती प्रादेशीक चॅनलांची पयली खबरां निवेदक अशें तिणें सांगलें.
“आयज आमच्या प्रेक्षकांचोय विकास जाला. आमी दितात त्या खबरांच्या प्रमाणांत तांकां रूची ना. ओटीव्हीन तांकां दिवंक शकता अशा कांय बातम्यांचे अँगल वा जापो, विश्लेशण आयकप तांकां आवडपाक लागलां. अशें करतना, म्हाका दिसता, एआय आमकां चड विश्लेशणात्मक काम करपाक मदत करतलें, ” तिणें सांगलें.
ह्या संदर्भांत उलयतना ओटीव्हीची डिजिटल बिझनेस मुखेली लितीशा मंगत पांडा हिणें सांगलें, हें तंत्रज्ञान विकसीत करप हो एक खूब व्यापक अणभव. गूगल लेगीत ओडिया भाशेचो इंग्लीशींत सारको अणकार करीना. हो आमचो एक व्हडलो संघटनात्मक यत्न आयज आमी करपाक पावल्यात. अर्थांत, तुमचे इतलें अस्खलित न्हय, पूण गूगल ट्रान्सलेटर तुमकां दिवंक शकता ताचे परस तें खूब चड अस्खलित भाशांतर आसा. आमचें हें पयलें केबल चॅनल जाणें देशाक पयली एआय निवेदिका दिली.”
“लिसा एआय आनी एलएलएम हांच्या बळग्याचो वापर करून खबरो नेटान आनी कार्यक्षमतेन पावयता. ग्राउंडब्रेकिंग मशीन लर्निंग अल्गोरिदम आभासी सादरकर्त्या वांगडा जोडून, लिसा तंत्रगिन्यान आनी पत्रकारितेच्या उत्कृश्टतायेचें परिपूर्ण उदाहरण जावपाचो यत्न करतली. जशें जशें आमी हें रुपांतर आपणायतले तशें तशें आमी नितीमत्ता आनी पारदर्शकता सुनिश्चीत करून काम करतले अशें तिणें सांगलें.
लिसाक जायत्या भाशांनी उलोवपाची तांक आसली तरी सध्या खातीर ती फकत ओटीव्ही नेटवर्काच्या दूरचित्रवाणी आनी डिजिटल प्लॅटफॉर्मां खातीर ओडिया आनी इंग्लीशींतल्यान खबरो सादर करतली. लिसाक ओडियांत चड कुशळ करपाचे यत्न सुरू आसात. इंस्टाग्राम, फेसबूक, आनी हेर सगळ्या नामनेच्या सोशल मिडिया प्लॅटफॉर्मांचेर लिसा मेळटा, अशेंय लितिशा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
