भांगरभूंय | प्रतिनिधी
लक्ष्य सेनान कॅनडा ओपन बॅडमिंटन सर्तीच्या दादल्यांच्या एकोड्या गटांतलें वस्तादपण जोडलें. कॅल्गरींत जाल्ले फायनलींत ताणें ऑल इंग्लंड चॅम्पियन चीनाच्या ली शी फेंग हाका हारयलो. उमळशीक वाडोवपी फायनलींत भारताच्या युवा बॅडमिंटन खेळगड्यान 21-18, 22-20 अशा गेमींनी जैत जोडलें.
बायलांच्या एकोड्या गटांतलें वस्तादपण जपानाचे अकाने यामागुचीन जोडलें. तिणें थायलॅण्डाचे रत्चानोक इंतानोन हिका 21-19 आनी 21-16 अशा सरळ गेमींनी हारयली. यामागुचीन सेमी फायनलींत भारताचे पी व्ही सिंधूक हारयिल्ली.
मजगतीं, 1957 सावन चालू आशिल्ले कॅनडा ओपन वस्तादपण सर्तींत दादल्यांच्या एकोड्या गटांत वस्तादपण जोडपी लक्ष्य सेन भारताचो फकत दुसरो खेळगडो थारलो. ताचे आदीं म्हणल्यार 2016त बी साई प्रणीत हाणें दादल्यांच्या एकोड्या गटांत किताब जिखिल्लो.
2016त दादल्यांच्या दोट्टी गटांत मनू अत्री आनी बी सुमीत रेड्डी हे जोडयेन लेगीत वस्तादपणाचेर नांव कोंतारिल्लें. 2015त बायलांच्या दोट्टी गटांत ज्वाला गुट्टा आनी अश्विनी पोनप्पा हे जोडयेन किताब जिखिल्लो.
लक्ष्य सेनान कारकिर्दींत अजून मेरेन चार किताब जिखल्यात. सिनीयर गटांत खेळपाक सुरवात केल्या उपरांत 2019त ताणें डच ओपनाचो किताब जिखिल्लो. त्याच वर्सा सारलॉरलक्स ओपन वस्तादपण सर्त जिखिल्ली.
2022 वर्सा सावन लक्ष्य सेनाचें गोल्डर इयर सुरू जालें. ह्या वर्सांत ताणें इंडिया ओपन जिखली आनी भारता खातीर सांघीक गटांत थॉमस कप आनी राष्ट्रकूल खेळांत भांगरा पदक जिखलें.
2022त लक्ष्य सेनान जर्मन ओपन आनी ऑल इंग्लंड चॅम्पियनशिपीचे फायनलींत पावलो. 2023त कॅनडा ओपन जिखून आपलो चवथो किताब जिखलो.
वर्साचे सुरवातीक लक्ष्य सेन फॉर्मांत नाशिल्लो. पोरूं ऑगस्टांत ताच्या नाकाचें ऑपरेशन जाल्लें. ते उपरांत तो कांय म्हयने बॅडमिंटन कोर्टा पसून पयस आशिल्लो. पुनरागमन केल्या उपरांत परतून फॉर्मांत येवपाक ताका बरोच वेळ लागलो. पूण, थायलॅण्ड ओपनाचे उपांत्य फेरयेंत सुवात मेळोवन आपूण फॉर्मांत येता हाची झलक दाखयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
