भांगरभूंय | प्रतिनिधी
मावण्ट कार्मेल हायस्कुलाचो खेळगडो नॅथन फर्नांडीसान सध्या फुटबॉलांत सगल्यांचें लक्ष्य आपले कडेन ओडून घेतलां. हालींच ताणें मुंबय एफसी कडेन कबलात केल्या. तो फुडारांत जावपी इंडीयन सुपर लिगेंत (आयएसएल) हातूंत पदार्पण करतलो.
सर्वसादारण कुटुंबांत जल्मल्लो सिल्व्हेस्टर आनी आंनसू हांचो पूत नॅथनाचो मावण्ट कार्मेल स्कुलांत उत्कृश्ट खेळगडो म्हणून भोवमान केला. त्याच वर्सा हरमल जीएफडीसी केंद्र स्थापन जालें आनी चार वर्सां खेळून उत्कृश्ट रितीन प्रगती केली. ते उपरांत इनामाच्या रुपांत मडगांवच्या केंद्रांतल्यान संदी आनी ताची प्रतिभा पळोवन मुंबयच्या रिलायन्स पंगडान चार वर्सां खातीर ताका खेळयलो. ह्या चार वर्सांनी खर मेहनत करून ताणें साबार क्लबांचें लक्ष आपले कडेन ओडून घेतलें आनी हालींच ताणें मुंबय सिटी कडेन चार वर्सांची कबलात केली.
गोंयांतल्या चॅम्पियन पंगडा खातीर आनी देशांतल्या बळिश्ट पंगडा वतीन खेळप मेळप ही अभिमानाची गजाल आसा. आपल्या पुतान बरें तरेन नांव कमलयलें अशें ताची आवय आंनसू रॉड्रिग्स आनी बापूय सिल्व्हेस्टर हांणी म्हणलें.
मजगतीं, नॅथनाची आवय आंनसू हिणें सेंट झेवियर म्हाविद्यालयांत बायल खेळगडी म्हणून म्हाविद्यालयाच्या पंगडाचें प्रतिनिधित्व केल्लें. तशेंच बापूय सिल्व्हेस्टर व्हॉलिबॉल खेळगडो आशिल्लो. विशेश गजाल म्हणल्यार पुर्तुगालांत गेल्ल्या गोंयच्या पंगडाचें ताणें प्रतिनिधित्व केल्लें.
मजगतीं, खाशेले कार्यावळींत मांद्रेंचे आमादर जीत आरोलकार हांणी नॅथनाक परबीं भेटयल्या. ह्या वेळार चर्चीचे फादर लीन मास्कारेन्हस, सरपंच बर्नार्ड फर्नांडीस, पंच सांतान फर्नांडीस, आदले पंच बाबूश फर्नांडीस आनी हेर उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
